2020-2021 جىلدارداعى بالالار مەن جاسوسپىرىمدەر كوماندالارى اراسىنداعى قازاقستان رەسپۋبليكاسىنىڭ چەمپيوناتىندا ەلوردالىق سپورت مەكتەبىنىڭ تاربيەلەنۋشىلەرى ءۇش التىن جانە ەكى كۇمىس مەدال جەڭىپ الدى. بۇل جالپى كوماندالىق ەسەپتە ءبىرىنشى ورىن الۋىنا مۇمكىندىك بەردى.
ماراپاتتى مەكتەپ ديرەكتورى تالعات كيتاروۆقا شايبالى حوككەيدەن قازاقستان فەدەراتسياسىنىڭ وكىلى رۋستام يبراەۆ تابىستادى.
«مەكتەپ قىزمەتكەرلەرىن, بارلىق جاتتىقتىرۋشىلار قۇرامىن, تاربيەلەنۋشىلەرىمىزدى, اتا-انالاردى «شايبالى حوككەيدەن قازاقستانداعى ۇزدىك مەكتەپ» اتاعىمەن قۇتتىقتاعىم كەلەدى. بۇل جەڭىسكە اركىم ءوز ۇلەسىن قوستى. قۇتتىقتايمىن! بارىڭىزگە راحمەت!», دەپ اتاپ ءوتتى سپورت مەكتەبىنىڭ ديرەكتورى.
ەستەرىڭىزگە سالا كەتەيىك, نۇر-سۇلتان قالاسى اكىمدىگىنىڭ "شايبالى حوككەيدەن №10 مامانداندىرىلعان بالالار-جاسوسپىرىمدەر سپورت مەكتەبى" كمم 2002 جىلدىڭ قاڭتارىندا اشىلعان بولاتىن. بۇگىندە مۇندا 600-گە جۋىق بالا تەگىن وقيدى.
