پرەزيدەنت اكىمشىلىگى باسشىسىنىڭ ورىنباسارى تالعات دوناقوۆتىڭ توراعالىق ەتۋىمەن كەڭەس وتكىزىلىپ, ونىڭ جۇمىسىنا باس پروكۋرور ق.ءمامي, جوعارعى سوت توراعاسى م. الىمبەكوۆ جانە قۇقىق قورعاۋ ورگاندارىنىڭ ءبىرىنشى باسشىلارى قاتىستى.
كەڭەستە زاڭدىلىقتى قامتاماسىز ەتۋ, قىلمىسقا جانە سىبايلاس جەمقورلىققا قارسى كۇرەس ماسەلەلەرى قارالدى, سونداي-اق قۇقىق قورعاۋ ورگاندارىنىڭ 2010 جىلعى ءى-توقسانداعى جۇمىسىنىڭ قورىتىندىسى جاسالدى. ت.دوناقوۆ ءوزىنىڭ سوزىندە مەملەكەتتىك باسقارۋ ينستيتۋتتارى جۇيەسىندە قۇقىق قورعاۋ ورگاندارىنىڭ ماڭىزدى ءرول وينايتىنىن, سەبەبى ازاماتتاردىڭ الەۋمەتتىك ءال-اۋقاتى ەلەۋلى مولشەردە زاڭدىلىق پەن قۇقىق ءتارتىبىنىڭ دەڭگەيىنە بايلانىستى ەكەنىن اتاپ كورسەتتى. وسىعان بايلانىستى پرەزيدەنت ن.ءا. نازارباەۆتىڭ حالىققا جولداۋىندا ايتىلعان تاپسىرمالارىنىڭ مۇلتىكسىز ورىندالۋى قاجەتتىلىگىنە نازار اۋدارىلدى. ازاماتتاردىڭ قۇقىقتارىن قورعاۋ جانە زاڭدىلىقتى ساقتاۋ باسىمدىعى قۇقىق قورعاۋ ورگاندارى جۇمىسىنىڭ نەگىزگى ءپرينتسيپى بولۋى قاجەت. كەڭەستە ىشكى ىستەر ءمينيسترىنىڭ, ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگى توراعاسىنىڭ, كەدەندىك باقىلاۋ جانە قىلمىستىق-اتقارۋ جۇيەسى كوميتەتتەرى توراعالارىنىڭ باياندامالارى تىڭدالدى. ماسەلەلەردى تالقىلاۋ ناتيجەلەرى بويىنشا زاڭدىلىقتى جانە قۇقىق ءتارتىبىن نىعايتۋ, ونىڭ ىشىندە كوشەلەردە جانە وزگە قوعامدىق ورىنداردا ءتارتىپ ورناتۋ, كوشى-قون باقىلاۋىن كۇشەيتۋ, ۇيىمداسقان جانە ترانسۇلتتىق ۇيىمداسقان قىلمىسقا قارسى كۇرەس, قارۋ-جاراقتىڭ اينالىمىن باقىلاۋ, كەدەن جانە ەكونوميكالىق قىزمەت سالاسىندا قىلمىستاردىڭ الدىن الۋ شارالارىن قولدانۋ جانە ولاردى ۋاقتىلى اشۋ بويىنشا مىندەتتەر بەلگىلەندى. “ەگەمەن-اقپارات”.
