ماسەلەن, بيىل جامبىل وبلىسىندا اتاۋلى الەۋمەتتىك كومەكپەن 95 430 ادامدى قامتۋ جوسپارلانعان. 1 مامىرعا دەيىن اتاۋلى الەۋمەتتىك كومەك الۋ ءۇشىن 12 690 وتباسى ءوتىنىش بەرگەن. الايدا ونىڭ ىشىندە 3 102 وتباسىنا كومەك تاعايىندالماعان. ال 9 588 وتباسىنداعى 49 063 ادامعا اتاۋلى الەۋمەتتىك كومەك بەرىلىپتى. بۇل ءۇردىس الداعى ۋاقىتتا دا جالعاساتىن بولادى.
ء«وڭىر تۇرعىندارىنان 7 658 وتباسىمەن الەۋمەتتىك كەلىسىمشارت جاسالعان. ول 41 692 ادامدى قۇرايدى. سونىمەن قاتار جۇمىسپەن قامتۋدىڭ بەلسەندى شارالارىنا 1 010 ادام تارتىلىپ, ونىڭ ىشىندە تۇراقتى جۇمىس ورىندارىنا 325 ادام, اقىلى قوعامدىق جۇمىسقا 323 ادام, الەۋمەتتىك جۇمىس ورىندارىنا 35 ادام, قايتا دايارلاۋ كۋرسىنا 1 ادام جانە جاستار تاجىريبەسىنە 1 ادام جولدانعان. جاڭا بيزنەس يدەيالارىن ىسكە اسىرۋ ءۇشىن 325 وتباسى 200 ايلىق ەسەپتىك كورسەتكىش مولشەرىندە مەملەكەتتىك گرانت العان. كەپىلدەندىرىلگەن الەۋمەتتىك توپتامامەن اتاۋلى الەۋمەتتىك كومەك الۋشى وتباسىلارداعى 1 جاستان 6 جاسقا دەيىنگى 24 989 بالا قامتىلادى دەپ جوسپارلانۋدا. ال قاڭتار-ءساۋىر ايلارىندا 1 جاستان 6 جاسقا دەيىنگى 10 567 بالا كەپىلدىك بەرىلگەن الەۋمەتتىك توپتامامەن قامتاماسىز ەتىلدى», دەيدى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى جورابەك باۋبەكوۆ.
ارينە, مەملەكەت تاراپىنان كوپبالالى جانە از قامتىلعان وتباسىلارعا تەك اتاۋلى الەۋمەتتىك كومەك قانا بەرىلىپ وتىرعان جوق. سونىمەن قاتار وڭىردە جەرگىلىكتى تۇرعىنداردىڭ الەۋمەتتىك جاعدايىن ەسكەرە وتىرىپ اشىلعان بىرقاتار الەۋمەتتىك دۇكەندەر بار. قازىرگى كەزدە تاراز قالاسىنىڭ وزىندە 14 دۇڭگىرشەك جۇمىس ىستەپ تۇر. ونىڭ ىشىندە 8 دۇڭگىرشەك زاماناۋي ۇلگىدە جابدىقتالعان. وبلىستىڭ بىرقاتار اۋداندارىندا دا مۇنداي نىساندار جۇمىس ىستەيدى. مۇنداعى سورەلەرگە نەگىزىنەن اۋىل شارۋاشىلىعى تاۋار وندىرۋشىلەرىنىڭ ونىمدەرى قويىلىپ, نارىق باعاسىنان 10-20 پايىز تومەن باعادا ساۋدالانۋدا. سونداي الەۋمەتتىك دۇكەننىڭ ءبىرى – وبلىس ورتالىعىنداعى «قاراسۋ» الابىندا ورنالاسقان. مۇندا كەلۋشىلەر كوپ. دۇكەن ساتۋشىسى, كوپبالالى انا حاميدا ساۋرانبەك مۇندا اعىمداعى جىلدىڭ اقپان ايىنان بەرى جۇمىس ىستەيدى ەكەن. ول شىنىندا دا بۇل دۇكەندەگى تاۋارلاردىڭ نارىقتاعى باعادان الدەقايدا ارزان ەكەنىن ايتتى. ماسەلەن, مۇندا ءبىر كيلو قانت 220 تەڭگەدەن, ءبىر كيلو كۇرىش 240 تەڭگەدەن, ءبىر ليتر سۇيىق ماي 560 تەڭگەدەن, نان 85 تەڭگەدەن ساتىلۋدا. مۇنىڭ دا وڭىردەگى از قامتىلعان وتباسىلار ءۇشىن ايتارلىقتاي كومەك ەكەنى ءسوزسىز. ەندى تاعى دا 7 الەۋمەتتىك دۇكەن سالۋ جوسپارلانۋدا. بۇدان بولەك, تاراز قالاسىنىڭ اۋماعىنداعى ء«شولدالا» الابىندا, سونداي-اق, جۋالى, بايزاق جانە جامبىل اۋداندارىندا دا دۇڭگىرشەكتەر ورناتىلادى.
وسىدان ەكى جىل بۇرىن تاراز قالاسىندا تۇراتىن كوپبالالى جانە از قامتىلعان وتباسىلارعا 45 پاتەرلىك تۇرعىن ءۇي تابىس ەتىلگەن بولاتىن. بالا-شاعاسىمەن جاڭا باسپاناعا قونىستانعان وتباسىلاردىڭ قۋانىشىندا شەك بولعان جوق. بۇل ءۇردىس بۇگىن دە اكىمدىك تاراپىنان جالعاسىن تاۋىپ كەلەدى. وبلىس ورتالىعىنداعى «اراي», «قاراسۋ» جانە 15-شاعىن اۋداندارىندا جاڭا سالىنعان تۇرعىن ۇيلەردەن جۇزدەگەن پاتەر الەۋمەتتىك وسال توپتاعى ازاماتتارعا بەرىلدى. جالپى, وڭىردە كوپبالالى جانە از قامتىلعان وتباسىلاردى قولداۋ ماقساتىندا جۇمىستار جالعاسۋدا.
