جوبا اۆتورى اينۇر قۋانىشقىزىنىڭ ايتۋىنشا, بۇگىندە قالىپتاسقان جاعدايلار ىشكى ءتۋريزمدى دامىتۋعا باعىتتالعان جوبالاردى ىسكە اسىرۋعا ۇلكەن مۇمكىندىك بەرەدى. ء«بىزدىڭ ويىمىزشا, گلەمپينگتەر جەلىسىن قۇرۋ – ماڭىزدى باعىتتاردىڭ ءبىرى. قاتاڭ كارانتيندىك تالاپتارعا سايكەس كوپتەگەن ادام تازا اۋادا دەمالۋعا تىرىسادى».
جاڭا دەمالىس ايماعىندا قوناقتارعا ءتورت ادامنان تۇراتىن وتباسى مۇشەلەرى ورنالاسا الاتىن 11 جايلى ورىن جانە تىكەلەي فەرمالاردان جەتكىزىلەتىن تابيعي ونىمدەردەن جاسالاتىن تاعامدار ۇسىنىلادى. سونداي-اق دەمالۋشىلار ءوز ۋاقىتتارىن كوڭىلدى وتكىزە الادى. دەمالىس ايماعىنىڭ كەشەنىندە قوناقتارعا ارنالعان مەيمانحانا, كيىز ءۇي, بالالارعا جانە ۇلكەندەرگە ارنالعان باسسەين, مونشا, سپورتتىق الاڭدار جانە تەگىن كولىك تۇراعى قاراستىرىلعان.
دەمالۋشىلار اتقا ءمىنىپ ساياحاتتاپ, كۆادروتسيكل, ۆەلوسيپەد تەۋىپ, سەرۋەندەي الادى. سونداي-اق جوكەي كولىنىڭ جاعاسىندا بالىق اۋلاپ, تابيعات اياسىندا دەمالادى. ءبىرجان سال اۋدانىنىڭ كاسىپكەرلىك جانە ونەركاسىپ ءبولىمىنىڭ باس مامانى مارال شاۋجانوۆا وڭىردە گلەمپينگتى ىسكە قوسۋ ەكولوگيالىق ءتۋريزمدى دامىتۋداعى ماڭىزدى قادام ەكەنىن اتاپ ءوتتى.
«گلەمپينگ – تۇرمىسقا قاجەتتى زاماناۋي زاتتارمەن جابدىقتالعان جايلى ورىندار قۇرىپ, تابيعاتتا دەمالعاندى ءجون كورەتىن جاندارعا ارنالعان دەمالىس ورنى. تابيعاتى اسەم, تازا اۋا ءارى سىڭعىرلاعان قۇستاردىڭ داۋسى بار ءبىزدىڭ وڭىرگە كەلەتىن دەمالۋشىلار سانى ودان سايىن ارتا تۇسەرىنە سەنىم مول», دەدى م. شاۋجانوۆا.
ايتا كەتەيىك, بۇۇ-نىڭ بۇكىلالەمدىك تۋريستىك ۇيىمى اۋىلدىق جانە ەكولوگيالىق ءتۋريزمدى دامىتۋدى اتاپ وتكەن. سەبەبى پاندەميا اسەرىنەن ەكوتۋريزم جاھاندىق تۋريزم ۇلەسىنىڭ 30%-ىن قۇراعان.
