ونەر ادامدارىنىڭ شىعارماشىلىق جۇمىستارىنا سۇراۋ سالاتىن ساۋالدامامىزدىڭ بۇگىنگى قوناعى – قازاقستاننىڭ ەڭبەك سىڭىرگەن ءارتىسى, حالىقارالىق كينوفەستيۆالداردىڭ لاۋرەاتى, رەجيسسەر بولات قالىمبەتوۆ. ءداستۇرلى سۇراق: قانداي فيلم ءتۇسىرىپ جاتىرسىز؟
– ءبىز «مۇقاعالي» اتتى كينوكارتينانى اياقتادىق. اقيىق اقىننىڭ 90 جىلدىعىنا ارنالعان جۇمىسىمىز تاۋەلسىزدىگىمىزدىڭ 30 جىلدىعىمەن دە تۇسپا-تۇس كەلىپ وتىر.
فيلم مادەنيەت جانە سپورت مينيسترلىگىنىڭ قارجىلاندىرۋىمەن تۇسىرىلگەن «قازاقفيلمنىڭ» تۋىندىسى. جالپى, مۇقاعالي اعا تۋرالى كوركەم فيلم ءتۇسىرۋ بۇرىننان ارمانىم بولدى. بۇل – اقىننىڭ ەستەلىكتەرىن وقىپ, مۇقاعاليتانۋشىلارمەن كەڭەسىپ, ۇزاق جىل ىشتەي دايىندالىپ كەلگەن ءفيلمىم.
ستسەناريىن قالامگەر جۇسىپبەك قورعاسبەك ەكەۋمىز جازدىق. پروديۋسەرى المات ماساليم, كومپوزيتورى نيكيتا كارەۆ, قويۋشى وپەراتورى ەدىگە نۇسىپبەكوۆ, قويۋشى سۋرەتشى ەرمەك وتەگەنوۆ.
مۇقاعاليدىڭ تالانتى بارىنە ءمالىم, سوندىقتان اقىننىڭ از عانا عۇمىرىن, وتباسىن, ورتاسىن, سول ۋاقىتتاعى قوعامدى ءفيلمنىڭ نەگىزىنە الدىق.
كينوعا دايىندالىپ, ىزدەنىپ جۇرگەن كەزدە قولىما قادىر مىرزاليەۆتىڭ ء«يىرىمى» ءتۇستى. سوندا: «قازاقتار ءبارىن كەشىرەدى, بىراق سەنىڭ ءتىرى جۇرگەنىڭدى كەشىرە المايدى», دەيدى. وسى ءسوزدىڭ استارى, فيلوسوفياسى ماعان قاتتى اسەر ەتتى. قادىر اقىن سونشالىقتى نەدەن كەيىدى؟ نەگە ولاي ايتتى؟ وسى ويدىڭ توڭىرەگىندە ويلانا باستادىم. بۇل ىشكى تولعانىس بىزگە مۇقاعالي تۋرالى كينونىڭ وزەگىن تابۋعا كومەكتەستى.
فيلمدە اقىن وبرازىنان بولەك فاريزا وڭعارسىنوۆانىڭ, باۋىرجان مومىش ۇلىنىڭ, نۇرعيسا تىلەنديەۆتىڭ بەينەسى بار.
– مۇقاعاليدىڭ ءرولىن كىم سومدادى؟
–اسىلانبەك جانبالاەۆ. ال باۋىرجان اتامىزدى ويناعان تەاتر اكتەرى باۋىرجان قاپتاعاەۆ. نۇرعيسا اعانى قاجىمۇقان اتامىزدىڭ نەمەرەسى, كومپوزيتور باقىتجان قاجىمۇقان, لاشىن اپانى تولعاناي تالعات, مۇقاعاليدىڭ اناسى ناعيمانى قىرعىزستاننىڭ حالىق ءارتىسى جامال سايداحماتوۆا سومدادى.
– كينو ءتۇسىرۋ بارىسىندا قانداي قيىندىقتار بولدى؟
– قازىر الماتىدا ترامۆاي جوق. ەسىك-تەرەزەلەردىڭ ءبارى پلاستيك. سونىمەن, ءبىز بۇرىنعى الماتىنىڭ اتموسفەراسىن ىزدەپ, بۇكىل قازاقستاندى ارالادىق. سوڭىندا وسكەمەنگە توقتادىق. ول جاقتا ارحيتەكتۋرالىق جاعىنان الماتىعا ۇقساس جەرلەر كوپ ەكەن ءارى ترامۆاي دا بار. ال مۇقاعاليمەن قوشتاسۋ ەپيزودىن جازۋشىلار وداعىندا تۇسىردىك. ەسكى ۇكىمەت ءۇيى دە كادرعا ىلىكتى. كينو ءۇش تىلدە, 1 ساعات 50 مينۋتقا سوزىلدى. فيلمدە ءسوز از, كوبىنە ۆيزۋالدى كورىنىستەر, مۋزىكا...
پاندەميالىق جاعدايعا بايلانىستى ءفيلمنىڭ پروكاتقا شىعۋى كەشەۋىلدەدى. كينوستۋديانىڭ جوسپارى بويىنشا, قازان ايىنىڭ 7-سىنەن باستاپ نۇر-سۇلتان, الماتى قالالارىندا پرەمەراسى وتكىزىلمەك. قازىر شەتەلدىك فەستيۆالدەرمەن كەلىسىمشارت ءجۇرىپ جاتىر, جانرى سايكەس كەلسە, فيلم الەمدىك ارەنادا دا باق سىناۋى مۇمكىن.
– الداعى ۋاقىتتا قانداي جوسپار بار؟
– «رۋحاني جاڭعىرۋ» باعدارلاماسى اياسىندا 24 جاسىندا كەڭەس وداعىنىڭ حالىق ءارتىسى اتاعىن العان كۇلاش بايسەيىتوۆانىڭ ومىرىنە ارنالعان كينوعا دايىندالىپ جاتىرمىز. ستسەناريىن جۇسىپبەك قورعاسبەكپەن قولعا الدىق. بۇل كىسى دە 45 جاسىندا ومىردەن وتكەن. مۇندا دا سول كەزدەگى ورتا, ءانشىنىڭ ءومىرى, اينالاسى – شارا جيەنقۇلوۆا, ەۆگەني برۋسيلوۆسكي, جۇمات شانين, قانابەك بايسەيىتوۆ, قۇرمانبەك جانداربەكوۆتەر سۋرەتتەلەدى.
– شىعارماشىلىق جوسپارىڭىزبەن بولىسكەنىڭىزگە راحمەت. ءفيلمدى اسىعا كۇتەمىز.
