اتالمىش شارانىڭ ماقساتى – ەسىرتكى قۇرالدارى مەن پسيحوتروپتىق زاتتاردىڭ زاڭسىز اينالىمى فاكتىلەرىن انىقتاۋ, رەسپۋبليكانىڭ وڭتۇستىك وڭىرلەرىنىڭ اۋماقتارىندا وسەتىن جابايى سورانى زاڭسىز جەتكىزۋ ارنالارىنىڭ جولىن كەسۋ.
جاز, كۇز مەزگىلدەرىندە قۇرامىندا ەسىرتكى زاتتارى بار وسىمدىكتەر ءوسىپ, ونەدى. اينالىمعا دا وسى ۋاقىتتا ەنە باستايدى. اتاپ ايتساق, «تەتروگيدروكاننابينول», ياعني ماريحۋانا, گاشيش جاسالاتىن قاراسورا بابىنا كەلەدى ەكەن.
وپەراتسيانى جۇرگىزۋدىڭ تاعى ءبىر ماقساتى قر قك-ءنىڭ 300-بابى بويىنشا قۇرامىندا ەسىرتكىسى بار وسىمدىكتەردى ءوسىرۋ جانە قر اقبتك-ءنىڭ 420-بابىنا سايكەس جابايى سورانى جويۋعا باعىتتالعان شارالاردى قابىلداماۋ فاكتىلەرىن انىقتاۋ..
– وڭتۇستىك وڭىرلەردەن جابايى وسەتىن سورانى جانە باسقا دا پسيحوتروپتىق, ەسىرتكى زاتتارىن شىعارۋ ارنالارىن جابۋ ءۇشىن شقو اۋماعىندا 4 جەدەل ءموبيلدى توپ قۇرىلدى. جىل باسىنان بەرى شقو پد ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى زاڭسىز اينالىمنان 638 كگ ءتۇرلى ەسىرتكى زاتتارىن تاركىلەدى. بەس اي كولەمىندە ەسىرتكى زاتتارىنىڭ زاڭسىز اينالىمىنا بايلانىستى 120 فاكت انىقتالدى. ونىڭ ىشىندە 91-ءى ساتۋ ماقساتىندا ەكەنى انىقتالدى, – دەدى شقو پد باستىعى ساعات ماديەۆ.
كەشە باستالعان «قاراسورا-2021» جەدەل الدىن الۋ شاراسى 30 قازانعا دەيىن جالعاسادى.
