بۇل وقۋ ورنى قالاداعى ۇزدىك بىلىمىمەن عانا ەمەس, تاربيەگە دە زور ءمان بەرەتىن ەرەكشە مەكتەپ بولىپ سانالادى. مەكتەپ شاكىرتتەرى سىرتتان كەلگەن ادامدى قۇراق ۇشىپ, جىلى امانداسىپ قارسى الادى. اتا-انالار دا ءۇمىت ەتكەن كوزدەرىنىڭ نۇرىن وسى ءبىلىم وشاعىندا وقىتۋعا تىرىسادى. ءتارتىپ پەن تاربيە بار جەردە ناتيجە دە جاقسى. بيىلعى ناۋرىز ايىندا بولعان ءپان وليمپياداسىندا وسى ليتسەيدىڭ 39 وقۋشىسى ءتۇرلى دەڭگەيدەگى مەدالدار الىپ, جالپى ەسەپ بويىنشا وبلىستاعى ەڭ ۇزدىك وقۋ ورنى اتاندى. ال ليتسەيلەردىڭ ۇستازدارى اراسىندا بولعان كونكۋرستا اتالعان مەكتەپتىڭ 3 مۇعالىمى جۇلدەگەر بولدى. ءبىر قىزىعى, مۇنداعى ۇستازداردىڭ جارتىسىنان كوبى ەلىمىزدىڭ ءار تۇكپىرىندەگى وسى ىسپەتتى ليتسەيلەردى بىتىرگەن تۇلەكتەر.
بيىل مەكتەپ بىتىرگەلى وتىرعان 46 تۇلەكتىڭ بەسەۋى «التىن بەلگىگە», التاۋى «ۇزدىك اتتەستاتقا» ۇمىتكەر. سونىڭ ىشىندە داريعا جانعۋجينوۆا, ارۋجان قاۋجان, دانيا امانگەلدى, اياجان بالتاباەۆا, ارۋجان جاحينا «التىن بەلگىنىڭ» ۇمىتكەرلەرى اتانسا, ال «ۇزدىك اتتەستاتقا» اميرا اباي, دارمەن اۋەلبەك, الينا تىلەۋىمبەتوۆا, ارۋجان قۋانىشپاي, داريعا قۇرماش, دياس جۇماباي ۇمىتكەر بولىپ وتىر. مەكتەپ ديرەكتورى ەردەن جاقسىمبەتوۆتىڭ ايتۋىنا قاراعاندا, مۇندا ەلىمىزدىڭ سولتۇستىك وڭىرلەرىنەن كەلگەن جاسوسپىرىمدەر وقيدى. بۇگىنگى ءبىتىرىپ جاتقان تۇلەكتەردىڭ اراسىندا وبلىس اۋداندارى عانا ەمەس اقمولا, پاۆلودار وبلىسىنىڭ, نۇر-سۇلتان, الماتى قالالارىنىڭ وكىلدەرى بار.
تۇلەكتەر جۇرەكتەرىن دىرىلدەتكەن, ەرىندەرىن كۇبىرلەتكەن «سوڭعى قوڭىراۋعا» قاتىسىپ, ءبىر-ءبىرىن قۇتتىقتاپ, قۇشاقتاپ, ومىرلەرىندەگى ەرەكشە مەرەكەنى باستان كەشىردى. سولاردىڭ اراسىنان نۇر-سۇلتان قالاسىنان كەلىپ وقىپ جاتقان ىڭكار بايدالىنى سوزگە تارتقانىمىزدا: «جىلى ۇيا – مەكتەبىمدى قيمايمىن. بىرگە وقىعان قۇربىلارىم مەن تاماشا ۇستازدارىمدى ساعىناتىن شىعارمىن. ەندى تەك ۇبت-نى جاقسى تاپسىرىپ, ارمانداعان وقۋ ورنىنا ءتۇسۋىم كەرەك. بارلىق العان ءبىلىمىمدى, كۇش-جىگەرىمدى سوعان جۇمساپ, اتا-انامنىڭ ءۇمىتىن اقتاۋعا تىرىسامىن», دەدى ول. زور ۇمىتپەن العا باسقان قادامدارىڭا گۇل ءبىتسىن دەپ تىلەدىك ءبىز.
پەتروپاۆل
