وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى بەكبولات ءىزباساروۆتىڭ حابارلاۋىنشا, جىل باسىنان بەرى 56 بالا كوروناۆيرۋستىڭ سيمپتومدى جانە سيمپتومسىز تۇرىنە شالدىققان. قازىرگى ۋاقىتتا ستاتسيوناردا 7 بالا ەم قابىلداپ جاتىر. سونداي-اق جىل باسىنان بەرى 47 جۇكتى ايەلدەن وسى دەرتتىڭ بەلگىلەرى تابىلىپ, سيمپتومدى ءتۇرىنىڭ بەلگىلەرى بايقالعان 27 ايەل پروۆيزورلىق ورتالىققا جاتقىزىلدى. كۇنى كەشە عانا وبلىستىق پەريناتالدىق ورتالىقتا 30 جاستاعى كەلىنشەك بوسانعاننان كەيىن قايتىس بولدى. الدىن الا تەكسەرۋ قورىتىندىسى بويىنشا مارقۇمنىڭ وكپەسىنەن وسى دەرت بەلگىلەرى تابىلعان.
قازىرگى ۋاقىتتا وڭىردە 11 لابوراتوريادا تۇرعىنداردان كوروناۆيرۋس ينفەكتسياسىنا قارسى پتر-تەست الىنىپ جاتىر. اقپاننان بەرى تۇرعىنداردى ۆاكتسينالاۋ قارقىندى جالعاسىپ كەلەدى. بيىلعى اقپان ايىنان قازىرگە دەيىن اقتوبە وبلىسىنا 105 200 دانا ەكپە جەتكىزىلىپ, وسى كەزگە دەيىن 1020 تۇرعىن ەكپەنىڭ ءبىرىنشى كومپونەنتىن الدى. الايدا تۇرعىندار ەكپەنىڭ ەكىنشى كومپونەنتىنە تاپشىلىق سەزىلگەنىن ايتىپ, شاعىم تۇسىرۋدە. ويتكەنى سوڭعى كۇندەرى ەمحانالارعا ەكپە الۋعا بارعان تۇرعىنداردى مەديتسينا قىزمەتكەرلەرى «كەيىن كەلىڭىز» دەپ قايتارىپ جاتىر. وسىعان بايلانىستى وبلىستىق دەنساۋلىق ساقتاۋ باسقارماسىنىڭ باسشىلارى تۇرعىندارعا ەكپە جۇمىستارىنىڭ بارىسى تۋرالى جەدەل اقپارات جەتكىزۋى قاجەت.
ءوز جۇمىستارىن جالعاستىرۋ ءۇشىن كاسىپكەرلىك نىساندارىنان Ashyq جوباسىن پايدالانۋ تالاپ ەتىلەدى. ەكپە العان ادامدار تۋرالى دەرەكتەر قوسىمشادان كورىنبەگەندىكتەن, كوپشىلىك جۇرت ەكپە العان ازاماتتىڭ مارتەبەسى قالاي كورسەتىلەتىنىن سۇراپ جاتىر.
«اتامەكەن» وڭىرلىك كاسىپكەرلىك پالاتاسى ماماندارىنىڭ حابارلاۋىنشا, قازىرگى كەزدە Ashyq جوباسىن ۆاكتسينالاۋ تولقۇجاتىمەن بىرىكتىرۋ جۇمىستارى ءجۇرىپ جاتىر. جۇيەلەردى ينتەگراتسيالاۋدان كەيىن ۆاكتسينا العان ازاماتتارعا قوسىمشادا «جاسىل» مارتەبە بەلگىلەنەدى. وسىنىڭ نەگىزىندە COVID-19-عا پتر-تەستىلەۋى (72 ساعات) تەرىس شىققان ادامداردا دا «جاسىل» مارتەبە بولادى. «كوك» مارتەبە پتر-تەستىلەۋى جوق جانە ناۋقاس ادامدارمەن بايلانىستا بولماعان ادامدارعا بەرىلەدى. قوسىمشانىڭ قالعان ادىستەمەسى وزگەرىسسىز قالدى. ەگەر ادام پتر-تەست تاپسىرىپ, وڭ ناتيجە شىقسا «قىزىل» ءتۇس بەرىلەدى. مۇنداي جاعدايدا وسى ازامات ۇيدە وقشاۋلانۋ رەجىمىن قاتاڭ ۇستانۋى كەرەك. «سارى» ءتۇس ناۋقاس اداممەن بايلانىستا بولعان ادامدارعا بەرىلەدى. ولارعا ازىق-ت ۇلىك نەمەسە ءۇي جانىنداعى دارىحاناعا بارۋعا رۇقسات ەتىلەدى, بىراق باسقا نىساندارعا بارۋعا تىيىم سالىنادى. «كوك» ءتۇس پتر-تەستىلەۋ تاپسىرۋ مىندەتتى ورىنداردان (مىسالى, اۋەجاي) باسقا بارلىق جەرگە بارۋعا رۇقسات بەرەدى. «جاسىل» ءتۇس – ءجۇرىپ-تۇرۋعا تولىعىمەن رۇقسات دەگەن ءسوز. تۇرعىندار وسىلايشا ينفەكتسيا جۇقتىرۋ قاۋپى بويىنشا ءوز جاعدايلارىن الدىن الا قاشىقتان, ۇيدە وتىرىپ تەكسەرە الادى.
مامىر ورتاسىنان اۋسا دا, كوروناۆيرۋس ينفەكتسياسىنىڭ ازايۋىن ءالى ەشكىم تاپ باسىپ ايتا الماي وتىر. دارىگەرلەر ەكپە العان ادامداردىڭ كوبەيۋىمەن قاۋىپتى ىندەتتىڭ تارالۋ وشاعى ازايادى دەگەن بولجامدى عانا جاريالادى.
اقتوبە وبلىسى
