دودانىڭ باستى ماقساتى – ادام مەن تابيعاتتىڭ ءوزارا ارەكەتتەسۋ ماسەلەلەرىنە قوعام نازارىن اۋدارۋ, تابيعي الۋانتۇرلىلىكتى ساقتاۋ جانە قورشاعان ورتاعا دەگەن قۇرمەت يدەياسىن كەڭىنەن ناسيحاتتاۋ. ۇيىمداستىرۋشىلار جانۋارلارعا جاسالاتىن قاتىگەزدىكتىڭ الدىن الۋ مەن جاناشىرلىق سەزىمىن وياتۋ, وسىمدىكتەر الەمىنە ۇقىپتى قاراۋ يدەيالارىن ونەر تۋىندىلارى ارقىلى كەڭىنەن دارىپتەۋ قاجەت دەپ ەسەپتەيدى.
«بايقاۋعا ارنالعان سايتتا 782 ادام تىركەلىپ, 1515 سۋرەت سايىسقا ءتۇستى. سۋرەتتەردىڭ باسىم كوپشىلىگى كومپوزيتسيالىق تۇرعىدان ادەمى بولعاندىقتان قازىلار القاسىنىڭ الدىندا ۇلكەن جاۋاپكەرشىلىك پەن قيىن تاڭداۋ تۇردى. جالپى, ەكولوگيالىق اعارتۋشىلىق, ەكولوگيالىق سانانى كوتەرۋ جۇمىسىنىڭ ءبىر بولىگى رەتىندە وسى بايقاۋدى تاۋەلسىزدىكتىڭ 30 جىلدىعى مەرەكەسىنە ارناپ مينيسترلىكتىڭ قولداۋىمەن ءبىرىنشى رەت ۇيىمداستىرىپ وتىرمىز. ايماقتارداعى ەكولوگيا, جانۋارلار الەمى پروبلەمالارىن وسىنداي فوتوسۋرەتتەر ارقىلى كورسەتۋدى ماقسات تۇتتىق», دەيدى National Geographic Qazaqstan جۋرنالىنىڭ باس رەداكتورى ەركىن جاقىپوۆ.
ءۇش كەزەڭنەن تۇرعان باعالاۋدان كەيىن قازىلار القاسى 4 اتالىم بويىنشا جەڭىمپازداردى انىقتادى. قاس قاعىم ءساتتى ماڭگىلىك تاريحقا اينالدىرعان الەكساندر ۆلاسيۋك Melolontha تۋىندىسىمەن توپ جارسا, بەلگىلى فوتوگراف – فارحات قابدىقايىروۆ «بابىسەك بالاپانىن تاماقتاندىرۋ» اتتى ەڭبەگىمەن كوش باسىنان كورىندى. قازاقستان پەيزاجدارى اتالىمىندا «حان ءتاڭىرى» تۋىندىسىمەن ەرنۇر ماناپحان دارا شىقسا, قازاقستان جان-جانۋارلارى اتالىمىندا پاۆەل ميحەەۆ «سوپەرنيك» اتتى فوتوسۋرەتىمەن جەڭىمپاز اتاندى.
سونداي-اق «تۋرانگا گرۋپپ» كومپانياسى اتىنان «ايۋساي» اتالىمىن «Egemen Qazaqstan» رەسپۋبليكالىق گازەتىنىڭ ءفوتوتىلشىسى, ارىپتەسىمىز ەرلان ومار يەلەندى. ىلە-الاتاۋ پاركىندەگى ايگىلى شاتقالدىڭ اتىمەن اتالعان اتالىم ۇلتتىق پاركتەردىڭ تابيعاتىن شەبەر بەينەلەگەن قاتىسۋشىلارعا ۇسىنىلادى. وتاندىق اۋەسقوي جانە كاسىبي فوتوگرافتار اراسىنداعى بايقاۋدىڭ ءار اتالىم جەڭىمپازىنا 300 مىڭ تەڭگە سىياقى تابىستالدى. تابيعات پەن جانۋارلار الەمىن ايگىلەگەن دودادا توپ جارعان فوتوسۋرەتتەردى قوسا جاريالاپ وتىرمىز.
الماتى
