شاميل دۇيسەنعازى ۇلى الماتى قالاسىندا دۇنيەگە كەلگەن. شاھارداعى №173 مەكتەپ-ليتسەيدى ۇزدىك ءتامامداپ, ەلورداداعى KAZGUU ۋنيۆەرسيتەتىنە تۇسەدى. ورتاسىنان ەرەن شىعىپ, ءبىلىم ورداسىنداعى جاستار ۇيىمىن باسقارادى. كەيىننەن رەسپۋبليكا كولەمىندەگى «ستۋدەنتتىك ۇيىمداردى باعالاۋ» جۇيەسىن جاڭعىرتىپ, جاڭا دەڭگەيگە كوتەرۋگە ىقپالىن تيگىزەدى. ودان وزگە, سۋلەيمەن دەميرەل اتىنداعى ۋنيۆەرسيتەتتە جاستار كوميتەتىن قولعا الىپ, العاشقىلاردىڭ ءبىرى بولىپ Academic زاڭ كلينيكاسىنىڭ نەگىزىن قالايدى. قازىرگى تاڭدا ول باسشىلىق جاسايتىن Menin Armanym قورى ىلگەرى قادامدار جاساپ جاتىر. سونىڭ دالەلى – اتالعان قور ەرىكتىلەرمەن بىرگە ونكولوگيالىق اۋرۋعا شالدىققان 31 بالانىڭ ارمانىن ورىندادى. جالپى, قور جۇمىسى ارنايى توقسانعا بولىنگەن. سونىڭ ناتيجەسىندە, ناۋرىز ايىنا دەيىن 20 بالانىڭ, ال وسى ءساۋىر ايىندا تاعى 11 بالانىڭ ارمانىن ورىنداۋعا اتسالىسقان.
قوردىڭ نەگىزگى باعدارى بۇكىل رەسپۋبليكاعا باعىتتالعان. قازىردىڭ وزىندە الماتى قالاسى جانە تۇركىستان, باتىس قازاقستان وڭىرلەرىندە ءىرى جوبالار ىسكە استى. مۇنداي اۋىر دەرتكە شالدىققان بالالالاردى ەمدەيتىن ەڭ ءىرى ورتالىق الماتى قالاسىندا ورنالاسقاندىقتان, باستى رەسۋرستى وسى وڭىرگە جۇمساپ وتىر. الماتى قالاسى بويىنشا 18 بالانىڭ, وبلىس بويىنشا 7 بالانىڭ قالاۋىمەن ايتۋلى ءىس-شارالار جۇزەگە اسىرىلدى. قالعان بالالار تۇركىستان جانە باتىس قازاقستان وبلىستارىنان بولدى.
جۋىردا ۇيىم وكىلدەرى مۇحيت اسىپ, قۇپياعا تولى مىسىر ەلىنە ساياحاتتاپ كەلدى. ولار كونە مىسىرعا فاريزا ەسىمدى قىزدىڭ ارمانىن ورىنداۋعا باردى. ساپار بارىسى قانشالىقتى قيىن ءارى قىزىق بولعانىن شاميل دۇيسەنعازى ۇلىنىڭ ءوزى تارقاتىپ بەردى.
«بۇل ساپار – قوردىڭ مەرەيتويىنا تۇسپا-تۇس كەلگەن 25-ارمانىمىز. نەگە دەسەڭىز, ەرىكتىلەرمەن بىرگە قىسقا ۋاقىت ارالىعىندا 7 جاس پەن 18 جاس اراسىنداعى بالالاردىڭ ارمانىن ورىنداۋعا ءبىر جەڭنەن – قول, ءبىر جاعادان – باس شىعارىپ كەلەمىز. فاريزا سۇلەيمەنگە توقتالساق, ول – قىزىلوردا وبلىسى قازالى اۋدانىنىڭ تۋماسى. سول اۋىلدا وقىپ ءجۇرىپ, ونكولوگيالىق اۋرۋمەن اۋىرادى. قازالى اۋدانىنا ارىپتەسىم ولجاس ەسپانمەن بىرگە بارىپ قايتتىق. فاريزا بۇگىنگى تاڭدا مەكتەپتەگى 11-سىنىپتا ءبىلىم الىپ ءجۇر. ونى ەلىمىزگە تانىمال بىلىكتى حيرۋرگ مامان ەمدەگەن ەكەن. ءبىز بارعان كەزدە دەنساۋلىعى ءبىرشاما قالپىنا كەلگەن كورىنەدى. سەبەبى بۇعان دەيىن ونىڭ ءتىپتى مەكتەپكە بارىپ, ساباق وقۋعا دا دەنساۋلىعى مۇمكىندىك بەرمەگەن», دەيدى قور ديرەكتورى.
شاميل دۇيسەنعازى ۇلىنىڭ ايتۋىنشا, الىس ساپارعا وتاندىق تۋريستىك كومپانيا قولداۋ كورسەتكەن. بۇل ارماندى ورىنداۋ وزگە ارماندارعا قاراعاندا وتە قيىن بولعان كورىنەدى.
«بۇل ارماندى ورىنداۋعا ءبىر ايدان اسا ۋاقىت كەتتى. بۇل كەزدە فاريزانىڭ باسىندا اپپارات بولعاندىقتان, كوپ شۋىلدى كوتەرە المايتىن ەدى. سونى بىلگەننەن كەيىن ونىڭ دارىگەرىنەن رۇقسات الىپ, اتا-اناسىنان قولحات الدىق. ايتارلىقتاي تاۋەكەلگە باردىق. ەڭ قۋانىشتىسى, ساپارىمىز ويداعىداي بولدى. باسقا بالالاردىڭ ارمانىنىڭ ورىندالۋ ۋاقىتى ءبىر كۇن بولسا, ال فاريزانىكى ءتورت كۇنگە سوزىلدى. شارم ءال-شەيح كۋرورتتىق ايماعىنا باردىق. ەندى وسىنداي مەرەيتويلىق ساتتەردى كەڭ كولەمدە وتكىزۋگە تىرىسامىز», دەيدى شاميل دۇيسەنعازى ۇلى.
قازىرگى كۇنى Menin Armanym قورى كولدىڭ تامشىسىنداي بولسا دا, ءبىراز اسۋدى باعىندىرىپ جاتىر. باسقا قورلارعا قاراعاندا, ايتۋلى جەتىستىكتەرى بار. اقش-تاعى Make-A-Wish Foundation, كورشىلەس رەسەيدەگى «مەچتاي سو منوي» دەگەن جوبالار سەكىلدى ءوز ومىرشەڭدىگىن كورسەتۋ ۇستىندە.
