بيىلعى دوپ دوداسىندا نۇر-سۇلتاننىڭ «استانا», قوستانايدىڭ «توبىل» جانە قاراعاندىنىڭ «شاحتەر» كلۋبتارى باق سىنايدى. ولار ءتۋرنيردى ىرىكتەۋ سايىستارىنان باستايدى. بۇل كوماندالاردىڭ ارقايسىسى كەلەسى كەزەڭگە شىققان سايىن 100 000 ەۆرودان الىپ وتىرادى. ەگەر العاشقى سىناقتان سۇرىنگەن جاعدايدا وتەماقى رەتىندە 150 000 ەۆرو تولەۋ جاعى دا قاراستىرىلعان. سول سەكىلدى ەكىنشى كەزەڭدە جەڭىلگەندەرگە 350 000 جانە ءۇشىنشى راۋندتا ۇتىلعاندارعا 550 000 ەۆرودان بەرىلەدى. پلەي-وفف كەزەڭىندە سۇرىنگەندەردىڭ ەسەپشوتىنا بىردەن 750 000 ەۆرو كولەمىندە قاراجات اۋدارىلادى. ال توپتىق تۋرنيردە كۇش سىناسۋ قۇرمەتىنە يە بولعان كوماندالاردىڭ ماتەريالدىق جاعدايلارى ەداۋىر جاقسارا تۇسەدى.
ەستەرىڭىزگە سالا كەتەيىك, بيىلعى جىلى تۇساۋى كەسىلگەلى وتىرعان كونفەرەنتسيا ليگاسىندا 184 كوماندا ونەر كورسەتەدى. سولاردىڭ اراسىنان ىرىكتەلىپ شىققان 32 كوماندا توپتىق تۋرنيردە كۇش سىناسادى. ودان كەيىن 1/8 فينال, شيرەك فينال, جارتىلاي فينال جانە فينالدىق سايىستاردى تاماشالايمىز. جارىس جەڭىمپازى 2022 جىلدىڭ 25 مامىرىندا تيرانادا انىقتالادى.
