ءماجىلىس توراعاسى نۇرلان نىعماتۋليننىڭ پىكىرىنشە, ەندى اتا-انالار بالالارىنىڭ مۇگەدەكتىگىن دالەلدەۋ ءۇشىن كابينەت جاعالاپ, قۇجات جيناماي, تسيفرلىق تەحنولوگيانىڭ تيىمدىلىگىن قولدانۋ قاجەت.
بالالاردىڭ مۇگەدەكتىك ساناتىن انىقتاۋ ءراسىمى جەڭىلدەتىلگەن جانە بەلسەندى تۇردە جۇرگىزۋ كەرەكتىگىن ايتقان ءماجىلىس توراعاسى ەڭبەك جانە حالىقتى الەۋمەتتىك قورعاۋ مينيسترلىگىن دەنساۋلىق ساقتاۋ مينيسترلىگىمەن بىرلەسىپ, ءىس-قيمىل جوسپارىن جاساۋ قاجەتتىگىنە نازار اۋداردى.
ن.نىعماتۋليننىڭ ايتۋىنشا, اتا-انالار تاراپىنان نارازىلىق بولدىرماۋ ءۇشىن اقپاراتتىق جۇيەلەردىڭ بارلىق ينتەگراتسيالىق پروتسەستەرىن تەز اياقتاپ, بارلىق قول جەتىمدى تسيفرلىق تەحنولوگيالاردى قولدانۋ ءتيىس.
سونداي-اق ءماجىلىس توراعاسى وسىنىڭ بارلىعىن حالىققا دۇرىس ءتۇسىندىرۋ كەرەكتىگىن ايتىپ, ول ءۇشىن ءتيىستى زاڭنامالىق شارالار قابىلدانعانىن جەتكىزدى.
ايتا كەتۋ كەرەك, زاڭ جوباسىندا 1-توپتاعى مۇگەدەكتەرگە كۇتىم جاسايتىن ادامدارعا 1,4 ەڭ تومەن كۇنكورىس دەڭگەيى مولشەرىندە جاردەماقى ەنگىزۋ; مۇگەدەك بالالارعا مۇگەدەكتىگى بويىنشا جانە اسىراۋشىسىنان ايىرىلۋ جاعدايى بويىنشا جاردەماقىلاردى ءبىر مەزگىلدە الۋ قۇقىعىن بەرۋ, بۇل مۇگەدەك بالالارى بار جانە اسىراۋشىسىنان ايىرىلعان وتباسىلاردىڭ كىرىسىن ارتتىرۋعا مۇمكىندىك بەرەدى (نورما 2 مىڭنان استام ادامعا اسەر ەتەدى); سونداي-اق, مۇگەدەك بالا تاربيەلەپ وتىرعان وتباسىلارعا مەملەكەتتىك تۇرعىن ءۇي قورىنان تۇرعىنجاي الۋ كەزەكتىلىگىن بالا 18 جاسقا تولعان جاعدايدا دا ساقتاۋ كوزدەلەدى.
