الەكساندر مەكتەپتى تامامداعان سوڭ ءۇش ءتۇرلى تەحنيكالىق ماماندىق بويىنشا ءبىلىم العان. 8 جىلدان بەرى قوستاناي اۆتوجول كوللەدجىندە ساباق بەرىپ ءجۇر.
– مەن ىشتەن جاناتىن قوزعالتقىشتىڭ قىر-سىرىن, ونىڭ ارتىق-كەم تۇستارىن جاقسى بىلەمىن. دەگەنمەن ەلەكتر موتورلارى مەن كۇننەن قۋات الاتىن پانەلدەر بالا كەزىمنەن ەرەكشە قىزىقتىراتىن. جالپى, ەلەكترترانسپورتتار تۋرالى تانىم-تۇسىنىگىم قازىرشە تەوريالىق دەڭگەيدە عانا. ويتكەنى بۇل سالاعا قاتىستى نەشە ءتۇرلى پىكىر بار, ولاردىڭ ءبىرازى ءبىر-بىرىنە كەرەعار كەلىپ جاتادى. سوندىقتان ەلەكترقوزعالتقىش پەن بالامالى قۋات كوزدەرىنىڭ كەمشىن جاقتارى مەن باسىم تۇستارىن جەتە ءتۇسىنۋ ماقساتىندا ءوز قولىممەن ەلەكترموپەد قۇراستىرىپ شىعۋدى ءجون سانادىم, – دەيدى الەكساندر.
جاس وقىتۋشى ەلەكتر موپەدىن ءتورت جىل ىشىندە قۇراستىرىپ شىعىپتى. وعان ءبىر جاعىنان قارجى تاپشىلىعى كەدەرگى بولسا, ەكىنشى جاعىنان كەيبىر تەحنيكالىق ماسەلەلەردىڭ تۋىنداۋى سەبەپ بولسا كەرەك. ونەرتاپقىش ەكى اياقتى كولىگىن ءوزى تۇراتىن پاتەردە قۇراستىرىپ شىققان. ايتۋىنشا, موپەدتىڭ موتورىن الماتىدان, قاڭقاسىن ماسكەۋدەن, الدىڭعى دوڭعالاعىن تولياتتيدەن الدىرعان. ءبىرسىپىرا بولشەكتى ينتەرنەت-سايتتار ارقىلى ساتىپ الىپتى. قولدان قۇراستىرىلعان ەلەكتر كولىگىنىڭ جىلدامدىعى ساعاتىنا 72 شاقىرىمعا دەيىن بارادى. بالامالى قۋات كوزىمەن جۇرەتىن موپەد 120 كيلوعا دەيىن جۇك كوتەرە الادى.
– بۇل موپەدتىڭ قوسالقى بولشەكتەرىنىڭ تۇگەلگە جۋىعىن ساتىپ الدىم, جاڭادان ەشتەڭە ويلاپ تابۋدىڭ قاجەتى جوق. بىراق كەيبىر جەرلەرىن وزىمشە ويلاستىرىپ جاساپ شىعۋعا تۋرا كەلدى. مىسالى, ەلەكتر سىمدارىن ءوزىم جۇيەلەدىم, ەلەكتر بلوگىن ءوزىم جيناپ شىقتىم. بۇل جۇيە 72 ۆولتقا ەسەپتەلگەن, – دەدى الەكساندر.
قوستانايلىق ونەرتاپقىش ەرەكشە جوباسىن تۇبەگەيلى اياقتاپ, كولىگىن سىناقتان وتكىزۋ ءۇشىن ءوزى تاپسىرىس بەرگەن ليتي-تەمىر-فوسفاتتى قۋاتتاندىرعىشتىڭ كەلۋىن كۇتىپ وتىر.
قوستاناي وبلىسى
