ايتا كەتەيىك, وزىنە ءوزى قىزمەت كورسەتۋ تەرمينالدارى بۇكىل ەل بويىنشا 553 اۋىلدىق اكىمدىكتە ورناتىلادى. وسى پۋنكتتەر ارقىلى تۇرعىندار مەملەكەتتىك قىزمەتتەردى جەڭىل ءارى تەز الادى, ماركەتپلەيستەردە تەحنيكا مەن ءتۇرلى تاۋارلاردى, سونداي-اق تەمىر جول جانە اۆيابيلەتتەردى ساتىپ الادى, كوممۋنالدىق قىزمەتتەر ءۇشىن ونلاين-تولەمدەر, اۋدارىمدار جاسايدى, دارىگەردىڭ قابىلداۋىنا جازىلادى جانە تەلەمەديتسينا سەرۆيستەرىنە قول جەتكىزەدى, پوشتا قىزمەتتەرىنە جانە كۋرەرلىك جەتكىزىلىمدەرگە تاپسىرىس بەرۋىنە دە مۇمكىندىك بار. سونىمەن قاتار eQoldau Wi-Fi سيگنالىن بەرە الادى, وعان قوسىلۋ ارقىلى اۋىل تۇرعىندارى ينتەرنەتتى وزدەرىنىڭ گادجەتتەرىندە قولدانا الادى.
«ققو-نى قالا مەن اۋىل اراسىنداعى تسيفرلى تەڭسىزدىكتى جويۋدىڭ تاعى ءبىر قادامى دەپ ساناۋعا بولادى. وسىلايشا, ءبىز ادەتتەگىدەي اۋىلدى قالاعا ەمەس, قالانى اۋىلعا جاقىنداتامىز. اۋىل حالقى قالادا الاتىن بارلىق قىزمەت ءتۇرىن الا الادى. وسى جەردەن اۋداندىق حالىققا قىزمەت كورسەتۋ ورتالىقتارىنا بارۋدىڭ قاجەتى جوق. وتكەن جىلى وسىنداي اۋىلدىق پۋنكتتەر ەلىمىز بويىنشا 1 250 تالشىقتى-وپتيكالىق بايلانىس جەلىسى ورناتىلدى. اندرەەۆكا اۋىلى ءبىز وسىنداي قۇرىلعىنى ورناتقان العاشقى اۋىل بولادى. مەنىڭ ويىمشا, بارلىق اۋىلدىق ەلدى مەكەنگە وسى سەرۆيسپەن ورناتامىز», دەدى تسيفرلىق دامۋ, يننوۆاتسيالار جانە اەروعارىش ونەركاسىبى ۆيتسە-ءمينيسترى اسحات ورازبەك.
سونداي-اق eQoldau اشىق قولجەتىمدىلىك پۋنكتتەرى ارقىلى اۋىل تۇرعىندارى ەلەكتروندى تسيفرلى قولتاڭبالارىن الدى. ياعني ەندى «ازاماتتارعا ارنالعان ۇكىمەت» مەملەكەتتىك كورپوراتسياسى Egov.kz پورتالىن, Enpf.kz بىرىڭعاي زەينەتاقى قورىنىڭ سايتىنىڭ بارلىق مۇمكىندىگىن پايدالانا الادى. جالپى, جاڭا بولىمدەر مەن قىزمەتتەردى قوسۋ ارقىلى سەرىكتەستىك ەكوجۇيەسىن دامىتۋ جوسپارلانۋدا.
«بۇگىنگى تاڭدا self-service نارىعىندا بار شەشىمدەر كوبىنەسە مونوفۋنكتسيونالدى سانالادى جانە بەلگىلى ءبىر ۇقساس مىندەتتەردى ورىنداۋعا باعىتتالعان. ءبىز ۇسىناتىن وزىنە ءوزى قىزمەت كورسەتۋ ايماقتارى – eQoldau اۋىلدىق ەلدى مەكەندەرگە تسيفرلاندىرۋدىڭ كىرۋ نۇكتەلەرى دەپ اتاۋعا بولادى, بۇل اۋىل تۇرعىنىنا ءبىر جەردە بىردەن بىرنەشە ماسەلەنى شەشۋگە, ءتۇرلى قىزمەتتەر مەن سەرۆيستەردى الۋعا مۇمكىندىك بەرەتىن كەشەندى سەرۆيس. ياعني حالىق ءۇشىن eQoldau تەرمينالى – تسيفرلى قىزمەتتەر الەمىنە اپاراتىن وزىندىك سارا جول سەكىلدى», دەدى «قازاقتەلەكوم» اق ستراتەگيالىق باسقارۋ جونىندەگى باس ديرەكتورى باتىر ماحانبەتاجيەۆ.
شىنىندا دا, اۋىلدارعا تسيفرلاندىرۋدىڭ كىرۋ نۇكتەسى قاعيداتى بويىنشا eQoldau اشىق قول جەتكىزۋ پۋنكتتەرىنىڭ جەلىسىن قۇرۋ اۋىلدىق ەلدى مەكەندەرگە تالشىقتى-وپتيكالىق بايلانىس جەلىلەرىن ورناتۋ جونىندەگى ءىرى جوبانى ىسكە اسىرعاننان كەيىن مۇمكىن بولدى. بۇدان باسقا, اندرەەۆكا اۋىلىندا تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى مەن «قازاقتەلەكوم» اراسىندا اۋىل اكىمدىكتەرىن قوعامدىق قول جەتكىزۋ پۋنكتتەرىمەن جابدىقتاۋ بويىنشا ىنتىماقتاستىق تۋرالى مەموراندۋمعا قول قويىلدى.
