قازاقستان رەسپۋبليكاسىنىڭ مەملەكەتتىك حاتشىسى قىرىمبەك كوشەرباەۆ قازاقستاننىڭ ەڭبەك ەرى, حالىق جازۋشىسى ولجاس سۇلەيمەنوۆتىڭ 85 جىلدىق مەرەيتويىنا وراي وتكەن سالتاناتتى قۇتتىقتاۋ راسىمىنە قاتىستى. مەملەكەتتىك حاتشى مەرەيتوي يەسىنە قر تۇڭعىش پرەزيدەنتى – ەلباسى نۇرسۇلتان نازارباەۆتىڭ جانە مەملەكەت باسشىسى قاسىم-جومارت توقاەۆتىڭ قۇتتىقتاۋ حاتتارىن تابىستادى.
مەملەكەتتىك حاتشى سالتاناتتى جيىننىڭ اشىلۋىندا تاۋەلسىزدىگىمىزدىڭ 30 جىلدىعى اياسىندا اتاقتى جازۋشىنىڭ مەرەيتويى ەرەكشە مانگە يە بولعاندىعىن جەتكىزدى, ولجاس سۇلەيمەنوۆتىڭ ادەبيەتشى, پارلامەنتاري, ديپلومات جانە قوعام قايراتكەرى رەتىندە ەلىمىزدىڭ وركەندەۋىنە قوسقان زور ۇلەسى مەن حالىقارالىق ابىروي-بەدەلىن اتاپ ءوتتى.
قىرىمبەك كوشەرباەۆ اتاپ وتكەندەي, ولجاس سۇلەيمەنوۆ – مادەنيەتتىڭ اسىل جاۋھارلارىن ساقتاپ قالىپ, زاماناۋي جاھاندانۋ سىن-قاتەرلەرىنە توتەپ بەرە الاتىن, سونداي-اق ادامزاتتىڭ وركەندەۋىنە مۇمكىندىك بەرەتىن عالامشارلىق سانانىڭ اقىنى. بۇل, اسىرەسە, قازىرگى ۋاقىتتا رۋحاني جاڭارۋ مەن حالىق ساناسىن جاڭعىرتۋ جولىنداعى ءبىزدىڭ حالقىمىز ءۇشىن اسا وزەكتى.
سالتاناتتى جيىندا مادەنيەت جانە سپورت ءمينيسترى اقتوتى رايىمقۇلوۆا, الماتى قالاسىنىڭ اكىمى باقىتجان ساعىنتاەۆ, تۇركسوي-دىڭ باس ديرەكتورى دۇيسەن قاسەيىنوۆ, قازاقستان جازۋشىلار وداعىنىڭ توراعاسى ۇلىقبەك ەسداۋلەت ءسوز سويلەدى.
سونىمەن قاتار قازاقستاننىڭ ەڭبەك ەرى, حالىق ءارتىسى ءاسانالى ءاشىموۆ, اكادەميك تورەگەلدى شارمانوۆ, حالىقارالىق تۇركى اكادەمياسىنىڭ پرەزيدەنتى دارحان قىدىرالى وزدەرىنىڭ جىلى لەبىزدەرى مەن تىلەكتەرىن ءبىلدىردى.
مەملەكەتتىك حاتشى بىرقاتار زيالى قاۋىم وكىلدەرىمەن جانە ساراپشىلارمەن بىرقاتار كەزدەسۋ وتكىزدى.
