پرەزيدەنت قاسىم-جومارت توقاەۆقا قوستاناي ءوڭىرىنىڭ بيىلعى ءتورت ايداعى الەۋمەتتىك-ەكونوميكالىق دامۋ قورىتىندىلارى مەن بۇعان دەيىن بەرىلگەن تاپسىرمالاردىڭ ورىندالۋى جونىندە ەسەپ بەرىلدى.
ارحيمەد مۇحامبەتوۆتىڭ ايتۋىنشا, وڭدەۋ ونەركاسىبى, نەگىزگى كاپيتالعا ينۆەستيتسيا سالۋ جانە تۇرعىن ۇيلەردى پايدالانۋعا بەرۋ سالالارى بويىنشا وڭ كورسەتكىشتەر بار. قوستانايدا قۇنى شامامەن 80 ميلليارد تەڭگە بولاتىن جاڭا شويىن قۇيۋ زاۋىتىنىڭ قۇرىلىسى ءجۇرىپ جاتىر. اتالعان كاسىپورىندا 300-گە جۋىق جاڭا جۇمىس ورنى اشىلادى.
مەملەكەت باسشىسىنا ەلىمىزدەگى العاشقى وقشاۋلاۋ ورتالىعى قۇرىلىسىنىڭ بارىسى مەن Kia جانە Renault اۆتوموبيلدەرىن قۇراستىرۋدىڭ جاڭا جەلىسىنىڭ ىسكە قوسىلعانى تۋرالى باياندالدى. جىل باسىنان بەرى وڭىردە 16 459 اۆتوموبيل, ونىڭ ىشىندە, 15 599 جەڭىل اۆتوموبيل, 736 جۇك كولىگى جانە 124 اۆتوبۋس شىعارىلدى. جىل سوڭىنا دەيىن 60 مىڭ اۆتوكولىك قۇراستىرۋ جوسپارلانعان.
قوستاناي وبلىسى اكىمىنىڭ ايتۋىنشا, بۇگىندە 2,8 ميلليون گەكتار القاپقا ءداندى داقىل جانە 500 مىڭ گەكتار جەرگە مايلى داقىل ەگىلگەن. ەگىس ناۋقانى 1 ماۋسىمعا قاراي اياقتالادى.
سونىمەن قاتار پرەزيدەنتكە قوستاناي وبلىسىنداعى ەپيدەميولوگيالىق جاعداي تۋرالى مالىمەت بەرىلدى. مەكەمەلەر تالاپقا ساي مەديتسينالىق جابدىقتارمەن قامتاماسىز ەتىلگەن. ءدارى-دارمەك پەن جەكە قورعانىس قۇرالدارىنىڭ قورى دا جەتكىلىكتى.
505 مىڭ ازاماتقا ۆاكتسينا ەگۋ جوسپارلانسا, بۇگىنگە دەيىن 80 مىڭنان استام ادامعا ەكپە سالىنعان. سونداي-اق «Ashyq» ءموبيلدى قوسىمشاسى بەلسەندى ەنگىزىلۋدە. قازىرگى تاڭدا كاسىپكەرلەردەن 270 ءوتىنىم قابىلدانعان.
كەزدەسۋ قورىتىندىسى بويىنشا قاسىم-جومارت توقاەۆ وڭىردەگى ەلدى مەكەندەردى تازا سۋمەن قامتاماسىز ەتۋ, سونداي-اق, ارقالىق جىلۋ ەلەكتر ورتالىعىن جاڭعىرتۋ جۇمىستارىن تەزدەتىپ اياقتاۋ جونىندە بىرقاتار ناقتى تاپسىرما بەردى.
