ەكىباستۇزدىق جاس تالاپكەر ءمادينا ءتۇسىپوۆا سۋرەت الەمىنىڭ ەسىگىن ويدا-جوقتا وسىلاي اشتى. 9-سىنىپتان كەيىن كوللەدجگە ءتۇسىپ, مۋزىكالىق دارىنىن ودان ءارى شىڭدايمىن دەپ جۇرگەن شاقتا بويدا جاسىرىلعان جاڭا قابىلەتى بۋىرقانىپ سىرتقا شىقتى.
ماي شامنىڭ جارىعىمەن قاراكولەڭكەدە سالعان سۋرەتى ايگىلى «ماداگاسكار» مۋلتفيلمىندەگى ءتورت كەيىپكەر بولاتىن. ءتاپ-ءتاۋىر شىققان سەكىلدى. سۋرەتتى كورگەن سايىن «مىنانى مەن سالدىم با؟» دەپ تاڭدانىپ قويادى. اكە-شەشەسىنە كورسەتىپ ەدى, ولار دا اڭ-تاڭ. ءمادينانىڭ مۇنداي قابىلەتى بارىن بۇرىن بايقاماپتى. تۇڭعىش بالانىڭ الداعى تاعدىرى دا سول ءتۇنى شەشىلدى.
– مۋزىكانىڭ وقۋىن قويا تۇر, – دەدى اكەسى.
– سەنەن جاقسى ديزاينەر شىعادى! – دەپ كوتەرمەلەپ قويدى شەشەسى.
اقىرى ەكىباستۇزدىڭ گۋمانيتارلىق-تەحنيكالىق كوللەدجىن تاڭدادى. بۇيىرتسا «ديزاين جانە سۋرەت» ماماندىعىن مەڭگەرىپ شىقپاق. الايدا وقۋ وڭايعا سوقپادى. بىرىنشىدەن, وقۋ ورىسشا ەكەن. قالاداعى قىزدار گيمنازياسىندا ءتالىم العان ءمادينا, ورىسشاعا جۇيرىك بولسا دا, سالاداعى تەرميندەردى ءتۇسىنىپ, قابىلداۋعا كەلگەندە قاتتى قينالاتىن. ەكىنشىدەن, جاڭادان تۇسكەن ستۋدەنتتەردىڭ بارلىعى دەرلىك وقۋشى كەزىنەن قالاداعى كوركەمسۋرەت مەكتەپتەرىنە بارىپ, ءتالىم العاندار. ەڭ ناشارى ءمادينا بولىپ شىقتى. بۇل سۋرەت سالۋدىڭ قاراپايىم تەحنيكالارىنىڭ ءوزىن بىلمەيدى ەكەن. نامىسقا تىرىسىپ, تەر توگۋگە تۋرا كەلدى.
– ءا دەگەندە بەلسەندىلىك تانىتىپ, توپتىڭ «ستاروستاسى» اتانعان ەدىم. سونىم دۇرىس بولعان ەكەن. ويتكەنى ءبىز وقيتىن بولمەنىڭ كىلتى ۇنەمى مەندە جۇرەدى. ساباقتان كەيىن قالىپ, شەبەرلىگىڭدى شىڭدايتىن ورىن بار. شىق, كىلتتى تاپسىر دەپ ەشكىم تىقاقتامايدى. ءسويتىپ تۇسكە دەيىن ساباققا قاتىسىپ, تۇستەن كەيىن بىرگە وقيتىن ستۋدەنتتەردەن بايقاپ قالعان ارتىقشىلىقتاردى ۇيرەنۋگە تىرىستىم. كەش تۇسە قايتاتىن كۇندەرىم كوپ ەدى. ءدال وسى جاعداي كوللەدجدى تامامداعانشا جالعاستى, – دەيدى ول.
كوللەدجدەن كەيىن بىردەن پاۆلودار پەداگوگيكالىق ۋنيۆەرسيتەتىنە وقۋعا ءتۇستى. بيىل بىتىرمەك. ەندى ول كوركەمسۋرەت ءپانىنىڭ مۇعالىمى بولماق. الداعى جوسپارىن دا وسى سالامەن بايلانىستىرىپ وتىر. شاكىرت تاربيەلەپ, جەكە ورتالىعىن اشقىسى كەلەدى.
جالپى, ءمادينانىڭ ونەرىن كوپتەن بەرى باقىلاپ ءجۇرمىز. كوپشىلىك ونى «سۋرەتتى تەرىس سالاتىن قىز» دەپ تە اتايدى. بۇل قابىلەتىن وتاندىق ارنالاردىڭ تىكەلەي ەفيرىندە كورەرمەن قاۋىمعا تالاي مارتە كورسەتتى دە.
– 2017 جىلى «ەكىباستۇز ارۋى» بايقاۋىندا توپ جاردىم. بۇعان بۇرىن دا ەكى مارتە قاتىسقان ەدىم. جولىم بولمادى. ەكى رەتتە دە مارتەبەلى قازىلاردى مۋزىكالىق قابىلەتىممەن تاڭعالدىرعىم كەلگەن. الايدا بۇدان ەشتەڭە شىقپادى. ونىڭ ۇستىنە قاتىسۋشىلاردىڭ دەنى ءان ايتۋ, اسپاپتا ويناۋ, پوەزيا وقۋ سەكىلدى ونەر تۇرلەرىن ۇسىنادى ەكەن. ال مۇنىمەن قازىر ەشكىمدى تاڭداندىرا المايسىڭ. ءۇشىنشى مارتە قاتىسقاندا ەرەكشە ءبىر دۇنيە جاساۋدى كوزدەدىم. ءسويتىپ ءوز بەتىمشە سۋرەتتى تەرىس سالۋ تەحنيكاسىن مەڭگەردىم. بۇل ونەر شەتەلدە جاقسى دامىعان. ءبىزدىڭ ەلگە ەندى-ەندى كەلىپ جاتىر. سۋرەتتى تەرىس سالۋ – شوۋدىڭ ءبىر ءتۇرى. ونى ەكى-ءۇش مينۋتتىڭ ىشىندە سالىپ ۇلگەرۋىڭ كەرەك. سوندا ول كوپشىلىكتى بىردەن باۋراپ الادى. بۇل جەردە كوپ جاتتىعۋ تالاپ ەتىلەدى. قولدىڭ ەسكە ساقتاۋ قابىلەتىن جاتتىقتىرۋ كەرەك, – دەيدى ءمادينا.
ول سۋرەتشى رەتىندە بايقاۋ, فەستيۆالدەرگە قاتىسۋعا اسا ق ۇلىق تانىتا بەرمەيدى. دەگەنمەن از-كەم جەتىستىكتەرى دە بارشىلىق. ماسەلەن, 2018 جىلى وبلىس كولەمىندە ۇيىمداستىرىلعان «ەگەمەن ەل» بايقاۋىندا توپ جارعان. 2019 جىلى «جاستار جىلى» اياسىندا ەكىباستۇزدىقتارعا جەكە كورمەسىن ۇسىندى. جۇرتشىلىق جىلى قابىلدادى.
ءمادينانىڭ وسى كۇنگە دەيىن اكۆارەل, گۋاش, قارىنداشپەن سالعان سۋرەتتەرىنىڭ ۇزىن-سانى 200-دەن اسادى. ال مايلى بوياۋمەن سالعان سۋرەتتەرى بۇدان الدەقايدا از. ايتۋىنشا, مايلى بوياۋمەن ءبىر سۋرەتتى سالۋعا كەم دەگەندە جارتى جىل ۋاقىت كەتەدى ەكەن. ءمادينا باراباندا, دومبىرادا, گيتارا مەن پيانينودا ەركىن وينايدى. ءان شىرقايدى. «ەكىباستۇز ارۋى» دەگەن اتاعى جانە بار. وبلىستىق «پاۆلودار ارۋى» بايقاۋىندا دا توپ جارىپ, رەسپۋبليكالىق دوداعا جولداما العان. قازىر ەكىباستۇز قالالىق راديوسىندا جاڭالىقتار جۇرگىزەدى. بۇيىرتسا, جاڭا وقۋ جىلىنان باستاپ مەكتەپ وقۋشىلارىنا كوركەمسۋرەتتىڭ قىر-سىرىن ۇيرەتۋدى جوسپارلاپ وتىر.
– ازىرشە مەنىڭ مەڭگەرگەنىم – اكادەميالىق باعىت. ياعني سۋرەتتى قولدانىستاعى ەرەجەلەرىنە, تەحنيكالارىنا باعىنا وتىرىپ سالامىن. الداعى ۋاقىتتا سۋرەت الەمىندەگى ءوز باعىتىمدى تاپقىم كەلەدى. وزىمە عانا ءتان ەرەكشەلىكتىڭ بولعانىن قالايمىن, – دەيدى جاس سۋرەتشى.
