دەنساۋلىق ساقتاۋ باسقارماسىنىڭ مالىمەتىنشە, 1 اقپاننان باستاپ قاراعاندى وبلىسىندا 70 189 تۇرعىن ۆاكتسينالانعان. ال 20 مامىرعا دەيىن 149 352 ادام ەكپەنىڭ ءبىرىنشى كومپونەنتىن الىپتى. بۇل ءتيىستى كونتينگەنتتىڭ 19,1%-ىن قۇرايدى. ونىڭ ىشىندە QazVac ەكپەسىن – 1 875 ادام, ال Sinopharm ەكپەسىن 5 865 ادام العان. ەكىنشى كومپونەنتتى 80 201 ادام الدى, ياعني بۇل ءتيىستى كونتينگەنتتىڭ 53,8%-ىن قۇرايدى.
جالپى, بۇگىنگە دەيىن قاراعاندى وبلىسىندا كوروناۆيرۋس ينفەكتسياسىن جۇقتىرۋدىڭ 28 876 جاعدايى تىركەلگەن, قايتىس بولعاندار تىزىمىندە 341 ادام بار. بۇل كورسەتكىشتى نەگىزىنەن 60 جاستان اسقان جانە سوزىلمالى اۋرۋلارى بار ادامدار قۇرايدى.
جۋىردا وبلىستاعى جۇمىس ساپارى اياسىندا دەنساۋلىق ساقتاۋ ءمينيسترى الەكسەي تسوي كوروناۆيرۋس ينفەكتسياسىمەن كۇرەس جونىندەگى وڭىرلىك شتاب وتىرىسىنىڭ جۇمىسىنا قاتىستى. اتالعان جيىندا وڭىردە COVID-19 ىندەتىمەن اۋىرۋدىڭ كۇردەلى جاعدايى ساقتالىپ وتىرعانى ءسوز بولدى. وسى ورايدا وبلىسقا ادىستەمەلىك جانە پراكتيكالىق كومەك كورسەتۋ ءۇشىن كەلگەن جۇمىس توبى كوروناۆيرۋس ينفەكتسياسىمەن كۇرەسۋ شارالارىن كۇشەيتۋ بويىنشا بىرقاتار مىندەتتى انىقتاپ, تالداۋ جۇرگىزدى. وتىرىس بارىسىندا العاشقى مەديتسينالىق-سانيتارلىق كومەك ۇيىمدارىنىڭ كۆي-مەن كۇرەس اياسىندا قابىلداناتىن شارالار بويىنشا ماسك ۇيىمدارىنىڭ, مۋلتيديستسيپلينارلىق كونسۋلتاتسيالىق دارىگەرلىك توپتاردىڭ قىزمەتىنە تالداۋ جۇرگىزۋ, وبلىستىق احۋالدىق ورتالىقتىڭ مۇمكىندىگىن تولىقتاي پايدالانۋ تۋرالى ۇسىنىستار ايتىلدى. سونىمەن قاتار كۆي بار پاتسيەنتتەرگە ستاتسيونارلىق كومەك كورسەتەتىن امبۋلاتوريالىق-ەمحانالىق ۇيىمدار مەن مەديتسينالىق ۇيىمدارعا نازار اۋدارۋ قاجەتتىلىگى بار بىرقاتار ءىس-شارالار تۋرالى ءسوز بولدى. شتاب وتىرىسىندا وڭىردەگى ەپيدەميالىق جاعداي جانە ونى جاقسارتۋ ءۇشىن قابىلدانىپ جاتقان ءىس-شارالار تۋرالى سانيتارلىق-ەپيدەميولوگيالىق باقىلاۋ كوميتەتىنىڭ باسشىسى ايجان ەسماعامبەتوۆا ايتىپ بەردى.
وتكەن اپتاداعى جاعداي بويىنشا قاراعاندى وبلىسىندا 28 550 ناۋقاس تىركەلىپ, 471-ءى قايتىس بولعان. بۇگىنگى كۇندە پاتسيەنتتەردىڭ 24 930-ى ساۋىعىپ كەتتى, ال 3 313-ءى ەمدەلۋدى جالعاستىرۋدا. ەپيدەميالىق جاعدايدى باعالاۋ ماتريتساسىنا سايكەس قازىرگى ۋاقىتتا قاراعاندى وبلىسى «قىزىل ايماقتا» ءبىر ايدان استام ۋاقىت تۇر.
شتاب وتىرىسىندا قاراعاندى وبلىستىق دەنساۋلىق ساقتاۋ باسقارماسىنىڭ باسشىسى گامال توقسامباەۆ ينفەكتسيالىق گوسپيتالدىق ينفراقۇرىلىمدى دامىتۋ, اۋرۋدى ەرتە انىقتاۋ ءۇشىن مەديتسينالىق كومەك كورسەتۋدىڭ باستاپقى بۋىنىن جەتىلدىرۋ, ءۇي ستاتسيونارلارى جاعدايىندا ۋاقتىلى وقشاۋلاۋ جانە ەمدەۋ جايىندا تولىققاندى ماعلۇمات بەردى. بۇدان بولەك ول قاجەت بولعان جاعدايدا جۇمىسقا رەزيدەنتۋرا مەن ينتەرناتۋرا وقۋشىلارى تارتىلاتىنىن, ستاتسيونارلار مەن ەمحانالاردا قاجەتتى دارىلىك زاتتاردىڭ, مەديتسينالىق بۇيىمداردىڭ جانە جەكە قورعانىش قۇرالدارىنىڭ ءۇش ايلىق قورى قۇرىلعانىن اتاپ ءوتتى.
وبلىستىڭ باس دارىگەرى تۇرعىنداردى يممۋنداۋدىڭ ماڭىزى زور ءىس ەكەنىنە باسا نازار اۋداردى. ەپيدەميالىق احۋالدىڭ كەز كەلگەن وزگەرىستەرىنە جەدەل دەن قويۋ ءۇشىن اپتا سايىن ماتريتسا ازىرلەنىپ, وعان سايكەس ءاربىر ەلدى مەكەن ءۇشىن كارانتيندىك شارالاردى تۇراقتى تۇزەتۋ جۇرگىزىلىپ وتىرعانىن باياندادى. سونىڭ ناتيجەسىندە دەنساۋلىق ساقتاۋ جۇيەسىنە اسا جۇكتەمە ارتپاي, وبلىستا اۋرۋدىڭ قارقىندى ءوسۋىن بولدىرماۋدى ەسكەرتۋ مۇمكىن بولعان.
قاراعاندى وبلىسى
