تاسقىننان قورعانۋعا تياناقتىلىق قاجەت

كەشە پرەمەر-ءمينيستردىڭ ءبىرىنشى ورىنباسارى ومىرزاق شوكەەۆتىڭ توراعالىعىمەن كەڭەس بولىپ ءوتتى. وندا رەسپۋب­ليكاداعى ستراتەگيالىق ماڭىزدى سۋلى نىسانداردىڭ جاعدايى مەن “استانا قالاسىن ەسىل وزەنىنىڭ تاسقىن سۋلارىنان قورعاۋ” جوباسى قۇرىلىسىنىڭ اياقتالۋ ماسەلەسى ءسوز بولدى. الدىمەن استانا اكىمىنىڭ ورىن­باسارى سەرگەي حوروشۋن استانا قالاسىن تاسقىن سۋلاردان قورعاۋ ماقساتىندا سالىنعان بوگەتتىڭ جۇ­مىسى تۋرالى بايانداپ بەردى. بۇل نى­سان ۇكىمەت قاۋلىسىمەن 2006 جىلعى ستراتەگيالىق ماڭىزى جوعارى “اس­تا­نا قالاسىن قورعاۋ” اتتى باسىم­دىق بەرىلگەن ينۆەستيتسيالىق جوبا­لار سانا­تىنا ەنگەن بولاتىن. قالا اكىمى ورىنباسارىنىڭ سوزىنە قارا­عاندا بوگەت ءالى تولىق ىسكە قوسىل­ما­عانىمەن, ۆياچەسلاۆ سۋ قويماسىنا سىيماعان 30 ملن. تەكشە مەتر سۋدى وزىنە قابىل­داپتى. وسى قولعا الىنعان شارا استا­نا­نىڭ جەكەلەگەن اۋماق­تارىن سۋ باسۋ قاۋپىنەن ساقتاپ قال­عان كورىنەدى. بۇگىن­گى كۇنى ۆياچەسلاۆ سۋ قويماسىنىڭ كولەمى 400 ملن. تەكشە مەتر سۋدى قۇرايدى. ارتىق سۋدى بوگەتكە جىبەرۋ ارقىلى جاعداي تۇراقتالعان. ال جاڭا بوگەتتىڭ قۇرىلىسى بيىل اياقتالادى دەپ جوسپارلانىپ وتىر. سەرگەي حوروشۋننىڭ ايتۋىنشا, ۆياچەسلاۆ سۋ قويماسى ارناسىنان تاسىعان جاعدايدا, ەسىلدىڭ سول جاعالاۋى مەن اۋەجاي ماڭىندا ورنا­لاسقان بىرنەشە ەلدى مەكەن سۋ استىندا قالۋى مۇمكىن ەكەن. ايتسە دە الدىن الۋ شارالارى ناتيجەسىندە بۇل قاۋىپ ورىن العان جوق. قازىر ۆياچەسلاۆ سۋ قويماسىندا ءوزىنىڭ جوبالىق سىيىم­دىلىعى بويىنشا 410 ملن. تەكشە مەتر سۋ بار, سونىمەن بىرگە بوگەتتە تاعى 30 ملن. تەكشە مەتر سۋ بار. ەندى بۇل سۋدى قالاي ءتيىمدى پايدالاناتى­نىمىزدى ويلانۋ قاجەت, دەگەن ومىرزاق شوكەەۆ بيىلعى جىلعى ەلىمىز­دە قالىپتاسقان ەرەكشە ىلعال­دىلىق جاعدايى تۋرالى باياندادى. كوشپەلى وتىرىستا جاڭا بوگەتتى بولاشاقتا ءتيىمدى پايدالانۋ جانە جينالعان سۋدى كەزەڭ-كەزەڭىمەن ەسىل وزەنىنە وتكىزۋ ءۇشىن سالىنىپ جاتقان ارنالاردى تەزىرەك ءبىتىرىپ, قولدا­نىسقا بەرۋ تاپسىرىلدى. ارنالار قۇرىلى­سىنا بيۋدجەتتەن 740 ملن. تەڭگە ءبولى­نىپ, ونىڭ ءبىرىنشى كەزەگى اياق­­تال­دى. قۇرىلىس الداعى قىر­كۇيەك­تىڭ 1-ىنە دەيىن تولىعىمەن اياقتا­لىپ, ارنا ەسىل وزەنىمەن جالعاستىرىلاتىن بولادى. ءابدىراحمان قىدىربەك.