ءبىرىنشى ماسەلە بويىنشا بايانداما جاساعان دەنساۋلىق ساقتاۋ ءمينيسترى الەكسەي تسويدىڭ ايتۋىنشا, بۇگىندە الەمدە كۆي-ءدىڭ 171 ملن-نان استام جاعدايى تىركەلگەن, تاۋلىگىنە 392 مىڭنان استام جاعداي ەسەپكە الىنۋدا. 3,5 ملن-نان استام ادام قايتىس بولدى. ءولىم-ءجىتىم كورسەتكىشى – 2,1%. الەمدىك رەيتينگكە سايكەس قازاقستان 221 ەلدىڭ ىشىندە سىرقاتتانۋشىلىق كورسەتكىشى بويىنشا 104-ورىندا, ال ءولىم كورسەتكىشى بويىنشا سوڭعى ءتورت اپتادا قازاقستاننىڭ پوزيتسياسى 5 بىرلىككە جاقساردى – 107-ورىننان 112-ورىنعا اۋىستى.
مينيستر حابارلاعانداي, قازاقستاندا 1 ماۋسىمعا CوVID-19-دىڭ وڭ ناتيجەسىمەن 387 672 ناۋقاس جانە كۆي-ءدىڭ تەرىس ناتيجەسىمەن 55 263 جاعداي تىركەلدى. قازاقستان رەسپۋبليكاسى «سارى ايماقتا» تۇر. جالپى, رەسپۋبليكادا كوروناۆيرۋس ينفەكتسياسىن جۇقتىرۋ كورسەتكىشى تومەندەپ كەلەدى. سوڭعى اپتادا كۆي جاعدايلارىنىڭ سانى 15 مىڭنان 12 مىڭعا دەيىن نەمەسە وتكەن ەكى اپتامەن سالىستىرعاندا 21%-عا تومەندەدى. سوڭعى ايدا سىرقاتتانۋ 1,6 ەسە ازايدى.
وڭىرلەر بولىنىسىندە توسەك-ورىندارمەن قامتىلۋعا جۇرگىزىلگەن كۇن سايىنعى مونيتورينگكە سايكەس بيىل 1 ماۋسىمداعى جاعداي بويىنشا رەسپۋبليكادا ينفەكتسيالىق توسەكتىك ورىندارمەن قامتۋ – 28% (9 984 توسەكتىك ورىن), رەانيماتسيالىق توسەكتىك ورىندارمەن قامتۋ 24%-دى (777 توسەكتىك ورىن) قۇرادى. سوڭعى 2 اپتادا ەم قابىلداپ جاتقان ناۋقاستار سانىنىڭ 12 مىڭعا ازايعانى بايقالادى.
حالىقتى كۆي-گە قارسى ۆاكتسينالاۋ جالعاسۋدا. «بۇگىنگە دەيىن ۆاكتسينانىڭ 3,2 ملن دوزاسى پايدالانىلدى, ونىڭ ءبىرىنشى كومپونەنتى بويىنشا 2 131 519 ادام ەگىلدى, بۇل ەگىلۋگە جوسپارلانعان حالىقتىڭ 21%-ىن قۇرايدى. ەكىنشى كومپونەنتپەن
1 074 954 ادام قامتىلدى.
بۇگىندە ەگۋ پۋنكتتەرىندە ۆاكتسينانىڭ سانى جەتكىلىكتى, ءبىرىنشى كومپونەنتتەن 330 مىڭ دوزا, ەكىنشى كومپونەنتتەن 811 مىڭ دوزا ۆاكتسينا بار. ماۋسىم ايىندا كۆي ۆاكتسيناسىنىڭ 2 ملن-عا جۋىق قوسارلى دوزاسى جەتكىزىلەدى دەپ كۇتىلۋدە, CoronaVac ۆاكتسيناسىنىڭ 500 مىڭ دوزاسى الىندى. وسىلايشا, قازاقستاندا 4 ۆاكتسينا قولجەتىمدى بولادى», دەدى ول.
Ashyq جوباسىن ماسشتابتاۋ بۇكىل ەل بويىنشا جۇرگىزىلىپ جاتىر. جوبا قاتىسۋشىلارىنىڭ سانى 8 مىڭنان استى جانە سوڭعى ەكى اپتادا 2 مىڭعا ءوستى. پايدالانۋشىلاردىڭ سانى 2 اپتادا 1,4 ملن-نان 2 ملن-عا دەيىن ارتتى. سونىمەن قاتار Ashyq ەنگىزىلگەننەن باستاپ پتر تەستىنىڭ وڭ ناتيجەسى بار 3 556 ناۋقاس جانە اۋرۋدى جۇقتىرعاندارمەن بايلانىستا بولعان 3 012 ادام انىقتالدى. «بۇل ستاتيستيكا, وكىنىشكە قاراي, كەيبىر ازاماتتار ۇيدە وقشاۋلانۋ رەجىمىن ساقتامايتىنىن, حالىق كوپ جينالاتىن ورىندارعا باراتىنىن, وسىلايشا باسقا كەلۋشىلەر مەن ۇشاق جولاۋشىلارىنا اۋرۋ جۇقتىرۋ قاۋپىن تۋدىراتىنىن كورسەتىپ وتىر. جوبانى ەنگىزگەننەن وڭ ناتيجەسىن ەسكەرە وتىرىپ, «اتامەكەن» ۇكپ-مەن بىرىگىپ, جوبانىڭ كوشباسشىلارىن ماداقتاۋ كريتەريلەرى ازىرلەندى», دەدى مينيستر.
جوبانىڭ كوشباسشىلارى قىزمەت تۇرىنە بايلانىستى وبەكتىدە ەكى اپتا بويى تىركەلۋ سانى بويىنشا انىقتالادى. بۇل ءتاسىل استانانىڭ جانە رەسپۋبليكالىق ماڭىزى بار قالالاردىڭ ەرەكشەلىگىن ەسكەرەدى. Ashyq جوباسىنىڭ كوشباسشىسى مارتەبەسىن العان قاتىسۋشىلار جۇمىس ۋاقىتى جانە شارتى بويىنشا قوسىمشا جەڭىلدىكتەر الادى. سونىمەن قاتار Ashyq جوباسىنا تۋريستىك سالا وبەكتىلەرىن, وقىتۋ ورتالىقتارىن, بالالاردى ساۋىقتىرۋ ۇيىمدارىن قوسۋ ماسەلەسى قاراستىرىلۋدا. «بۇگىندە رەسپۋبليكادا كوروناۆيرۋس ينفەكتسياسى بويىنشا ەپيدەميالىق جاعدايدىڭ تۇراقتالۋى, وڭىرلەردىڭ بىرتىندەپ «قىزىل ايماقتان» شىعۋى بايقالىپ جاتىر, بولجام بويىنشا سىرقاتتانۋ شىنايى ستسەناريدە كورىنىس بەرۋدە», دەپ تۇيىندەدى ا.تسوي.
سانيتارلىق-ەپيدەميالىق جاعداي تۇزەلىپ كەلەدى
ماسەلەنى ۇكىمەت باسشىسى اسقار مامين قورىتىندىلادى. قازاقستاندا سانيتارلىق-ەپيدەميالىق جاعدايدىڭ جاقسارعانى بايقالادى. COVID-19 سىرقاتتانۋ دەڭگەيى 20%-عا, ۆيرۋستىڭ رەپرودۋكتيۆتىك يندەكسى 0,86-عا دەيىن, ينفەكتسيالىق توسەكتىك ورىنداردىڭ قامتىلۋى 28 %-عا, رەانيماتسيالىق توسەكتىك ورىندار 24 %-عا دەيىن تومەندەدى. 3 ءوڭىر «قىزىل ايماقتا» تۇر: نۇر-سۇلتان قالاسى, اقمولا جانە قاراعاندى وبلىستارى. «سارى ايماقتا» 6 ءوڭىر: الماتى قالاسى, اتىراۋ, پاۆلودار, باتىس قازاقستان, قوستاناي, سولتۇستىك قازاقستان وبلىستارى. قالعان 8 ءوڭىر «جاسىل ايماقتا».
ماۋسىم ايىندا ۆاكتسينانىڭ ءبىرىنشى كومپونەنتىنىڭ 2 ملن دوزاسى مەن ەكىنشى كومپونەنتتىڭ 2 ملن دوزاسى قولجەتىمدى بولادى. ۇكىمەت باسشىسى دەنساۋلىق ساقتاۋ مينيسترلىگى مەن اكىمدىكتەرگە ماۋسىم ايىندا حالىقتى ۆاكتسينالاۋ قارقىنىن ەداۋىر ارتتىرۋدى تاپسىردى. دەنساۋلىق ساقتاۋ مينيسترلىگىنە تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىمەن بىرلەسىپ, Ashyq ءموبيلدى قوسىمشاسىنىڭ ۇزدىكسىز جۇمىس ىستەۋىن قامتاماسىز ەتۋ, ونىڭ قىزمەت كورسەتۋ سەكتورىندا قولدانىلۋىن ودان ءارى كەڭەيتۋ بويىنشا شارالار قابىلداۋ تاپسىرىلدى.
تۇركىستان وبلىسىنىڭ ەكونوميكاسى 5 جىلدا
1,5 ەسەگە وسەدى
ۇكىمەت وتىرىسىندا تۇركىستان وبلىسىن الەۋمەتتىك-ەكونوميكالىق دامىتۋدىڭ 2021-2025 جىلدارعا ارنالعان كەشەندى جوسپارى قارالدى. ۇلتتىق ەكونوميكا ءمينيسترى اسەت ەرعاليەۆ, يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ, ەنەرگەتيكا ءمينيسترى نۇرلان نوعاەۆ, ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ, دەنساۋلىق ساقتاۋ ءمينيسترى الەكسەي تسوي, ءبىلىم جانە عىلىم ءمينيسترى اسحات ايماعامبەتوۆ, مادەنيەت جانە سپورت ءمينيسترى اقتوتى رايىمقۇلوۆا, اۋىل شارۋاشىلىعى ءبىرىنشى ۆيتسە-ءمينيسترى ايداربەك ساپاروۆ, تۇركىستان وبلىسىنىڭ اكىمى ومىرزاق شوكەەۆ بايانداما جاسادى.
ۇكىمەت باسشىسى تۇركىستان وبلىسىن الەۋمەتتىك-ەكونوميكالىق دامىتۋدىڭ 2021-2025 جىلدارعا ارنالعان كەشەندى جوسپارىن ىسكە اسىرۋ وبلىستىڭ دامۋىنا جاڭا سەرپىن بەرىپ, حالىقتىڭ تۇرمىس ساپاسى مەن ءال-اۋقاتىن ارتتىرۋعا ىقپال ەتەتىنىن اتاپ ءوتتى. حالىقتى سۋمەن جابدىقتاۋ قىزمەتتەرىمەن 100%, گازبەن جابدىقتاۋ قىزمەتتەرىمەن 85,4% قامتاماسىز ەتىلەتىن بولادى. اوك سالاسىندا بەس جىل ىشىندە 100-گە جۋىق جوبانى ىسكە اسىرۋ جوسپارلانىپ وتىر, بۇل جالپى ءونىم كولەمىن 729 ملرد-تان 1,3 ترلن تەڭگەگە دەيىن ارتتىرۋعا جانە ەڭبەك ونىمدىلىگىن 2,5 ەسە كوبەيتۋگە مۇمكىندىك بەرەدى. بەس جىل ىشىندە 5 ملن شارشى مەترگە جۋىق تۇرعىن ءۇي, 130 جاڭا مەكتەپ, 10 دەنساۋلىق ساقتاۋ نىسانى, رۋحاني-مادەني ورتالىق جانە باسقا دا الەۋمەتتىك سالا نىساندارىن سالۋ جوسپارلانعان.
«كولىك جانە ينجەنەرلىك-كوممۋنيكاتسيالىق ينفراقۇرىلىمدى دامىتۋ جوبالارى ىسكە اسىرىلاتىن بولادى. تۇركىستان, شىمكەنت جانە تاشكەنت قالالارىن بايلانىستىراتىن جوعارى جىلدامدىقتى تەمىر جول ماگيسترالىن سالۋ, تۇركىستاندا جاڭا تەمىر جول جانە اۆتو ۆوكزالدار سالۋ جوسپارلانۋدا. اتالعان شارالار جالپى وڭىردە ونەركاسىپ كولەمىن 35%-عا, ەڭبەك ونىمدىلىگىن 52%-عا ارتتىرۋعا جول اشادى. تۋريستەر اعىنى جىلىنا 1,2 ملن-نان 2,5 ملن ادامعا دەيىن ارتادى. كەمىندە 40 مىڭ جاڭا جۇمىس ورنى قۇرىلادى. كەشەندى جوسپاردى ىسكە اسىرۋدىڭ 5 جىلى ىشىندە 3,6 ترلن تەڭگەگە 142 ءىس-شارا ورىندالادى. تۇركىستان وبلىسىنىڭ ەكونوميكاسى 5 جىلدا 1,5 ەسە وسەدى», دەدى ا.مامين.
پرەمەر-مينيستر تۇركىستان وبلىسىن الەۋمەتتىك-ەكونوميكالىق دامىتۋدىڭ 2021-2025 جىلدارعا ارنالعان بەكىتىلگەن كەشەندى جوسپارى ءىس-شارالارىنىڭ ۋاقتىلى ءارى ساپالى ورىندالۋىن قامتاماسىز ەتۋدى تاپسىردى.
بارلىق نازار –
بالالارعا
ۇكىمەت وتىرىسىندا بالالاردىڭ قۇقىقتارىن قورعاۋ جانە قاۋىپسىزدىگىن قامتاماسىز ەتۋ جونىندەگى شارالار قارالدى. ءبىلىم جانە عىلىم ءمينيسترى اسحات ايماعامبەتوۆ, دەنساۋلىق ساقتاۋ ءمينيسترى الەكسەي تسوي, ىشكى ىستەر ءمينيسترى ەرلان تۇرعىمباەۆ, سونداي-اق يۋنيسەف وكىلدىگىنىڭ باسشىسى ارتۋر ۆان ديزەن بايانداما جاسادى.
ءبىلىم جانە عىلىم ءمينيسترى اسحات ايماعامبەتوۆتىڭ ايتۋىنشا, قازاقستاندا مەملەكەت باسشىسىنىڭ تاپسىرماسى بويىنشا بالالاردىڭ قۇقىقتارىن قورعاۋ سالاسىندا 22 نورماتيۆتىك-قۇقىقتىق اكت (2020 جىلى), 83 زاڭنامالىق نورما (2019-2020 جىلدارى) قابىلداندى.
بۇگىندە رەسپۋبليكادا 23 063 جەتىم جانە اتا-انا قامقورلىعىنسىز قالعان بالالار بار, ولاردىڭ 18 مىڭنان استامى نەمەسە 81,5%-ى وتباسىندا تۇرادى. ا.ايماعامبەتوۆ اتاپ وتكەندەي, سوڭعى 10 جىلدا رەسپۋبليكاداعى بالالار ۇيلەرىنىڭ سانى 2 ەسەگە قىسقاردى (10 جىلدا – 114 بىرلىككە, 3 جىلدا – 42 بىرلىككە.) سونداي-اق بالالار ۇيلەرى كونتينگەنتىنىڭ 3 ەسە قىسقارعانى بايقالادى. قازىرگى ۋاقىتتا جەتىم بالالارعا ارنالعان 96 ۇيىمدا بارلىعى 4 مىڭنان استام تاربيەلەنۋشى بار. ول ءۇشىن كەلەسى شارالار قابىلداندى: 54 «اسىراپ الۋشى اتا-انالار مەكتەبى» ينستيتۋتى اشىلدى; اشىقتىقتى قامتاماسىز ەتۋ ماقساتىندا جەتىم بالالاردىڭ رەسپۋبليكالىق دەرەكتەر بازاسى قۇرىلدى; وتباسىلىق قۇرىلىستىڭ جاڭا فورمالارى ەنگىزىلدى (قابىلداۋشى جانە قوناق ەتۋشى وتباسىلار); بالالار ۇيلەرىندە قامقورشىلىق كەڭەستەر قۇرىلدى; 18 بالالار ءۇيى بالالاردى قولداۋ ورتالىقتارىنا اينالدى.
ەلىمىزدە ەرەكشە قاجەتتىلىكتەرى بار بالالارعا جاعداي جاسالۋدا. 2010 جىلدان باستاپ ينكليۋزيۆتى ءبىلىم بەرۋدى دامىتۋ بويىنشا جوسپارلى جۇمىس جۇرگىزىلۋدە, ونىڭ نەگىزگى قاعيداتى – ءتيىستى جاعدايلار جاسالعان كەزدە جالپى ءبىلىم بەرۋ ورتاسىندا دەنى ساۋ قۇرداستارىمەن بىرلەسىپ وقىتۋعا ەرەكشە ءبىلىم بەرۋ قاجەتتىلىكتەرى بار بالانىڭ قۇقىعىن ساقتاۋ. مەكتەپ جاسىنداعى ەرەكشە ءبىلىم بەرىلۋىنە قاجەتتىلىگى بار بالالاردىڭ سانى 110 818-ءدى قۇرايدى, ونىڭ ىشىندە 83 916 (75,7%) وقۋمەن قامتىلعان. «جان باسىنا قارجىلاندىرۋ تەتىگىن ەنگىزۋدىڭ ناتيجەسىندە بيىلدان باستاپ جالپى ءبىلىم بەرەتىن مەكتەپتە وقيتىن ەرەكشە ءبىلىم بەرۋ قاجەتتىلىگى بار بالانى قارجىلاندىرۋ ارتادى, بۇل شامامەن 400 مىڭ تەڭگەنى قۇرايدى. سونداي-اق بۇل وزگەرىس كوپتەگەن ەرەكشە بالانى ينكليۋزيۆتى ءبىلىم بەرۋمەن قامتۋعا مۇمكىندىك بەرەدى», دەدى ا.ايماعامبەتوۆ.
ءبىلىم ءمينيسترى بالاباقشالار مەن مەكتەپتەردىڭ 100%-ى بەينەباقىلاۋمەن قامتاماسىز ەتىلگەنىن ايتتى. الايدا ولاردىڭ 21%-ى تالاپتارعا سايكەس كەلمەيدى.
دەموگرافيالىق كورسەتكىشتەر جاقساردى
دەنساۋلىق ساقتاۋ ءمينيسترى الەكسەي تسوي قازاقستاندا دەموگرافيالىق كورسەتكىشتەردىڭ وڭ سەرپىنى بايقالاتىنىن مالىمدەدى. «ماسەلەن, 2020 جىل بالا تۋدىڭ 4,7%-عا كۇرت وسۋىمەن سيپاتتالادى, مۇنداي ءوسىم سوڭعى رەت 1987 جىلى بولىپ ەدى» دەپ اتاپ ءوتتى دسم باسشىسى. تۋ دەڭگەيىنىڭ جوعارى بولۋى اياسىندا, پاندەميا جانە دەنساۋلىق ساقتاۋ جۇيەسىنىڭ شامادان تىس جۇكتەلۋى جاعدايىنداعى قاۋىپ-قاتەرلەرگە قاراماستان, نارەستەلەر ءولىم-ءجىتىمىنىڭ كورسەتكىشىن 7,1%-عا تومەندەتۋگە قول جەتكىزىلدى. بالالار ءولىمىنىڭ كورسەتكىشى 12,1%-عا تومەندەدى.
2017 جىلى مەكتەپتەردە بالالاردىڭ دەنساۋلىعىن قورعاۋ ءۇشىن ءبىلىم بەرۋ جۇيەسىنەن 6 مىڭنان استام مەديتسينالىق پۋنكت قابىلداندى. مەكتەپ مەديتسيناسىن قارجىلاندىرۋ 2,6 ەسەگە ارتتى. ءمامس شەڭبەرىندە 2019 جىلدان باستاپ وقۋشىعا ارنالعان قوسىمشا جان باسىنا شاققانداعى نورماتيۆ ەنگىزىلدى, ول قازىرگى ۋاقىتتا 1,7 ەسەگە ۇلعايدى. مەديتسينالىق كابينەتتەردىڭ جاراقتاندىرىلۋى 2017 جىلعى 52%-دان 2020 جىلى 70%-عا دەيىن جاقساردى. وسى كەزەڭدە دارىگەرلەرمەن قامتىلۋ 16%-عا ارتتى.
ىشكى ىستەر ءمينيسترى ەرلان تۇرعىمباەۆ ءوز سوزىندە مەكتەپتەردە قاۋىپسىزدىكتى قامتاماسىز ەتۋ ماسەلەسىنە باسا نازار اۋداردى. زورلاۋ جانە سەكسۋالدىق سيپاتتاعى زورلىق-زومبىلىق ارەكەتتەرى سياقتى قىلمىستاردىڭ تۇرلەرى اۋىر قىلمىستار ساناتىنا اۋىستىرىلدى, وسىلايشا تاراپتاردى تاتۋلاستىرۋ مۇمكىندىگى الىنىپ تاستالدى. جالپى, قابىلدانعان شارالاردىڭ ناتيجەسىندە سوڭعى 5 جىلدا كامەلەتكە تولماعاندارعا قاتىستى قىلمىستار سانى 30%-عا قىسقاردى.
سونىمەن قاتار بىلتىر باقىلاۋسىزدىقتىڭ سالدارىنان تەرەزەدەن 108 بالا قۇلاپ, 18 بالا كوز جۇمدى. جاعدايدى جاقسارتۋ ءۇشىن كەشەندى ءتاسىل جانە بارلىق مۇددەلى ورگاندار مەن جۇرتشىلىقتىڭ قاتىسۋى قاجەت, دەپ سانايدى ءىىم باسشىسى.
بالالار يگىلىگىنىڭ يندەكسى
2022 جىلى ەنگىزىلەدى
2020 جىلى قازاقستاندا بالالاردىڭ قۇقىقتارىن قورعاۋ سالاسىندا 22 نورماتيۆتىك-قۇقىقتىق اكت ازىرلەنىپ, قابىلداندى. بالا قۇقىقتارىن قورعاۋدى كۇشەيتۋ, تۇرمىستىق زورلىق-زومبىلىققا قارسى ءىس-قيمىل جانە جاسوسپىرىمدەر اراسىندا سۋيتسيد ماسەلەلەرىن شەشۋ جونىندەگى 2020-2023 جىلدارعا ارنالعان جول كارتاسى بەكىتىلدى. تەرروريستىك ارەكەتتەن زارداپ شەككەن بالالاردى الەۋمەتتىك وڭالتۋ قاعيدالارى مەن مەرزىمدەرى قابىلداندى. 2022 جىلى بالالاردىڭ قاۋىپسىزدىگىن, دەنساۋلىعىن, ءبىلىم الۋىن, ماتەريالدىق ءال-اۋقاتىن, الەۋمەتتەنۋىن قامتيتىن بالالار يگىلىگىنىڭ قازاقستاندىق يندەكسىن ەنگىزۋ جوسپارلانۋدا. وسى يندەكستىڭ كومەگىمەن بالالاردىڭ جاعدايىن جاقسارتۋ بويىنشا مەملەكەتتىك ورگاندار جۇمىسىنىڭ ناتيجەلىلىگى قاداعالاناتىن بولادى.
ماسەلەنى قورىتىندىلاعان ۇكىمەت باسشىسى اسقار مامين كوشەدە, ءبىلىم بەرۋ ۇيىمدارىندا, دەمالىس كەزىندە بالالاردىڭ قاۋىپسىزدىگىن قامتاماسىز ەتۋدىڭ ماڭىزدىلىعىن اتاپ ءوتتى. وسىعان بايلانىستى ا.مامين ەكى اپتا ىشىندە ءبىلىم بەرۋ جانە بوس ۋاقىتتى وتكىزۋ سالاسىنىڭ نىساندارىن ءتيىستى قاۋىپسىزدىك ينفراقۇرىلىمىمەن قامتاماسىز ەتۋ جونىندەگى جول كارتاسىن دايىنداۋدى تاپسىردى. «بەينەباقىلاۋ جۇيەلەرى مەن ونىڭ پوليتسيانىڭ جەدەل باسقارۋ ورتالىقتارىمەن ينتەگراتسيالانۋىنا, «دابىل تۇيمەسىنىڭ» بولۋىنا جانە شۇعىل ارەكەت ەتۋگە ەرەكشە نازار اۋدارۋ كەرەك. بارلىق ءىس-شارا وقۋ جىلى باستالعانعا دەيىن اياقتالۋى ءتيىس», دەدى ا.مامين.
دەنساۋلىق ساقتاۋ مينيسترلىگىنە, اكىمدىكتەرگە اۋرۋلاردىڭ الدىن الۋ جانە ەرتە دياگنوستيكالاۋ, وڭالتۋ, اۋرۋدى بالا جاستان باقىلاۋ بويىنشا شارالار قابىلداۋ, مەكتەپ مەديتسيناسىن, ەرتە دامۋ جانە سكرينينگ كابينەتتەرىنىڭ, بالالار ۇيلەرىنىڭ, بالالار ستاتسيونارلارى مەن ەمحانالارىنىڭ ماتەريالدىق-تەحنيكالىق بازاسىن جەتىلدىرۋ تاپسىرىلدى.
ۇكىمەت باسشىسى اكىمدىكتەرگە سپورتپەن اينالىساتىن بالالاردىڭ سانىن ارتتىرۋ بويىنشا شارالار قابىلداۋدى جۇكتەدى.
