جوبانىڭ نەگىزگى ماقساتى – مەكتەپ بىتىرگەن تۇلەكتەرمەن مەكتەپ اراسىنداعى بايلانىستى نىعايتۋ جانە جەتىستىككە جەتكەن مەكتەپ تۇلەكتەرىن ناسيحاتتاۋ بولىپ تابىلادى.
قازاق حاندىعىنىڭ تۋى تىگىلگەن شۋ وڭىرىنەن كوپتەگەن مەملەكەت جانە قوعام قايراتكەرلەرى, سونىمەن قاتار ساياساتتانۋشىلار مەن پروفەسسورلار سىندى تالاي تۇلعالار شىققان. شۋ قالاسى, س.سەيفۋللين اتىنداعى ورتا مەكتەپتىڭ تۇلەگى, بىرقاتار مەملەكەتتىك دەڭگەيدەگى قىزمەتتەردە بولعان ماحمۇت قاسىمبەكوۆ, بەلگىلى مەملەكەت جانە قوعام قايراتكەرى, بىرقاتار لاۋازىمدى قىزمەتتەر اتقارعان ساياساتتانۋشى, جاڭاجول اۋىلى, ب.مومىش ۇلى اتىنداعى ورتا مەكتەپتىڭ تۇلەگى سارىباي قالمىرزاەۆ, كەزىندە قر پرەزيدەنتى اكىمشىلىگىنىڭ باسشىسى, پرەزيدەنتتىڭ ءىس باسقارۋشىسى, ەلىمىزدىڭ ەكونوميكالىق سىبايلاس جەمقورلىققا قارسى كۇرەس اگەنتتىگىنىڭ توراعاسى قىزمەتتەرىن اتقارعان, تولە بي اۋىلى, م.اۋەزوۆ اتىنداعى ورتا مەكتەبىنىڭ تۇلەگى قوزى-كورپەش قاربوزوۆ, بىرلىكۇستەم اۋىلى, دومالاق ەنە ورتا مەكتەبىنىڭ جانە شۋ قالاسىنداعى س.سەيفۋللين اتىنداعى ورتا مەكتەپتىڭ تۇلەگى, پارلامەنت ءماجىلىسىنىڭ V-VI شاقىرىلىم دەپۋتاتى قوجاحان جاباعيەۆ, تولە بي اۋىلى, م.اۋەزوۆ اتىنداعى ورتا مەكتەپتىڭ تۇلەگى, سول كەزدەگى وڭتۇستىك قازاقستان وبلىسىندا ءال-فارابي اۋدانىنىڭ اكىمى جانە استانا قالالىق ءتىل باسقارماسىنىڭ باسشىسى قىزمەتتەرىن اتقارعان, پارلامەنت ءماجىلىسىنىڭ V-شاقىرىلىم دەپۋتاتى بولعان ورازكۇل اسانعازى, دومالاق ەنە ورتا مەكتەبىنىڭ تۇلەگى, كەزىندە جامبىل وبلىسىنىڭ اكىمى جانە وزگە دە لاۋازىمدى قىزمەتتەر اتقارعان ءبورىباي جەكسەمبين, شۋ قالاسى, اباي اتىنداعى ورتا مەكتەپتىڭ تۇلەگى, ەلىمىزدىڭ تەمىرجول سالاسىندا لاۋازىمدى قىزمەت اتقارعان جانە جامبىل وبلىسىنىڭ اكىمى قىزمەتىندە بولعان كارىم كوكىرەكباەۆ, م.اۋەزوۆ ورتا مەكتەبىنىڭ تۇلەگى, «شۋ اۋدانىنىڭ قۇرمەتتى ازاماتى», اكادەميك مامبەت قويگەلديەۆ, تولە بي اۋىلى, م.اۋەزوۆ ورتا مەكتەبىنىڭ تۇلەگى, قر جوعارعى وقۋ ورىندارىنىڭ ۇزدىك وقىتۋشىسى, قر پرەزيدەنتىنىڭ «بولاشاق» حالىقارالىق ستيپەندياسىنىڭ يەگەرى وڭعاربەك الىپبەك ۇلى سياقتى ازاماتتار بۇگىندە اۋداننىڭ ماقتانىشى.
ەل تاۋەلسىزدىگىنىڭ 30 جىلدىعىنا وراي وڭىردە تۇڭعىش رەت قولعا الىنعان «جومارت تۇلەك» جوباسى اياسىندا ۇيىمداستىرىلىپ وتىرعان «جومارت تۇلەك – شۋ» تۇلەكتەر كەزدەسۋىن اۋدان اكىمى نۇرجان كالەندەروۆ جۇرگىزىپ وتىردى. اكىم ءوز سوزىندە تۇلەكتەردىڭ اۋىلعا ءجيى قولداۋ كورسەتىپ كەلە جاتقانىن اتاپ ءوتتى. تاۋەلسىزدىك العان جىلداردان بەرى شۋ اۋدانىنىڭ مەكتەپتەرىنەن 30 مىڭنان استام تۇلەك تۇلەپ ۇشقان. بۇل كەزدەسۋگە وفلاين جانە ونلاين فورماتتا 500-گە جۋىق تۇلەكتەر قاتىستى. ەلىمىزدە ءار سالادا جەتىستىككە جەتكەن ازاماتتارمەن قاتار, شۋ اۋدانىندا دۇنيەگە كەلىپ, بۇگىندە تۇركيا, يزرايل, رەسەي, امەريكا جانە تاعى باسقا دا مەملەكەتتەردە تۇرىپ جاتقان جەرلەستەر دە قاتىستى.
سونىمەن قاتار د.قوناەۆ اۋىلىنداعى تولە بي اتىنداعى ورتا مەكتەپ بازاسىنان «تۇلەكتەر ورتالىعى» اشىلدى. ول جەردە اۋداننان شىققان كوپتەگەن بەلسەندى «جومارت جۇرەك» تۇلەكتەردىڭ فوتوشەجىرەلەرىنەن قۇرالعان البومدار قويىلعان. شۋ اۋدانىنان شىققان ماحمۇت قاسىمبەكوۆ, بولات ساۋرانباەۆ, ءىلياس تورتاەۆ باسقا دا مەتسەناتتار اۋدانعا دەمەۋشىلىك جاساپ تۇرادى. سونداي-اق سوڭعى ءۇش جىلدا بىرقاتار مەتسەنات تۇلەكتەردىڭ باستاماسىمەن 700,0 ميلليون تەڭگەدەن استام كولەمدە كومەكتەر كورسەتىلىپ كەلگەن.
بەلباسار اۋىلىنا بولات ساۋرانباەۆ سپورت كەشەنىن, شۋ قالاسىنا يۋري تسحاي «تارلان» سپورت كەشەنىن سالىپ بەرسە, عاليا ابىتاەۆانىڭ باستاماسىمەن اۋداننىڭ كاسىپكەرلەرى مەديتسينا مەكەمەلەرىنە كوروناۆيرۋس ىندەتىمەن كۇرەس كەزىندە 60,0 ميلليون تەڭگەگە وكپەنى جاساندى جەلدەتۋ اپپاراتتارىن الىپ بەرگەن. ال, د.قوناەۆ اۋىلى, تولە بي اتىنداعى مەكتەپتىڭ تۇلەكتەرى زاماناۋي ۇلگىدەگى كىشى فۋتبول الاڭىن سالىپ بەرسە, كوكقاينار اۋىلى, ساتتار ەستەمەسوۆ اتىنداعى ورتا مەكتەبىنىڭ تۇلەگى مارات سىرلىباەۆ ماتەماتيكا كابينەتىن جابدىقتاپ, كۇردەلى جوندەۋدەن وتكىزگەن. سونىمەن قاتار باسقا دا كوپتەگەن تۇلەكتەر ءوز مەكتەبىنە, اۋىلىنا, ۇستازدارىنا دەمەۋشىلىك كورسەتىپ, وقۋشىلارمەن 34 موتيۆاتسيالىق كەزدەسۋ ۇيىمداستىرعان.
جامبىل وبلىسى
