«حالىقتىڭ ۆاكتسيناعا دەگەن ىقىلاسى جاقسى. بۇگىندە ۆاكتسينا الاتىن كونتينگەنتتىڭ 30 پايىزىنان استامىنا ۆاكتسينا سالىندى. شىمكەنت بۇل كورسەتكىش بويىنشا الدىڭعى قاتاردا», دەدى م.ايتەنوۆ. ەكپە ەگۋدە اعا بۋىن وكىلدەرى دە كەيىنگىلەرگە ۇلگى كورسەتۋدە. مىسالى, شىمكەنت قالاسىنىڭ 90 جاستاعى تۇرعىنى قۋانىش ابدۋراحمانوۆ ءوزى تىركەلگەن ەمحاناسىنا كەلىپ, كوروناۆيرۋس ۆاكتسيناسىن سالدىردى. عاسىرعا جۋىق ءومىر سۇرگەن, الەمدە بولىپ جاتقان جاعدايدان كۇندەلىكتى حاباردار بولىپ وتىرعان قاريا ۆاكتسينا قابىلداۋدى ءجون كورگەن. ەكپە الدىندا قاريانى تەكسەرۋدەن وتكىزگەن دارىگەرلەر قارسى كورسەتىلىمدەر بولماعاندىقتان, سپۋتنيك-V ۆاكتسيناسىنىڭ ءى-كومپونەنتىن ەكتى. «ويلانا كەلە ءوز ەركىممەن ىندەتكە قارسى ۆاكتسينانى سالدىرتتىم. وسىلايشا, ءبىز ۆيرۋستى جەڭەمىز. كوپشىلىككە ايتارىم, ۆاكتسينادان قورقۋدىڭ قاجەتى جوق. ەكپەنى سالدىرتۋ قاجەت دەپ ويلايمىن», دەيدى اقساقال. قاريانىڭ وتباسى مۇشەلەرىنىڭ بارلىعى ۆاكتسينا سالدىرىپتى.
بەيسەنبى, ياعني 20 مامىرداعى جاعداي بويىنشا, «قىزىل ايماقتاعى» شىمكەنتتە ىندەت جۇقتىرۋدىڭ 109 جاعدايى تىركەلگەن. ولاردىڭ ىشىندە بەلگىلەرى بارى 52 بولسا, 57-ءنىڭ بەلگىلەرى جوق, 19 ادام ينفەكتسيالىق ستاتسيونارعا جاتقىزىلىپ, 90 ادام ءۇي باقىلاۋىنا الىندى. بۇگىندە مامانداندىرىلعان ينفەكتسيالىق ستاتسيونارلاردا بارلىعى 1406 ورىن بار. توسەكتىك ورىن تولىمدىعى – 43%, ياعني 798 ورىن بوس. ەپيدەميالىق جاعداي ناشارلاعاندا توسەك ورىنداردىڭ سانى 5 416-عا جەتكىزىلەدى. ينفەكتسيالىق ستاتسيونارداعى 608 ناۋقاستىڭ 282-ءى كوروناۆيرۋستان, 322-ءى پنەۆمونيادان, 4-ءۋى تۇماۋدان ەمدەلۋدە. جانساقتاۋ بولىمىندە 35 ناۋقاس جاتىر. قالالىق دەنساۋلىق ساقتاۋ باسقارماسىنىڭ مالىمەتىنە سۇيەنسەك, ءبىر تاۋلىك ىشىندە 2 459 ادام ۆاكتسينا العان. جالپى, ەگۋ ناۋقانى باستالعالى بارلىعى 166 370 ادام ۆاكتسينالاندى. ونىڭ ىشىندە ۆاكتسينانىڭ ەكى كومپونەنتىن العاندار سانى – 69 905.
قالا اۋماعىندا سانيتارلىق-ەپيدەميالىق تالاپتاردىڭ ساقتالۋىنا مونيتورينگ جۇرگىزەتىن 24 موبيلدىك توپ جۇمىس ىستەۋدە. وتكەن تاۋلىكتە 478 نىسانعا تەكسەرۋ جۇمىستارى جۇرگىزىلىپ, ونىڭ 10-ىندا كارانتين رەجىمىنىڭ تالاپتارى بۇزىلعانى انىقتالعان. كوروناۆيرۋس ينفەكتسياسىنىڭ الدىن الۋ, تارالۋ جانە جۇقتىرۋ قاۋپىنە قاراماستان, بىرقاتار مەكەمە كارانتين شەكتەۋىن جۇيەلى تۇردە بۇزىپ كەلەدى. مىسالى, ەڭبەكشى اۋداندىق پوليتسيا ءبولىمىنىڭ ءموبيلدى توبى كاسىپكەرلىك سۋبەكتىلەرىنىڭ كارانتين رەجىمىن بۇزعانىن انىقتادى. «ەڭبەكشى اۋدانىندا ورنالاسقان «فيشەر» ءدامحاناسى تۇنگى ۋاقىتتا كارانتين تالاپتارىنا باعىنباي جۇمىسىن جالعاستىرىپ جاتقانى انىقتالدى. ءدامحانانىڭ كىشى زالىندا 20 كەلۋشى اراقاشىقتى ساقتاماي جيىن وتكىزگەن. وسى انىقتالعان جايتقا قاتىستى جيناقتالعان ماتەريالدار شارا قابىلداۋ ءۇشىن ەڭبەكشى اۋدانى بويىنشا تاۋارلار مەن كورسەتىلەتىن قىزمەتتەر ساپاسىنىڭ قاۋىپسىزدىگىن باقىلاۋ باسقارماسىنا ءىس-قۇجاتتار جولدانىپ, ءدامحانا اكىمشىسىنەن تۇسىنىكتەمە الىندى», دەلىنگەن پوليتسيا حابارلاماسىندا.
ايتا كەتەلىك, شىمكەنت قالاسىندا كوروناۆيرۋس پاندەمياسى باستالعاننان بەرى ىندەتتىڭ 11 229 جاعدايى تىركەلگەن. ەمدەلىپ شىققاندار سانى – 10 مىڭعا جۋىقتاعان.
شىمكەنت
