27 مامىردا تۇندە ساران قالاسىندا 31 جاستاعى قايرات تاشەنوۆتى كولىك قاعىپ كەتتى. ەر ادام ماكارەنكو كوشەسىندە ۆەلوسيپەدپەن كەتىپ بارا جاتقان. تۋىستارىنىڭ ايتۋىنشا, ونى قارسى جولاقتا قوزعالىپ بارا جاتقان اۆتوكولىك سوققان, ونىڭ جۇرگىزۋشىسى جەرگىلىكتى اسكەري ءبولىمنىڭ كەلىسىمشارت بويىنشا جۇمىس ىستەيتىن اسكەري قىزمەتشىسى. جۇرگىزۋشى «ماس كۇيدە» الدىندا كەلە جاتقان كولىكتى باسىپ وزباق بولىپ, ۆەلوسيپەدشىنى قاققانى حابارلاندى.
«وسىدان كەيىن جۇرگىزۋشى مەن ونىڭ دوسى جەدەل جاردەم دە شاقىرعان جوق. ولار قايراتتى جەردەن كوتەرىپ ەسىن جيۋعا كومەكتەسپەك بولعان, بىراق قۇلاتىپ الا بەرگەن. مۇنى ءوتىپ بارا جاتقان تاكسي جۇرگىزۋشىسى كورىپ ولارعا جابىرلەنۋشىگە تيىسپەۋىن سۇراپ, جەدەل جاردەم شاقىرعىسى كەلگەن. بىراق جۇرگىزۋشى كۋاگەرگە كەدەرگى جاساپ, ول قازىر ءوز-وزىنە كەلەدى دەگەن», دەدى مارقۇمنىڭ اپكەسى كاميلا ساماتوۆا.
وقىس وقيعانى قالا تۇرعىنى كورىپ جەدەل-جاردەم شاقىرعان.
«جۇرگىزۋشى مەن ونىڭ دوسىنىڭ الكوگول ىشكەنىن كورگەن ادامدار بار. ولار باۋىرىما بىردەن العاشقى كومەك كورسەتىپ, جەدەل جاردەم شاقىرعاندا, امان قالۋى مۇمكىن ەدى. ۋاقىت جوعالتىپ الدىق. ول ساران ورتالىق اۋرۋحاناسىنا ەس-ءتۇسسىز كۇيدە جەتكىزىلدى. بۇكىل سۇيەگى سىنعان, توسەكتە شۇبەرەك قۋىرشاق سياقتى جاتتى. قابىلداۋ ءبولىمىنىڭ قىزمەتكەرلەرى دە ۋاقىتىلى كومەك كورسەتپەدى. ولار باۋىرىمنىڭ كەلۋ ۋاقىتىن تىركەمەدى, شينالاردى ۋاقىتىلى سالمادى. وسى كۇيدە ماكاجانوۆ اتىنداعى كلينيكاعا جىبەرىلدى, وندا ول قايتىس بولدى», دەدى كاميلا.
مارقۇمنىڭ تۋىستارى جول-كولىك وقيعاسىنا كىنالى ادامنىڭ ماس بولعانىن جانە ونىڭ جىلدامدىقتى ايتارلىقتاي اسىرعانىن دالەلدەگىسى كەلەدى.
قر قورعانىس مينيسترلىگىنىڭ ءباسپاسوز قىزمەتى وقيعاعا قاتىستى تۇسىنىك بەردى. ۆەدومستۆو وكىلىنىڭ ايتۋىنشا, جۇرگىزۋشى ادام قاقتى, بىراق ماس بولماعان.
قاراعاندى وبلىسى پد ءباسپاسوز قىزمەتى دە وقيعاعا قاتىستى پىكىر ءبىلدىردى. اتالعان دەرەك بويىنشا تەرگەۋ ءجۇرىپ جاتقانى حابارلاندى. بارلىق قاجەتتى ساراپتاما تاعايىندالدى.
بيىل قىركۇيەكتە قايرات تاشەنوۆ 32 جاسقا تولار ەدى.
«ول سپورتپەن شۇعىلداناتىن, اۋە كۇشتەرىندە قىزمەت ەتتى. 18 جاسىندا اكەسىز قالعان ول وتباسىنداعى جالعىز اسىراۋشى بولعان. ومىرگە جوسپارى كوپ ەدى, ۇيلەنىپ تە ۇلگەرمەدى. ءبىز ونىڭ ولىمىنە كىنالىلەر جازالانعانىن قالايمىز», دەيدى قايتىس بولعان جىگىتتىڭ تۋىستارى.
