– جاقىندا عانا «اقىن» ءفيلمىن ءتۇسىرىپ بولدىق. قازىر دىبىسىن مونتاجداپ جاتىرمىز. وسى ايدىڭ اياعىندا تولىقتاي بىتىرەمىز.
بۇل ءفيلمنىڭ ستسەناريىن ءوزىم جازدىم. مۇنداعى نەگىزگى تاقىرىپ – قازاق ادەبيەتىنىڭ, اسىرەسە قازاق تىلىندەگى شىعارمالار مەن اۆتورلاردىڭ بۇگىنگى قوعامداعى ءرولى, مەملەكەتتىك ءتىلدىڭ, ادەبيەتتىڭ بولاشاعى, سونداي-اق ونەردىڭ, شىعارماشىلىقتىڭ تامىرى قايدا جاتىر دەگەن ساۋالعا جاۋاپ ىزدەپ كوردىك.
ءفيلمنىڭ سيۋجەتىن نەمىس جازۋشىسى گەرمان گەسسەنىڭ «اۆتورلىق كەش» اتتى اۆتوبيوگرافيالىق اڭگىمەسىنەن الدىم. وندا جاس جازۋشىنى ءبىر قالاعا كەزدەسۋگە شاقىرادى. اۆتور بۇكىل قالا ءوزىن كۇتىپ وتىر دەپ ويلايدى, بىراق ول كەشكە ەشكىم كەلمەيدى. وسى سيۋجەتتەن باستاپ باسقا دا ءتۇرلى ماسەلەنى قامتۋعا تىرىستىق. قاھارمانىمىز – 35-40-تىڭ ورتاسىنداعى ديدار دەگەن اقىن. ونىڭ ءرولىن ءانشى ەردوس قاناەۆ وينايدى. سيۋجەت بويىنشا اقىن ديداردى ەلىمىزدىڭ ءبىر تۇكپىرىندەگى وبلىسقا اۆتورلىق كەش وتكىزۋگە شاقىرادى. ول دا گەسسە سياقتى اسا ۇلكەن ۇمىتپەن, سەنىممەن بارادى. الايدا كەشىنە ءبىر قىز عانا كەلەدى.
وسى وقيعالارمەن پاراللەل ءجۇرىپ وتىراتىن تاعى ءبىر ەپيزود بار. اقىن فيلم بويى كىتاپ وقىپ وتىرادى: ول – ماحامبەتتىڭ ءومىرى تۋرالى. ونىڭ وقىعان وقيعالارىن فيلمدە كورسەتىپ وتىردىق. ءبىرىنشى, ماحامبەتتى قاراويدا قالاي ولتىرگەنى, ودان سوڭ سۇيەگىنىڭ نەشە جىل ەشكىمگە كەرەك بولماي جاتقانى, قازىپ الىپ الماتىعا الىپ كەلگەنىن تۇسىردىك. ءبىر قىزىعى, قاھارمانىمىز سول كىتاپتى وقىعان كەزدە ماحامبەتتىڭ بەينەسىندە ءوزىن ەلەستەتەدى. ايەلىنىڭ بەينەسىندە ءوزىنىڭ ايەلىن قويادى. ءبىر ءفيلمنىڭ ىشىندە ەكى فيلم تۇسىرگەن سياقتى وسىنداي پاراللەل كادرلار بار. ەكى وبرازعا دا ورتاق دۇنيە – اقىندىق: قازىرگى ۋاقىتتىڭ اقىنى جانە ماحامبەتتىڭ قاي زاماندا دا اقىن بولىپ قالاتىنى, قوعامعا بايلانىستى ەكەۋىنىڭ دە ورتاق ماسەلەلەرى.
– ديداردىڭ قازاق ادەبيەتىندە ناقتى ءبىر ءپروتوتيپى جوق پا؟
– ونداي اقىندار قازىر كوپ دەپ ويلايمىن. بۇل – تەك ادەبيەتشىلەر مەن اقىنداردىڭ عانا ەمەس, جالپى شىعارماشىلىق ادامدارىنىڭ ورتاق ماسەلەسى. مويىنداۋ كەرەك, بۇگىندە شىن ونەرمەن اينالىسىپ, ەڭبەگىڭدى حالىقتىڭ باعالاۋى قيىنداپ بارادى. سوندىقتان بۇل جيىنتىق وبراز, ياعني ورتاق پروتوتيپ دەسەك بولادى.
– ءتۇسىرىلىم جۇمىستارى قاي وڭىرلەردە ءوتتى؟
– نەگىزگى ءتۇسىرىلىم الماتى قالاسىندا ءوتتى. ال قوسىمشا كادرلار اتىراۋ وبلىسىندا, قاپشاعاي, تالعار جانە پويىز ىشىندەگى ەپيزودتى الماتى مەن تاراز اراسىنداعى پويىزدا تۇسىردىك.
– كىم قارجىلاندىردى؟ حالىققا قاشان ۇسىنىلادى؟
– مادەنيەت جانە سپورت مينيسترلىگىنىڭ قارجىلاندىرۋىمەن «قازاقفيلم» ءتۇسىرىپ وتىر.
ال كينوتەاترلاردا قاشان كورسەتىلەتىنى ءالى بەلگىسىز. ارينە, ءبارى پاندەميالىق احۋالعا بايلانىستى.
– شىعارماشىلىق جۇمىسىڭىزدىڭ ءمان-جايىن ايتىپ, بولىسكەنىڭىزگە راحمەت.
