سۇيىتىلعان تابيعي گازدىڭ (ستگ) الەمدىك نارىقتاعى ۇلەسى جەدەل قارقىنمەن ءوسىپ كەلە جاتقانى ءمالىم. بولجامعا سايكەس, 2035 جىلعا قاراي ستگ-نى تۇتىنۋ مەن ونىڭ ءوندىرىس كولەمى ەكى ەسەگە وسەدى. ەلىمىزدەگى العاشقى كريوگەندى جانارماي قۇيۋ ستانساسىنىڭ اشىلۋى وڭىردەگى كولىك جۇك تاسىمالىنىڭ دامۋىنا جاڭا سەرپىن بەرەدى دەپ كۇتىلۋدە. سەبەبى قازىر الەم بويىنشا تاۋارلار مەن جۇكتەردى جەتكىزۋدىڭ جىلدام ءارى ارزان قىزمەتتەرى سۇرانىسقا يە. مامانداردىڭ ايتۋىنشا, بۇل حالىقارالىق جوبا كولىك ينفراقۇرىلىمىن دامىتىپ, جىبەك جولىنىڭ تامىرىنا قايتا قان جۇگىرتەدى. جاڭا نىسان سۇيىتىلعان تابيعي گازدى پايدالاناتىن كولىكتەرگە ارنالعان. اتالعان ءونىم – جانارمايدىڭ قاۋىپسىز جانە ەكولوگيالىق تازا ءتۇرى, ونىڭ قۇنى دا بەنزيننەن الدەقايدا ارزان.
مودۋلدىك كريوگەندى جانارماي قۇيۋ ستانساسى سورعىلارمەن جاراقتالعان ستگ بلوگىنان, تىعىزدالعان گاز بلوگىنان جانە سىيىمدىلىعى 17 مىڭ توننانى قۇرايتىن كريوگەندى تانك-كونتەينەرى مەن باسقارۋ بلوگىنان تۇرادى. ستانسانىڭ قۋاتتىلىعى ساعاتىنا 12 جۇك كولىگىنە دەيىن قىزمەت كورسەتۋگە قاۋقارلى. ونىڭ ىسكە قوسىلۋى جۇك تاسىمالىنىڭ ۋاقىتىن ەكى ەسەگە قىسقارتۋعا مۇمكىندىك بەرەدى.
«گازدى سۇيىلتۋ, تاسىمالداۋ جانە ساقتاۋ يندۋسترياسى قارقىندى دامىپ كەلەدى. جانارمايدىڭ بۇل ءتۇرى – ەنەرگياعا قانىق جانە نارىقتا كەڭىنەن تارالعان وتىن. ونى قولدانۋدىڭ ارتىقشىلىعى كوپ. باعاسىندا دا ايىرماشىلىق ۇلكەن, تابيعي گاز 50%-عا ارزان», دەدى «گازپروم ستگ تەحنولوگيالارى» جشق ديرەكتورلار كەڭەسىنىڭ توراعاسى الەكسەي كاحيدزە.
اتالعان جانارماي ەكولوگيالىق تيىمدىلىگى جاعىنان عانا ەمەس, جۇمىس ونىمدىلىگىن ارتتىرۋدا دا سەپتىگى مول, دەيدى ماماندار.
«بيىل بىرقاتار باسىمدىققا يە 3 مىڭعا جۋىق تەحنيكانى اكەلۋدى جوسپارلاپ وتىرمىز. سۇيىلتۋ كەزىندە گازدى تازارتۋدىڭ وزىق ءتاسىلى قولدانىلادى, ول ديزەل وتىنىمەن سالىستىرعاندا زياندى زاتتاردى 40%-عا دەيىن ازايتادى. بۇدان بولەك, قوزعالتقىشتىڭ جۇمىس رەسۋرسىن 15%-عا ارتتىرادى», دەدى «گەفەست» جشق كوممەرتسيالىق ديرەكتورى الەكساندر توۆپەكو.
