ەۋروپا چەمپيوناتىنىڭ جەرەبە تارتۋ ءراسىمى 2019 جىلدىڭ 30 قاراشاسىندا رۋمىنيانىڭ استاناسى – بۋحارەستتە وتكەن ەدى. سونىڭ قورىتىندىسى بويىنشا 24 كوماندا ءتورت-تورتتەن التى توپقا ءبولىندى. ولار 11 ماۋسىم مەن 11 شىلدە ارالىعىندا جارىس كورىگىن قىزدىرىپ, چەمپيون مەن جۇلدەگەرلەردى انىقتايدى. سونىمەن, توپتىق تۋرنيردە تومەندە كورسەتىلگەن مەملەكەتتەر وكىلدەرى ءوزارا شەبەرلىك بايقاسادى:
ا توبى: تۇركيا, يتاليا, ۋەلس جانە شۆەيتساريا. ويىندار ريم مەن باكۋدە وتەدى.
ۆ توبى: دانيا, فينليانديا, بەلگيا جانە رەسەي. ويىندار كوپەنگاگەن مەن سانكت-پەتەربۋرگتە وتەدى.
س توبى: نيدەرلاند, ۋكراينا, اۋستريا جانە سولتۇستىك ماكەدونيا. ويىندار بۋحارەست پەن امستەردامدا وتەدى.
D توبى: انگليا, حورۆاتيا, شوتلانديا جانە چەحيا. ويىندار لوندون مەن گلازگودا وتەدى.
ە توبى: يسپانيا, شۆەتسيا, پولشا جانە سلوۆاكيا. ويىندار سانكت-پەتەربۋرگ پەن سەۆيليادا وتەدى.
F توبى: ماجارستان, پورتۋگاليا, فرانتسيا جانە گەرمانيا. ويىندار بۋداپەشت پەن ميۋنحەندە وتەدى.
تۇساۋكەسەر كەزدەسۋ كونە قالا – ريمدە ۇيىمداستىرىلىپ, وندا يتاليا مەن تۇركيا قۇرامالارى كۇش سىناسادى. ءار توپتىڭ ۇزدىك ەكى كومانداسى پلەي-وفف كەزەڭىنە جولداما الادى. ءۇشىنشى ورىندى يەلەنگەندەر اراسىنان مولىراق ۇپاي جيناعان ءتورت ەلدىڭ وكىلدەرى دە ءدال سونداي قۇرمەتكە بولەنەدى. 1/8 فينالدىق كەزدەسۋلەر 26-29 ماۋسىم كۇندەرى وتەدى. 2-3 شىلدە كۇندەرى شيرەك فينالدىق ماتچتاردىڭ كۋاسى بولامىز. 6-7 شىلدەدە جارتىلاي فينالدىق جانە 11 شىلدەدە اقتىق سايىستاردى تاماشالايمىز. شەشۋشى ويىنداردىڭ ۇشەۋىن دە انگليانىڭ استاناسى – لوندون قابىلدايدى.
«ەۋرو-2020» باسەكەلەرى بارىسىندا ەرەكشە نازار اۋدارۋعا تۇرارلىقتاي بىرنەشە جايت بار. قارت قۇرلىقتىڭ باستى دوداسىندا العاش رەت VAR جۇيەسى قولدانىلادى. ءاربىر ماتچ بارىسىندا بەس ويىنشىنى الماستىرۋعا بولادى. ەگەر ويىن قوسىمشا ۋاقىتقا ۇلاسسا, وندا التىنشى فۋتبولشىنى الماستىرۋعا رۇقسات بەرىلەدى. سونىمەن قاتار ءار ەلدىڭ ۇلتتىق قۇراماسى ساپىندا بۇرىنعىداي 23 ەمەس, 26 ويىنشى جاسىل الاڭعا شىعا الادى.
ويىندار وتەتىن ستاديوندار جايىندا قىسقاشا مالىمەت بەرە كەتەيىك.
ەۋروپا چەمپيوناتىنىڭ ويىندارى لوندونداعى «ۋەمبلي» (90 000 كورەرمەنگە ەسەپتەلگەن), ميۋنحەندەگى «اليانتس ارەنا» (75 000), ريمدەگى «وليمپيادالىق ستاديون» (72 698), باكۋدەگى «وليمپيادالىق ستاديون» (70 000), بۋداپەشتتەگى «فەرەنتس پۋشكاش اتىنداعى ستاديون» (65 156), سانكت-پەتەربۋرگتەگى «گازپروم ارەنا» (61 000), سەۆيلياداعى «وليمپيادالىق ستاديون» (60 000), بۋحارەستتەگى «ۇلتتىق ستاديون» (54 851), امستەردامداعى «يوحان كرويف ارەنا» (53 052), كوپەنگاگەندەگى «پاركەن» (51 711) جانە گلازگوداعى «حەمپدەن پارك» (51 472) سىندى تالاي جىلعى تاريحى بار ءزاۋلىم ستاديونداردا وتەدى.
بيىلعى ەۋروپا چەمپيوناتىنىڭ جۇلدە قورى دا وتە قوماقتى. قاتىسۋشى كوماندالاردىڭ بارلىعىنا 9,25 ميلليون ەۋرودان تاپسىرىلدى. توپتىق تۋرنيردەگى ءاربىر جەڭىس 1,5 ميلليونعا باعالانسا, ۇپاي بولىسكەن جاعدايدا سول سومانىڭ تەڭ جارتىسى بەرىلەدى. پلەي-وففقا جولداما العاندار 2 ميلليوننان ەنشىلەسە, شيرەك فينالعا شىققاندار 3,25 ميلليوننان يەمدەنەدى. جارتىلاي فينالعا دەيىن جەتكەندەردىڭ ەسەپشوتىنا 5 ميلليون اۋدارىلادى. كۇمىسپەن كۇپتەلگەن قۇراما 7 ميلليون السا, چەمپيوندىق اتاققا قول جەتكىزگەنى 10 ميلليون ەۋرونى ولجالايدى.
