جامبىل وبلىسىنىڭ اكىمى بەردىبەك ساپارباەۆتىڭ باستاماسىمەن وبلىستا «جومارت تۇلەك» جوباسى قولعا الىنعان بولاتىن. ونداعى ماقسات – تۋعان جەردەن تۇلەپ ۇشقان, ءتۇرلى سالادا تابىستى ەڭبەك ەتىپ جۇرگەن تۇلەكتەردىڭ ءومىر جولىن جاس ۇرپاققا ۇلگى ەتۋ, سونىمەن قاتار, وسى ازاماتتاردىڭ اتسالىسۋىمەن تۋعان جەردىڭ الەۋمەتتىك ماسەلەلەرىنە قاتىستى شارالاردى قابىلداۋ جانە ماڭىزدى جوبالاردى ىسكە اسىرۋ ەدى.
تۋعان جەردىڭ دامۋىنا ۇلەس قوسىپ جۇرگەن تانىمال ازاماتتاردىڭ باسىن قوسقان «جومارت تۇلەك-2021» فورۋمى قاراتاۋ قالاسىندا دا ۇيىمداستىرىلدى. شاراعا كىندىك قانى تالاس توپىراعىنا تامىپ كەيىن ەلىمىزگە بەلگىلى بولعان تۇلعالارمەن قاتار, قايىرىمدى ىستەرگە ۇيىتقى بولىپ جۇرگەن كاسىپكەرلەر قاتىستى.
فورۋمدا تۇلەكتەردىڭ ايماقتىڭ دامۋىنا قوسقان ۇلەستەرىن ەرەكشە اتاپ وتكەن اۋدان اكىمى قاناتبەك مادىبەك ولاردىڭ ەڭبەكتەرىنە تابىس تىلەدى.
شارا بارىسىندا ءسوز العان جازۋشى, جۋرناليست, جامبىل وبلىسىنىڭ مەملەكەتتىك ءارحيۆىنىڭ ديرەكتورى كوسەمالى ءساتتىباي ۇلى تۋعان جەرىن كوركەيتۋگە قولداۋ تانىتىپ جۇرگەن ازاماتتارعا ريزاشىلىعىن جەتكىزدى.
– ءار ازامات ءوز قابىلەتىنە قاراي كومەك تانىتادى. ماسەلەن, شىعارماشىلىق ادامدارى ەلدىڭ ەسىندە قالاتىن, ولمەس تۋىندىلار سىيلايدى, ءسوز قالدىرادى. كاسىپكەرلەر دەمەۋشىلىك كومەكتەرىن كورسەتەدى. كەيىنگە ۇلگى بولاتىن وسىنداي ازاماتتار سانى ارتسا, ەلىمىز كوركەيەدى, – دەي كەلە «بىتەر ءىستىڭ باسىنا, جاقسى كەلەر قاسىنا» دەمەكشى اۋدان باسشىلىعىنا جاڭادان كەلگەن قاناتبەك قايشىبەك ۇلىنا قاراتاۋ قالاسىنىڭ قاق ورتاسىندا قاشاننان بەرى قاراۋسىز تۇرعان عيماراتتاردىڭ ماسەلەسى شەشىلىپ, حالىق كادەسىنە جاراتۋدى قولعا الساڭىز دەگەن تىلەگىن دە جەتكىزگەن بولاتىن. وسى ورايدا اۋداننىڭ قۇرمەتتى ازاماتى دوسان رىمتاەۆ كوتەرىلگەن باستامانى قولدايتىندىعىن جەتكىزدى. ىزىنشە ءوزى باسقاراتىن سەرىكتەستىك مەنشىگىندەگى جوعارىدا ءسوز بولعان عيماراتتىڭ ءبىرى بۇرىنعى «قاراتاۋ» قوناق ءۇيىن حالىقتىڭ يگىلىگىنە تارتۋ ەتتى.
– كوسەمالى اعامىز ورىندى ماسەلە كوتەرىپ وتىر ەكەن, اۋدان ءۇشىن ايانىپ قالار جايىم جوق. جەرگىلىكتى اكىمدىككە اتالعان عيماراتتى تەگىن تارتۋ ەتەمىن. ءتىپتى, جوندەۋ جۇمىستارىنا دا اتسالىسامىن, – دەدى.
راسىندا قاراتاۋ قالاسىنىڭ قاق ورتاسىنداعى عيمارات ءبىر كەزدەرى ءزاۋلىم قوناق ءۇي بولعان. كەيىن توقسانىنشى جىلدارداعى توقىراۋدا جەكەنىڭ قولىنا ءوتىپ, قاراۋسىز قالدى.
