ىستامبۇلداعى قوجا احمەت ياسساۋي اتىنداعى ورتالىقتا وتكەن جيىنعا تۇركيا قازاقتارىنىڭ اقساقالدارى مەن بەلدى وكىلدەرى قاتىستى. جيىندا ءسوز سويلەگەن قازاقستاننىڭ ىستامبۇلداعى باس كونسۋلى ءالىم بايەل ادىلەتتىلىك پەن ادامگەرشىلىك ءۇشىن جانە ۇلتتىق سانانى بەكىتۋ ماقساتىندا قازاق حالقىنىڭ باسىنان وتكەن زۇلماتتىڭ تولىقتاي زەردەلەنىپ, ءتيىستى ساياسي جانە قۇقىقتىق باعاسىن الۋ قاجەتتىگىن ايتتى.
مارقۇمداردىڭ رۋحىنا قۇران باعىشتالىپ, دۇعا وقىلدى. زۇلمات جىلدارىندا ميلليونداعان قازاقتىڭ اشارشىلىقتان كوز جۇمعانى, اتاجۇرتتان سىرتقا كوشىپ كەتكەنى, ساياسي رەپرەسسيالارعا ۇشىراعانى بەلگىلى. ۇلتتىڭ شوقتىعى بيىك كوش باستار ازاماتتارىنىڭ قاندىقول جۇيە تاراپىنان قىرعىنعا ۇشىراۋى – ءوز الدىنا ۇلكەن قاسىرەت.
بۇدان بولەك, سول كەزەڭدە قازاق جەرىنە تۇتاس حالىقتاردىڭ جەر اۋدارىلعانى بەلگىلى. زورلىق-زوبالاڭنان ەسىن جيا الماي جاتقانىنا قاراماستان, قازاق حالقى سول كەزدە ءوز دالاسىنا ايدالعان بارشا ۇلىستاردى باۋىرىنا باستى.
