الەم چەمپيوناتىنىڭ توپتىق كەزەڭدەگى سوڭعى تۋرىندا قازاقستان مەن نورۆەگيا حوككەيشىلەرىنىڭ جولى ءتۇيىسىپ, كەزدەسۋ قارسىلاستىڭ جەڭىسىمەن اياقتالدى. ءبىرىنشى كەزەڭدە كوماندالار ۇزاق ۋاقىت ءبىر-ءبىرىنىڭ قاقپاسىنان ساڭىلاۋ تابا الماي, ءبىراز ابىگەرگە ءتۇستى. دەگەنمەن 10-مينۋتتان باستاپ قارسىلاستارىن قىسپاققا العان قازاقستان قۇراماسى ءبىرىنشى كەزەڭنىڭ اياقتالۋىنا 4 مينۋت قالعاندا گول سوعا الدى. قورعاۋشى ۆيكتور سۆەدبەرگتەن تاماشا پاس العان شابۋىلشى دميتري شەۆچەنكو قاقپاشىمەن بەتپە-بەت شىعىپ, الەم چەمپيوناتىنداعى العاشقى شايباسىن سوقتى.
ەكىنشى كەزەڭدە نورۆەگيا حوككەيشىلەرى باسىمدىقتى ءوز قولدارىنا الىپ, 28-مينۋتتا تارازى باسىن تەڭەستىرىپ كەتتى. توماس ۆالكۆە ولسەن ماتياس ترەتتەنستىڭ شىعارعان پاسىنان كەيىن قازاقستان قاقپاسىنا شايبانى ءدال باعىتتادى – 1:1. ءۇشىنشى كەزەڭدى دە بەلسەندى باستاعان قارسىلاستار ويىن باستالا سالىسىمەن قاقپامىزعا ەكىنشى شايباسىن سوقتى. گول اۆتورى – ستەفان ەسپەلاند. ءبىزدىڭ كوماندادا ەسەپتى تەڭەستىرۋ بىلاي تۇرسىن, ەسەپتە العا شىعاتىن بىرنەشە مۇمكىندىك بولعانىمەن, حوككەيشىلەرىمىز ۇرىمتال ءساتتى ءتيىمدى پايدالانا المادى. نورۆەگيالىقتار «سەن سوقپاساڭ, ساعان سوعادى» دەگەن قاعيدانى بەرىك ۇستانىپ, كەزدەسۋدىڭ اياقتالۋىنا ءبىر مينۋت قالعاندا ءۇشىنشى گولىن سوعىپ, كەزدەسۋدىڭ نۇكتەسىن قويدى. قورىتىندى ەسەپ – 3:1, نورۆەگيا حوككەيشىلەرىنىڭ پايداسىنا.
