كەزدەسۋ «تاريحي سانا – تاۋەلسىزدىكتىڭ رۋحاني تۇعىرى» تاقىرىبىندا ءوتتى جانە جاس عالىمدار ساياسي قۋعىن-سۇرگىن جانە اشارشىلىق تاريحى بويىنشا زەرتتەۋ ناتيجەلەرىن ايتىپ بەردى.
«تاۋەلسىزدىكتىڭ 30 جىلدىعىن اتاپ ءوتۋدىڭ تۇجىرىمداماسى مەن ءىس-شارالار جوسپارىنا سايكەس, مامىر ايى «ۇلتتىق بىرلىك, بەيبىتشىلىك جانە تۇراقتىلىق» تاقىرىبىمەن ءوتىپ جاتىر, تۇجىرىمداما بيىلعى 31 مامىر – ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنىنە ەرەكشە ءمان بەرەدى», دەدى ايدا بالاەۆا جاس تاريحشىلارمەن كەزدەسۋدەگى العىسوزىندە.
مينيستر قازىرگى ۋاقىتتا قازاقستاندا تاريحىمىزدىڭ جەكەلەگەن كەزەڭدەرىن جان-جاقتى زەرتتەۋگە مۇمكىندىك بار ەكەنىن اتاپ ءوتتى جانە جاس تاريحشىلاردى وسى باعىتتا اكادەميالىق جۇمىستاردى اتقارۋعا شاقىردى.
كەزدەسۋگە جاس تاريحشىلار مەن عالىمدار, ساياسي قۋعىن-سۇرگىن قۇرباندارىن تولىق اقتاۋ جونىندە مەملەكەتتىك كوميسسيا مۇشەلەرى, عىلىمي-زەرتتەۋ ورتالىقتارىنىڭ, ارحيۆتەر مەن مۋزەيلەردىڭ قىزمەتكەرلەرى قاتىستى.
ولار تاۋەلسىزدىك العاننان كەيىن تاريحتى ءادىل زەرتتەۋگە, ناقتى فاكتىلەردى بىلۋگە جانە ولاردى قايتا وي ەلەگىنەن وتكىزۋگە مۇمكىندىك تۋىنداعانىن ايتتى.
«قازاق حالقىنىڭ وتكەن عاسىرداعى 20-30 جىلدارداعى تاريحىنىڭ قارالى بەتتەرىن زەردەلەۋ, بولشەۆيكتەردىڭ قىلمىستارى تۋرالى اقيقاتتى اشۋ قانداي دا ءبىر باسقا حالىققا قارسى باعىتتالعان ءىس-ارەكەت رەتىندە قاراستىرىلماۋى ءتيىس. دەگەنمەن, تاريح بارلىق حالىقتاردى وتكەننىڭ قايعىلى قاتەلىكتەرىن قايتالاماۋعا ۇيرەتىپ, ەسكەرتۋى كەرەك. اسىرەسە, وسكەلەڭ ۇرپاقتى تاريحىمىزدىڭ اقيقاتىنا قانشالىقتى اششى بولسا دا ۇيرەتۋىمىز قاجەت. سوندىقتان پرەزيدەنتتىڭ تاپسىرماسى بويىنشا ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيا قۇرىلدى. ەندى تاريحي قۇجاتتاردى زەردەلەپ, ناقتى دەرەكتەرگە نەگىزدەلگەن سەنىمدى زەرتتەۋ جۇرەتىنىنە سەنىمدىمىن», دەيدى ا. بالاەۆا.
ايتا كەتەيىك, قر تۇڭعىش پرەزيدەنتى – ەلباسى ن.نازارباەۆتىڭ شەشىمىمەن 1997 جىلدان باستاپ جىل سايىن قازاقستاندا 31 مامىر ساياسي قۋعىن-سۇرگىن قۇرباندارىن ەسكە الۋ كۇنى رەتىندە اتاپ وتىلەدى.
