ەسكە الۋ شاراسىنا ارداگەر جاۋىنگەرلەر, اسكەري قىزمەتشىلەر مەن قوعام وكىلدەرى قاتىستى. ءراسىم بارىسىندا تاجىك-اۋعان شەكاراسىندا قىزمەت اتقارعان قازاقستان جاۋىنگەرلەرىنە ارنالعان ەسكەرتكىشكە گۇل شوقتارى قويىلدى.
ءىس-شارادا شەكارا قىزمەتى ديرەكتورىنىڭ ورىنباسارى گەنەرال-مايور تولەۋجان ءجۇنىسوۆ جانە ءىىم ۇلتتىق ۇلانى باس قولباسشىسىنىڭ تاربيە جانە الەۋمەتتىك-قۇقىقتىق جۇمىس جونىندەگى ورىنباسارى گەنەرال-مايور قايرات ۇمبەتوۆ ءسوز سويلەپ, جاۋىنگەرلەردىڭ اسكەري بورىشتى ابىرويمەن ورىنداعانىن اتاپ ءوتتى.
«بۇل كۇن – باتالون جاۋىنگەرلەرىنىڭ ەرلىگى مەن وتانعا ادالدىعىنىڭ, اسكەري بورىشقا بەرىكتىگىنىڭ سيمۆولى. وسى رەتتە باتالون ارداگەرلەرىن ۇلتتىق ۇلان باس قولباسشىلىعى اتىنان تاريحي داتامەن قۇتتىقتايمىن», دەدى گەنەرال-مايور قايرات ۇمبەتوۆ.
ەسكە الۋ ءىس-شاراسى ۇلتتىق اسكەري-پاتريوتتىق ورتالىقتا ۇيىمداستىرىلعان كونتسەرتتىك باعدارلامامەن جالعاستى. باعدارلامادا قورعانىس مينيسترلىگىنىڭ, ۇلتتىق ۇلاننىڭ, شەكارا قىزمەتىنىڭ ءان-بي ءانسامبلى سوليستەرى پاتريوتتىق باعىتتاعى شىعارمالارىن ورىندادى.
ايتا كەتەيىك, وسىدان 25 جىل بۇرىن قازاقستاننىڭ اسكەري قىزمەتشىلەرى تاجىك-اۋعان شەكاراسىنداعى جاۋىنگەرلىك مىندەتىن اياقتاپ, ەلگە ورالدى. قازاقستان رەسپۋبليكاسىنىڭ جەكە قۇراما اتقىشتار باتالونى 1993-2001 جىلدار ارالىعىندا پياندج وزەنى بويىندا مەملەكەتتىك شەكارانى كۇزەتتى. وكىنىشكە قاراي, قىزمەت بارىسىندا قازىرگى ۇلتتىق ۇلاننىڭ, بۇرىنعى ىشكى اسكەردىڭ 17 جاۋىنگەرى ەرلىكپەن قازا تاپقان ەدى.
