سونداي-اق بۇگىنگى تاڭدا باكۋ (اليات) - قۇرىق باعىتىندا تەڭىز تاسىمالىنىڭ قۇنى 1800 اقش دوللارىنا دەيىن تومەندەگەنىن اتاپ وتكەن ءجون (بۇرىن تاريف 2400 اقش دوللارى بولعان).
سونىمەن قاتار 2020 جىلى قازاقستان-تۇركيا كولىك قىزمەتتەرى نارىعىنداعى قازاقستان تاسىمالداۋشىلارىنىڭ ۇلەسى 18%, تۇركيانىڭ جانە ءۇشىنشى ەلدەر تاسىمالداۋشىلارىنىڭ ۇلەسى تيىسىنشە 56% جانە 26% قۇرادى.
2016 جىلى اۆتوكولىك جونىندەگى ارالاس كوميسسيانىڭ وتىرىسى بارىسىندا تۇرىك تاراپى تۇركيادان قازاقستانعا تۇرىك تاسىمالداۋشىلارى ورىندايتىن رەيستەر سانىنان قازاقستاندىق اۆتوكولىك قۇرالدارىنىڭ كەمىندە 26%-ىن جۇكتەۋدى قامتاماسىز ەتۋ بويىنشا مىندەتتەمە قابىلداعان.
بۇل رەتتە ترانزيتتىك-كولىكتىك ىنتىماقتاستىقتىڭ سەرپىندى دامۋىنىڭ اجىراماس شارتتارىنىڭ ءبىرى - وتاندىق تاسىمالداۋشىلاردىڭ جۇكتەردى اۆتوموبيلمەن حالىقارالىق تاسىمالداۋ نارىعىنداعى باسەكەگە قابىلەتتىلىگىن ارتتىرۋ جانە شەتەلدىك تاسىمالداۋشىلارمەن تەڭ قۇقىقتىق تەپە-تەڭدىك دەڭگەيىن قامتاماسىز ەتۋ.
تاسىمالداۋلار سالاسىندا تەپە-تەڭدىكتى ساقتاۋ ماقساتىندا جىل سايىن تاراپتار اراسىندا رۇقسات بلانكىلەرىمەن الماسۋدىڭ ءوزارا كەلىسىلگەن كۆوتاسى بەلگىلەنەدى.
2021 جىلعا تاراپتار اراسىندا تاعايىنداۋ تۇرلەرى بويىنشا رۇقساتتاما بلانكىلەرىمەن الماسۋ كۆوتاسى بەلگىلەنگەن: قازاقستان ءۇشىن – 11 000 بلانك, تۇركيا ءۇشىن – 12 500 بلانك.
وسى كۆوتادان 2021 جىلعى 1 ماۋسىمداعى جاعداي بويىنشا قازاقستاندىق تاسىمالداۋشىلار ءۇشىنشى ەلدەرگە/ەلدەردەن 2137 امبەباپ, 3 ترانزيتتىك جانە 1602 رۇقساتتى پايدالاندى.
تۇرىك تاسىمالداۋشىلارى ءۇشىنشى ەلدەرگە/ەلدەردەن 2787 امبەباپ, 5655 ترانزيتتىك جانە 102 رۇقساتتى پايدالاندى.
2021 جىلعى ماۋسىمدا قازاقستان مەن تۇركيانىڭ اۆتوتاسىمالداۋشىلار قاۋىمداستىقتارى اراسىندا كەلىسسوزدەر, سونداي-اق اۆتوكولىك جونىندەگى ارالاس قازاقستان-تۇركيا كوميسسياسىنىڭ كەزەكتى وتىرىسىن وتكىزۋ جوسپارلانىپ وتىر. ونىڭ بارىسىندا باۋىرلاس ەكى ەل اراسىنداعى ءوزارا ءتيىمدى تاسىمالداردى جۇزەگە اسىرۋ ءۇشىن ءتيىستى شەشىمدەر قابىلدانادى.
