وسىعان بايلانىستى, بىرقاتار ءۇندى كومپانيالارىنىڭ باسشىلىعى قازاقستاننىڭ نيۋ-دەليدەگى ەلشىلىگىنە ءوز حاتتارىن جولداپ, بۇكىل الەم ءۇشىن وسىنداي قيىن ۋاقىتتا ىنتىماقتاستىق پەن قولداۋ كورسەتكەنى ءۇشىن شىنايى ريزاشىلىعىن ءبىلدىردى.
«2021 جىلعى 13 جانە 14 مامىردا قازاقستاننان جەتكىزىلگەن مەديتسينالىق كومەك كوپتەگەن ادامداردىڭ ءومىرىن ساقتاپ قالۋعا كومەكتەسەتىنى ءسوزسىز. ۇندىستاندىقتار بۇل اسىل يشاراتتى ارقاشان ەستە ساقتايدى», دەپ كورسەتىلگەن.
بۇدان بۇرىن حابارلانعانداي, اتالعان كۇندەرى نيۋ-دەلي اۋەجايىنا جالپى سالماعى 40 تونناعا جۋىق گۋمانيتارلىق كومەك جۇگى بار ەكى قازاقستاندىق اۋە كەمەسى كەلدى. كومەكتىڭ ىشىندە دەنساۋلىق ساقتاۋ سالاسىنداعى قازاقستاندىق ءوندىرۋشى كومپانيالاردىڭ مەديتسينالىق ماسكا, رەسپيراتور, قورعانىس كوستيۋم جانە وكپەنى جاساندى جەلدەتۋدىڭ ءپورتاتيۆتى اپپاراتتارى بار.
ەستەرىڭىزگە سالا كەتەيىك, 2021 جىلعى 4 مامىردا قازاقستان پرەزيدەنتى قاسىم-جومارت توقاەۆ ءۇندىستان پرەمەر-ءمينيسترى نارەندرا موديگە جولداۋ جىبەرگەن, وندا ء«ۇندىستاندا COVID-19 ىندەتىنىڭ قاتتى ورشۋىنە بايلانىستى قالىپتاسقان قيىن-قىستاۋ كەزەڭدە ءۇندى ەلىنىڭ قايعى-قاسىرەتىنە ورتاق ەكەنىن جەتكىزگەن» بولاتىن, ال 7 مامىردا قازاقستان ۇكىمەتىنە ءۇندى تاراپىنا ءتيىستى كومەك كورسەتۋدى تاپسىردى.
قازاقستان مەن ءۇندىستاندى ەكى ەل حالىقتارى اراسىنداعى ءداستۇرلى دوستىق پەن ءوزارا جاناشىرلىق رۋحىندا ستراتەگيالىق ارىپتەستىك قاتىناستار بىرىكتىرەتىنىن اتاپ وتكەن ءجون.
