«AG Disinfektion services» جشس ديرەكتورىنىڭ ورىنباسارى نۇرلىبەك احمەدياروۆتىڭ ايتۋىنشا, ماسانىڭ تابيعي كوبەيۋ وشاعى سانالاتىن بەس ۋچاسكە بار. بۇل – سارىوزەكتەگى كارىز سۋى قۇيىلاتىن, اتىراۋ مۇناي وڭدەۋ زاۋىتى اۋماعىنداعى تەحنيكالىق جانە وندىرىستىك ماقساتقا پايدالانىلعان شايىندى سۋ توگىلەتىن ورىن, «اقجايىق» مەملەكەتتىك تابيعي رەزەرۆاتىنا قاراستى كاسپي ماڭى جاعالاۋ الاڭدارى جانە قالانى اينالىپ وتەتىن «ەرىك-موستوۆوي» كانالى.
«بۇل ۋچاسكەلەر كاسىپورىننىڭ تۇراقتى باقىلاۋىنا الىنىپ وتىر. زالالسىزداندىرۋ شارالارىمەن الدىمەن شاھارداعى 1 130-دان استام كوپقاباتتى ءۇيدىڭ كىرەبەرىسى, بالالاردىڭ ويىن الاڭقايلارى مەن ايالدامالار, سونداي-اق قالا اۋماعىنداعى اۋىلدىق ەلدى مەكەندەر قامتىلدى. مۇنداي دەزينسەكتسيالىق جۇمىستار تۋحلايا بالكا, «ەرىك-موستوۆوي, پەرەتاسقا ۋچاسكەلەرىندە جۇرگىزىلدى. سوڭعى ەكى ايدا قالا ماڭىنداعى ەلدى مەكەندەر مەن تەڭىز جاعالاۋىندا 40 ملن شارشى مەتر اۋماق دەزينسەكتسيالاندى», دەيدى نۇرلىبەك احمەدياروۆ.
اتىراۋ قالالىق اكىمدىگى ءباسپاسوز قىزمەتىنىڭ مالىمەتىنشە, بيىل ماساعا قارسى كۇرەس جۇمىسىنا جەرگىلىكتى بيۋدجەتتەن 126 ملن تەڭگە ءبولىنىپتى. مەردىگەر مەكەمەدە ماساعا قارسى ۋلاۋ جۇرگىزۋ ءۇشىن 5 بريگادا, 43 دەزينفەكتور, 8 بىرلىك اۆتوكولىك پەن ارناۋلى تەحنيكا-قۇرىلعىلار تارتىلعان.
