جامبىل وبلىسىنىڭ تالاس اۋدانى, ءۇشارال اۋىلىنىڭ 68 جاستاعى تۇرعىنىنىڭ دەنە قىزۋى ءۇش كۇننەن بەرى تۇسپەي, تىنىس الۋى قيىنداعان سوڭ, ناۋقاس جەدەل جاردەم كولىگىمەن ورتالىق اۋرۋحاناعا جەتكىزىلەدى. تەكسەرۋ بارىسىندا كومپيۋتەرلىك توموگرافيا وكپەنىڭ 50 پايىزى زاقىمدالعانىن انىقتاپ, وعان ەكىجاقتى پوليسەگمەنتارلى پنەۆمونيا دياگنوزى قويىلادى.
سونداي-اق وبلىستىق دەنساۋلىق ساقتاۋ باسقارماسىنىڭ مالىمەتىنشە, پاتسيەنتتە ستەنوكارديا, بۇيرەكتىڭ باسىم زاقىمدانۋىمەن ارتەريالىق گيپەرتەنزيا جانە قان اينالىمىنىڭ بۇزىلۋى سياقتى ىلەسپە اۋرۋلار بولعان.
ناۋقاس شۇعىل تۇردە جانساقتاۋ بولىمىنە جاتقىزىلىپ, وعان قوسىمشا رەسپيراتورلىق قولداۋ كورسەتىلگەن. اراعا بەس كۇن سالىپ جاعدايى جاقسارعان سوڭ, ارنايى ورتاق بولمەگە اۋىستىرىلعان. دارىگەرلەردىڭ كومەگىنىڭ ناتيجەسىندە زەينەتكەر 15 كۇن ىشىندە سىرقاتىنان تولىق ايىعىپ شىقتى.
«مەن بارلىق مەديتسينا قىزمەتكەرلەرىنە العىس ايتامىن. وبلىس ورتالىعىنا بارماي-اق, اۋداندىق اۋرۋحانادا قاجەتتى ەم-دوم الىپ, وتباسىما امان-ەسەن ورالدىم. اق حالاتتى ابزال جاندارعا باقىت, دەنساۋلىق جانە وسى پاندەميامەن كۇرەسۋدە شىدامدىلىق تىلەيمىن. ەڭبەكتەرىڭىز جانا بەرسىن!», دەيدى ول.
«ادامنىڭ اۋرۋدان جازىلۋى ونىڭ ىشكى جاعدايىنا, ونىڭ ءومىر سۇرۋگە, وتباسىنا, جاقىندارىنا ورالۋعا دەگەن نيەتىنە تىكەلەي بايلانىستى. بۇل كىسى ءبىزدىڭ ستاتسيونارىمىزداعى ومىرگە قۇشتار ناۋقاستاردىڭ ءبىرى بولعان, سوندىقتان دا ول كوروناۆيرۋس ىندەتىن جەڭدى», دەيدى ەمدەۋشى دارىگەر تولقىن جاڭاباي.
جامبىل وبلىسى
