الايدا سىرقاتقا ۇشىراپ قالعان جانداردىڭ دەرەكتەرى جىلدام وزگەرەدى. ماسەلەن, 23 مامىرداعى دەرەك بويىنشا 10 ادام اۋىردى دەسە, 24 مامىردا ول 45-كە ءبىر-اق جەتكەن. ونىڭ 39-نىڭ بويىنان جامان ىندەتتىڭ نىشاندارى اشىق بىلىنگەن. سىرقاتتىڭ ەڭ كوپ تابىلعان جەرى – پەتروپاۆل قالاسى. بارلىق سىرقاتتىڭ 29-ى وسى وبلىس ورتالىعىنان تابىلعان. ودان كەيىنگى كوپ تابىلعان جەر – تايىنشا اۋدانى. مۇندا 9 ادام سىرقاتقا ۇشىراعان. ال اقجار, م.جۇماباەۆ
اۋداندارىنان ەكى-ەكىدەن سىرقاتقا ۇشىراعان ادام تىركەلدى. ال اۋرۋدان جازىلعان ادامداردىڭ سانى تيىسىنشە 44 جانە 10.
پەتروپاۆل قالاسىنىڭ كوپشىلىك ورىندارىنىڭ بارىنە تەك ماسكامەن عانا كىرۋ قاتاڭ ساقتالۋدا. كۇزەت قىزمەتتەرى ونى ءجىتى قاداعالايدى. الايدا ءدامحانالار مەن مەيرامحانالاردىڭ سىرتقى ەسىكتەرىنەن كىرۋ ارقىلى ويىن-توي وتكىزۋشىلەر جازعا سالىم بۇرىنعىدان كوبەيىپ كەلەدى. پوليتسيانىڭ مالىمەتتەرىندە بۇرىنعىعا قاراعاندا مۇندايلار كوپ ايتىلاتىن بولدى.
24 مامىرداعى مالىمەت بويىنشا, وڭىردە سىرقاتقا ۇشىراعانداردىڭ جالپى سانى –
14 527, ال ايىققانداردىڭ سانى – 13 983 ادام. ۆاكتسينا ەگۋ دە سوڭعى ۋاقىتتا ءسال سايابىرلاپ قالعانىمەن جالعاسۋدا. ءىرى سۋپەرماركەتتەردە ۆاكتسينا ەگەتىن كابينەتتەر ۇيىمداستىرىلعان. قازىر وبلىستا 70 مىڭداي ادام ۆاكتسينانىڭ العاشقى كومپونەنتتەرىن, ال 34 مىڭداي ادام تولىق ەكپە الدى.
جامان ىندەتتىڭ كوبەيۋىنە رەسەيمەن ەكى اراداعى شەكارانىڭ كەڭىرەك اشىلۋى ىقپال ەتىپ وتىر. ويتكەنى قازىر اتا-اجەسىنە, تۋعان اعا-اپاسى مەن ءىنى-قارىنداسىنا بارۋعا دا رۇقسات بەرىلگەن. رەسەي فەدەراتسياسى بۇرىن تەك اتا-انا مەن بالالارىنا عانا بارۋعا رۇقسات بەرسە, قازىر باسقا تۋىستارعا بارۋىنا دا رۇقسات ەتىلگەن. سونىمەن بىرگە ەاەو ەلدەرىنە مۇشە ەلدەردىڭ ازاماتتارىنا دا ەركىن ەنۋگە رۇقسات بەردى. ياعني ەاەو ەلدەرىنىڭ ازاماتتارى قازاقستان ارقىلى رەسەيگە كىرۋگە رۇقسات الدى.
قالاي دەسەك تە جامان ىندەتتىڭ جايىلۋى سايابىرلاپ كەلەدى.
سولتۇستىك قازاقستان وبلىسى
