«يندۋستريا جانە ينفراقۇرىلىمدىق دامۋ مينيسترلىگى ءۇشىنشى ەلدەردەن تسەمەنت يمپورتىنا تىيىم سالۋ تۋرالى بۇرىن ەنگىزىلگەن بۇيرىقتىڭ كۇشىن جويۋدى قاراستىرىپ جاتىر. اتالعان بۇيرىق وتاندىق تسەمەنت وندىرۋشىلەردى قولداۋ جانە قوسىمشا جۇكتەۋ ماقساتىندا التى اي مەرزىمگە ەنگىزىلگەن بولاتىن», دەلىنگەن حابارلامادا
يدم دەرەكتەرى بويىنشا, زاۋىتتاردا تسەمەنتتىڭ (م400, م450, م500 ماركالى) ورتاشا باعاسى ماركاسىنا قاراي تونناسىنا 21-23 مىڭ تەڭگە شەگىندە, ققس-مەن 22,4 مىڭ تەڭگە. نارىقتاعى تسەمەنتتىڭ قىمباتتاۋى ديلەرلەر مەن الىپساتارلاردىڭ ارەكەتتەرىمەن بايلانىستى.
«بۇگىنگى تاڭدا مينيسترلىك قۇرىلىس ماتەريالدارى باعاسىنىڭ ودان ءارى نەگىزسىز ءوسۋىن بولدىرماۋ, وندىرۋشىلەر مەن جەتكىزۋشىلەر اراسىندا ءسوز بايلاسۋ مەن الىپساتارلىققا جول بەرمەۋ ءۇشىن باسەكەلەستىكتى قورعاۋ جانە دامىتۋ اگەنتتىگىنە تەكسەرۋ جۇرگىزۋ جانە شارالار قابىلداۋ ءۇشىن رەسمي حات جولدادى.
وسىعان بايلانىستى مينيسترلىك تسەمەنت وندىرۋشىلەرگە ءىرى قۇرىلىس كومپانيالارىمەن جانە بەتون وندىرۋشىلەرمەن تىكەلەي جۇمىس ىستەۋگە كەڭەس بەرەدى», دەپ تولىقتىردى ۆەدومستۆو وكىلدەرى.
بۇعان دەيىن يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ كەيبىر ەلدە ارماتۋرا, تسەمەنت جانە نەگىزگى قۇرىلىس ماتەريالدارىنىڭ باعاسى 70 پايىزعا دەيىن وسكەنىن حابارلاعان بولاتىن.
