جەر-جاھانداعى قالىپتاسقان احۋالعا بايلانىستى ءداستۇرلى فەستيۆال ادەتتەگى قالپىن وزگەرتىپ, ونلاين فورماتتا ۇيىمداستىرىلدى. اۋقىمدى شارا ءارتۇرلى سانات بويىنشا جىل سايىن وتكىزىلەدى. تەمىرلان مەن ەرنات 68 مەملەكەتتىڭ وكىلىمەن دوداعا قاتار ءتۇسىپ, 1-ءشى ورىندى يەلەندى.
«فەستيۆالدىڭ العاشقى كەزەڭىندە قۇرمانعازى مەن نۇرعيسا تىلەنديەۆتىڭ كۇيلەرىنەن كۇي-شاشۋ ورىندادىق. ال گراند-فينالدا ءۆيۆالديدىڭ «جىل مەزگىلدەرى» تسيكلىندەگى «جاز» تۋىندىسىن ۇسىندىق. دالىرەك ايتساق, ونىڭ ءوزىمىز وڭدەگەن نۇسقاسىن تارتۋ ەتتىك. اقتىق سىنعا ارنالعان تاماشا بەينە باياندى ۇلىبريتانيادان كەلگەن ماماندار ءتۇسىردى», دەيدى تەمىرلان ولجاباي.
Golden Time Talent ۇيىمداستىرۋشىلارى قازاقستاندىق تالانتتاردى 2018 جىلى گولليۆۋدتا وتكەن حالىقارالىق World Championships كونكۋرسىندا بايقاعان ەكەن. ءدال وسى دودادا تەمىرلان مەن ەرنات توپ جارعان بولاتىن. سول كەزدە-اق ولارعا فەستيۆالگە قاتىسۋ تۋرالى ۇسىنىس تۇسكەن.
«جەڭىسكە جەتكەنىمىزگە قۋانىشتىمىز. ۇيىمداستىرۋشىلار بىزگە كەلىسىمشارت ۇسىنىپ وتىر. بۇيىرتسا, الەمدەگى ەپيدەميالىق جاعداي تۇراقتالىپ, ۇشاقپەن قاتىناۋ قالىپقا تۇسكەن سوڭ, ۇلىبريتانياعا بارىپ كونتسەرت بەرمەكپىز», دەيدى ەرنات ناۋرىز.
تەمىرلان مەن ەرنات – ەلورداداعى قازاق ۇلتتىق ونەر ۋنيۆەرسيتەتىنىڭ تۇلەكتەرى. 2017 جىلدان بەرى جۇپ قۇراپ, جۇرتشىلىقتى ءتانتى ەتىپ كەلەدى. بۇگىنگە دەيىن دومبىراشى جىگىتتەر ديماش قۇدايبەرگەنمەن بىرگە قىتايدا وتكەن I'm a Singer كونكۋرسىندا ونەر كورسەتتى. سونداي-اق جوعارىدا اتاپ وتكەنىمىزدەي, World Championships دوداسىندا توپ جاردى. بۇدان بولەك, تۇركيا مەن يزرايلدە جانە ەۋروپانىڭ بىرقاتار قالالارىندا ونەرىن پاش ەتكەن.
قوس تالانت ەندى وسى جىلى تۇركيا مەن دۋبايدا جەكە كونتسەرت بەرمەك. قازىر جاۋاپتى شاراعا قىزۋ دايىندىق ءجۇرىپ جاتىر.
