ءبىزدى وسىنداي ءبىر اسقاق ويعا جەتەلەگەن بەلگىلى سۋرەتشى ابدۋاحات مۇراتباەۆتىڭ سيمۆوليزم ستيلىندە ورىندالعان «قۇشاق» اتتى تۋىندىسى. شەبەردىڭ كەسكىندەمەسىندە ۇلتتىڭ ۇزاق جىلدار بويى ساقتالىپ كەلە جاتقان داڭقتى ءداستۇرى بار. كارتينادا ادامنىڭ ءبىر-بىرىنە دەگەن شەكسىز ءىلتيپاتى ۇيالاعان.
جالپى, سيمۆوليزم – سۋرەتشى كارتينانى سالعان كەزىندە جاسىرىن ارناۋدى, اللەگوريانى ءتىپتى فيلوسوفيالىق تەرەڭ نەمەسە ميستيكالىق ءماندى شيفرلاردى پايدالاناتىن بەينەلەۋ ونەرىندەگى ستيل مەن باعىت. تۋىندىلارداعى قۇپيا تاڭبالار شىنايى جانە تىلسىم دۇنيەلەر اراسىنداعى بايلانىستاردى ناقتى كورسەتەدى. ولار كورەرمەندى قۇمارلىقپەن ويلانۋعا, سيۋجەتتى قارادۇرسىن قابىلداۋدان باس تارتۋعا جانە اۆتور ويىنىڭ ناعىز ءمانىن تابۋعا يتەرمەلەيدى. سيمۆوليزم الەمدىك ونەرگە زور اسەرىن تيگىزىپ, حح عاسىرداعى كەسكىندەمەنىڭ كوپتەگەن جاڭا باعىتى ءۇشىن باستاماشى بولدى.
كەرەگەنىڭ اياسىندا قۇشاقتاسىپ تۇرعان ەركەك پەن ايەلدىڭ فيگۋراسى كەنەپتىڭ بەتىن تۇتاستاي الىپ جاتىر. فيگۋرالار بەزەندىرىلگەن, ەركەكتىڭ فيگۋراسى كورەرمەنگە ارقاسىمەن سالىنعان جانە قۇراق كورپەشە سەكىلدى ەلەمەنتتەردەن قۇرالعان پلاششپەن تۇتاستاي جابىلعان. بۇل اقپارات جاسىرىلعان موزايكا سياقتى كورىنەدى. وعان الماتى وبلىسىنىڭ تامعالى شاتقالىنداعى جارتاسقا سالىنعان پەتروگليفتەر بەينەلەنگەن. ەركەكتىڭ فيگۋراسىنىڭ ارتىنداعى ايەلدىڭ فيگۋراسى جارىم-جارتىلاي عانا كورىنەدى. ول باسىن جىگىتتىڭ يىعىنا سۇيەگەن. ۇزىن شاشتارى ارقاسىنا توگىلگەن. ول ءوزىنىڭ ەرىن مەيىرىممەن قۇشاقتاپ تۇر.
تۋىندى تۇتاستاي تاڭىرشىلدىك سيمۆولدارىمەن بەزەندىرىلگەن. تۇركى سيمۆوليكاسىندا ءۇشبۇرىش ءۇي, وشاق پەن ايەل نەگىزى دەگەن ءمان بەرەدى. بۇل ۇمايدىڭ, قۇداي-انانىڭ, قۇنارلىلىقتىڭ بەلگىسى. تىكبۇرىشپەن قيىلىساتىن شەڭبەر – ساۋلەلى بەلگى, ماڭگىلىك اسپاندى سيپاتتايتىن كۇننىڭ تاڭباسى, سول سياقتى شاڭىراقتى دا بىلدىرەدى.
سۋرەتشى ءوز تۋىندىسىندا ادامزاتقا ءتان ماڭگىلىك قۇندىلىقتاردى شيفرلاعان – بۇل ماحاببات, وتباسى, بالا, ءۇي, ەركىندىك, رۋحانيات جانە ءدىن.
