جيىنعا قازاقستان جازۋشىلار وداعى نۇر-سۇلتان قالالىق فيليالىنىڭ توراعاسى داۋلەتكەرەي كاپ ۇلى, بالالار جازۋشىلارى تولىمبەك ءابدىرايىم مەن سەرىكبول حاسان قاتىستى. قالامگەرلەر كىشكەنتاي وقىرمانداردى اتاۋلى مەرەكەمەن قۇتتىقتاي كەلە, كىتاپ وقۋ مادەنيەتىن قالىپتاستىرۋ, زاماناۋي قازاق ادەبيەتى تاقىرىبىندا ءوزارا وي الماسىپ, كوكەيدە جۇرگەن پىكىرلەرىن ورتاعا سالدى. بۇل ورايدا داۋلەتكەرەي كاپ ۇلى مادەنيەت جانە سپورت مينيسترلىگى جاريالاعان بيىلعى بالالار ادەبيەتى جىلىنداعى اتقارىلار قوماقتى ءىستىڭ العىشارتى ەكەنىن ايتا كەلە, كىتاپ وقۋدى ناسيحاتتاۋ, زياتكەرلىك الەۋەتتى ارتتىرۋ باعىتىنداعى جۇمىستاردىڭ جالعاسا بەرەتىنىن جەتكىزدى.
«قالامگەرلەر اللەياسى 2019 جىلى قىركۇيەكتە «تۇڭعىش ازيا اقىن-جازۋشىلارىنىڭ فورۋمى» قارساڭىندا ولجاس سۇلەيمەنوۆ, ۇلىقبەك ەسداۋلەت, ەسەنعالي راۋشانوۆ, مارحابات بايعۇت سىندى قازاقتىڭ كورنەكتى اقىن-جازۋشىلارىنىڭ قاتىسۋىمەن اشىلعان ەدى. نۇر-سۇلتان قالاسى اكىمدىگىنىڭ ۇيىتقى بولۋىمەن بيىل اقىن-جازۋشىلار 50-دەي كوشەت وتىرعىزدى, بۇل يگىلىكتى شارا كەلەشەكتە دە جالعاسا بەرەدى. ال مەرەكەگە وراي قالامگەرلەر كىتاپحاناسىن اشۋ جوسپارلانىپ وتىر, بۇگىنگى جيىن سول قادامنىڭ العىشارتى دەۋگە بولادى. مەرەكەدە بالالاردىڭ كىتاپقا دەگەن قىزىعۋشىلىعىن ارتتىرۋ ماقساتىندا №5 قالالىق بالالار كىتاپحاناسى مەن «فوليانت» باسپاسى بالالارعا ارنالعان كىتاپ جارمەڭكەسىن وتكىزدى. كىتاپحانا ءار جۇما سايىن اشىق اسپان استىندا جۇمىس ىستەي بەرەدى. سونداي-اق قالامگەرلەرمەن كەزدەسۋ وتكىزىپ, وقىرمانداردى تارتۋ ويىمىزدا بار. نەگىزىنەن قالامگەرلەرمەن بەتپە-بەت كەزدەسۋگە جاس وقىرمانداردى تارتا وتىرىپ, كىتاپ وقۋ مادەنيەتىن جاقسارتساق دەگەن وي. قازاق ءتىلىنىڭ مارتەبەسىن كوتەرۋ ءۇشىن بالالاردى كىتاپ وقۋعا باۋلۋ اتا-انانىڭ دا, كەز كەلگەن قالامگەردىڭ دە قايراتكەرلىك تانىتاتىن تۇسى. سوندىقتان قازاق ءتىلىنىڭ مارتەبەسىن كوتەرۋ, قازاق بالاسىنىڭ مادەنيەتىن ارتتىرۋ ءبىرىنشى كەزەكتە تۇرعان ماسەلە دەپ ەسەپتەيمىن», دەگەن داۋلەتكەرەي كاپ ۇلى قالامگەرلەردىڭ قولدان كەلگەنشە اتسالىساتىنىن جەتكىزدى.
جيىنعا نۇر-سۇلتان قالاسى ءماسليحاتىنىڭ دەپۋتاتتارى نۇرلان كوپەشوۆ, سالتانات مۇقانبەتپانقىزى, ءلاززات مۇرات-
قىزى قاتىسىپ, بالاقايلاردى مەرەكەلەرىمەن قۇتتىقتاپ, ءوز تاراپتارىنان تارتۋ-تارالعى جاسادى. «فوليانت» باسپا ءۇيى بالالار شىعارماشىلىعىنا قاتىستى باسپا تۋىندىلارىنان ارنايى كورمە ۇيىمداستىرىپ, كىتاپتار جارمەڭكەسىن وتكىزدى. سونىمەن قاتار نۇر-سۇلتان قالالىق ورتالىقتاندىرىلعان كىتاپحاناسى قورىنداعى كىتاپتار كورمەسىن كىشكەنتاي وقىرماندار نازارىنا ۇسىندى.
اتالعان ءىس-شارا بالاقايلارعا مەرەكەلىك كوڭىل كۇي سىيلاۋ ءۇشىن بايقوڭىر اۋدانى اكىمى اپپاراتى ۇيىمداستىرعان كوڭىلدى سەرگىتۋ ۋاقىتىمەن جالعاستى. سونداي-اق بالالارعا تاتتىلەر تاراتىلىپ, بەلسەندى وقۋشىلارعا اكىمدىك تاراپىنان ارنايى سىيلىقتار دا تابىس ەتىلدى. يگى شارانىڭ ءارى قاراي جالعاساتىنىنا قۋانىشتى ەكەندىكتەرىن جەتكىزگەن قالا تۇرعىندارى مەن مەرەكەلىك جيىنعا قاتىسقان بالالار دا, اتا-انالار دا ءدان ريزا.
تاعى ءبىر ايتا كەتەرلىگى, بايقوڭىر اۋدانى اكىمى اپپاراتىنىڭ باستاماسىمەن ۇيىمداستىرىلعان ءىس-شارا الداعى جاز ماۋسىمىندا ءار دەمالىس كۇندەرى جالعاسىن تاپپاق. ونداعى ماقسات – جازعى دەمالىس كەزىندە وقۋشىلاردى, ستۋدەنتتەردى جانە اۋدان تۇرعىندارىن وقۋعا تارتۋ, ۋاقىتتارىن ءتيىمدى وتكىزۋ, ساياباقتا جۇرگەن دەمالۋشىلارعا اقپارات ۇسىنۋ, سونىمەن قاتار كىتاپحاناعا تۇراقتى وقىرمان رەتىندە جازىلۋعا مۇمكىندىك جاساۋ. قالامگەرلەر اللەياسىندا اسپان استىنداعى كىتاپحانادا كوبىنە بالالارعا ارنالعان ادەبيەتتەر, ايگىلى جازۋشىلاردىڭ پوەمالارى, شىعارمالارى قويىلماق.
