دۇڭگىرشەكتە نەگىزىنەن جولاۋشىلارعا ارنالعان نۇسقاۋلىقتار ساتىلاتىندىقتان با, مۇندا كوپ ەشكىم باس سۇعا بەرمەيدى. ىلەۋ دە بىرەۋ, وندا دا ءىشى پىسقان الدەبىر الاياق بولۋى عاجاپ ەمەس. ءبىر-ءبىرىن ايىرعىسىز ءىش پىستىرارلىق كۇندەردىڭ بىرىندە دۇكەنگە گولليۆۋدتىڭ ايگىلى جۇلدىزى اننا سكوتت (دجۋليا روبەرتس) كەلىپ كىرەدى. قاجەتتى كىتابىن العان سوڭ, كەتەرىندە شىن جاقسى كورگەنى مە, الدە ويناعانى بولار قاراداي ابىگەرگە تۇسكەن ۋيليامدى اننا ءسۇيىپ الادى. مۇندايدى كۇتپەگەن قاراپايىم دۇكەن ساتۋشىسى, ارينە ەسەڭگىرەپ قالارى داۋسىز, ءتىپتى سەنىمدى سەرىگى سپايكپەن كەڭەسسە دە ەس-اقىلىن جيا الماي دارمەنى قۇريدى.
فيلمدە اننانىڭ مىنەز-قۇلقىن ءتۇسىنۋ وتە وڭاي. قاراپايىم ادامي سەزىمدى, جاقسى كورۋدى, ۇناتۋدى, ادام سياقتى رەنجۋدى ساعىنعان جاي عانا ادام, جالعىزسىراعان قامكوڭىل قىز بالاسى ەدى. شوۋ-بيزنەستىڭ الەمىش الەمى ابدەن مەزى قىلعاندا كىشكەنتاي دۇكەندەگى قاراپايىم جىگىتتەن جىلىلىق ىزدەۋى دە تابيعي. ءتىپتى ەش كۇمانسىز. ءبىر-ءبىرىن ۇناتقانىن ءالى وزدەرى دە انىق تۇسىنە قويماعان ەكەۋ ەندى باستالعان تانىستىعىن سىرت كوزدەن قانشا جاسىرعانىمەن, وسى ماڭايدىڭ بىتپەيتىن گۋ-گۋ اڭگىمەسىنە ارقاۋ بولادى. قاشقان-پىسقان ءباسپاسوز وكىلدەرى قولدارىنداعى بىلەۋدەي ميكروفوندارىن كەس-كەستەپ اتاقتى گولليۆۋد جۇلدىزى مەن قاراپايىم بازارداعى ساتۋشى جىگىتتىڭ اراسىندا نە بارىن بىلە الماي الەك. سيۋجەتتىڭ ىشىنە بۇككەن بار سىرىن وقىرمانعا جايىپ سالماس ءۇشىن ساتۋشى مەن اكتريسانىڭ اراسىنداعى سوڭعى سۇحباتتا كورەرمەنگە ۇسىناتىن ەرەكشە جىلىلىق بار ەكەنىن قوسا كەتكەنىم ءجون بولار.
دەسە دە فيلم بۇگىن تۇسىرىلگەن تۋىندى ەمەس, كورەرمەنگە جول تارتقانىنا جيىرما جىلدان اسقان ەسكى فيلم. ءدال بۇگىنگىدەي الەمدى قۇتقارۋعا اتتانعان كوزسىز باتىرلاردىڭ شىتىرمان وقيعاسى, يا تىم زاماناۋيلانعان الەۋمەتتىك تاقىرىپتار ءالى ترەندكە اينالا قويماعان بەيبىت جىلداردىڭ بەيعام ساتتەرى قامتىلادى. مۇنداعى بريتان يۋمورى كۇندەلىكتى ءومىردىڭ كەي ابسۋرد تۇسىن ەرەكشە نازىك تابيعاتىمەن جىمداستىرا وتىرىپ, ەلەپ-ەكشەپ ۇسىنادى. جالپى, بريتان كومەديالارىنىڭ تەز تانىلۋىنا بريتان يۋمورى بىردەن-ءبىر سەبەپ بولعانى بەلگىلى ءارى ەل مادەنيەتىن الەمگە ايگىلى ەتۋدەگى ماڭىزدى ارنا دەسەك ارتىق ايتپاعان بولار ەدىك. ماسەلەن, نوتتينگ ءحيللدىڭ جايما بازارىنداعى قايتالانا بەرەتىن ءبىرسارىندى كوڭىلسىزدىگى تاكەردىڭ دوستارى مەن وتباسى قاتىسقان سيۋجەت جەلىسىمەن ۇنەمى ءتۇرلى تۇسكە بويالىپ وتىراتىنداي. ءدال وسى توپتىڭ كۇشىمەن كەيىپكەرلەردىڭ تاپقىر كومەدياسى ءفيلمنىڭ ءالى كۇنگە دەيىن باعىن اسىرىپ كەلەدى. اقىل-ەسى كەمدەۋ كورىنەتىن, ال شاشى ءومىرى تارالمايتىن ەسالاڭ جىگىتتىڭ كەيپىندەگى سپايكتىڭ (ريس يۆانس) پوشىمى بىلاي قاراساڭ كىسى ۇركەتىندەي-اق.
– بىردەن ايتايىن, مىنا يوگۋرتتىڭ ءدامى بۇزىلعان, – دەيدى الدەنەنى قاسىقتاپ قاۋجاڭداپ جاتىپ.
– بۇل – مايونەز.
– وندا جەۋگە كەلەدى, – دەپ تاڭدايىنا جانە ءبىر قاسىق تاستاپ قويىپ كەتە بارادى. اڭعال سپايكتىڭ ناعىز بولمىسى وسى. ءبىرىنشى كوزگە تۇسەتىنى سەرەيگەن ۇزىن بويى مەن كوكشىل كوزدەرى. ءتىپتى باس كەيىپكەرلەردىڭ جاتتاندى ءىس-ارەكەتىنەن سيۋجەت جەلىسى انە-مىنە تۇيىققا تىرەلگەندەي بولعاندا وسى سپايك شىعا كەلىپ, ساحناعا جاڭا دەم بەرەدى. بولماسا, تاڭەرتەڭ ۇيقىلى-وياۋ قالپىندا سۋدا جۇزەتىن قىپ-قىزىل كوستيۋمدى ۇستىنە ءىلىپ الىپ شىعا كەلەتىن ءساتى شە؟ دوسىنىڭ مۇنداي جاۋاپسىزدىعىنا ەتى ۇيرەنگەن ۋيليام ەش تاڭدانىسسىز سۇرايدى:
– مۇنى نەگە كيىپ الدىڭ؟
– تازا كيىم قالماعان ەكەن, ءبارى جۋىلماعان. سودان سەنىڭ كيىمدەرىڭدى اقتارىپ جاتىپ, كوزىمە وسى بىرەۋى ءتۇستى.
– بىراق بۇل سۋدا جۇزەتىن كوستيۋم عوي, – دەيدى شىداي الماي كەتكەن ۋيليام.
– ءيا, ەسەسىنە كوڭىلدى عوي, – دەيدى سپايك ەش ساسپاستان ورازاسىن قالعان-قۇتقان بىردەڭەمەن اشىپ جاتىپ.
قايتالانا بەرەتىن تىرشىلىكتەن ماعىنا تابا الماعاندا ءدال وسى ەسالاڭ سارى جىگىتتەي قولعا تۇسكەن كيىمدى ىلە سالىپ, ءوزىڭدى دە, ءومىرىڭدى دە ەركىنە قويا بەرگىڭ كەلەتىن ساتتەر بولاتىنى راس. وزدەرى بەلگىلەگەن ۇستانىمدار مەن ءتارتىپ اياسىنان الىسقا ۇزاي الماي, قامالعان ەكەۋدىڭ جان دۇنيەسىندە جاتقان قۇلازۋى, باز كەشۋى, قالاۋى, ەركىندىكتى اڭساۋى, قامىعۋى سىندى ىشكى شەكتەۋلەرى سپايك وبرازى ارقىلى كورسەتىلگەن بە دەيسىڭ. مۇنى فيلم رەجيسسەرى رودجەر ميشەلل جاقسى اڭعارعان.
ءفيلمدى ءتۇسىرۋ ءۇشىن جۇمىس توبى ايانباي تەر توگۋگە ءماجبۇر بولدى. نوتتينگ حيلل ايماعىن ءدال مەتروپوليانىڭ ورتاسىنداعى نەعۇرلىم رومانتيكالىق اۋىل رەتىندە كورسەتۋ ءۇشىن ەۋروپالىق كەلبەتىن ايرىقشالاپ, كاريب ارالدارىنان اۋىپ, ۇزاق جىل قونىستانعان يمميگرانتتاردى كوشەدەن ۋاقىتشا كوشىرە تۇرۋعا ءماجبۇر بولعان كورىنەدى. نوتتينگ ءحيللدىڭ كەيىپكەرلەرىن ءبىرى بالالارشا ەرىككەن بىرەۋلەر دەپ جاراتپاۋى, ەندى ءبىرى بريتان ازىلدەرىنىڭ تىم كوپ ەكەنىن ايتىپ شاعىمدانۋى مۇمكىن. بازبىرەۋلەر بوس اڭگىمەگە دە بالاۋى عاجاپ ەمەس. سوندىقتان فيلم جايىندا اسىرىپ, نە اسىعىس بايلام جاساۋدان اۋلاقپىز, قانداي دا ءبىر وي ءتۇيۋ كورەرمەننىڭ ەنشىسىندەگى دۇنيە. باياعىدا بىرەۋ «ارمانداۋعا بولماي ما» دەپتى دەگەن قاعىتپا بار. ءيا, كينوفيلمدەگى وقيعالاردىڭ شىنايى ومىردە بولا قويۋى ەكىتالاي. ايتسە دە وسى ومىردە كىشكەنتاي عاجايىپتارعا سەنگىسى كەلەتىن ۇلكەندەر ءۇشىن وسىناۋ قاربالاس كۇندەردىڭ اراسىندا بوي جازىپ, ءسال ايالداپ تىنىستاپ الۋعا, بالكي از-ماز ارمانداۋعا مۇمكىندىك بەرەتىن ىزگىلىك ەرتەگىسى سىندى ەستە قالادى.
