145 ميلليونعا جۋىق ناۋقاس ىندەتتەن جازىلدى, 3,4 ميلليون ادام قايتىس بولدى. سونداي-اق الەمدەگى 1,5 ملرد استام ادام كوروناۆيرۋسقا قارسى ۆاكتسينا الدى.
ەۋروپا ۆاكتسينا العانداردى كىرگىزە باستايدى. الايدا بارلىعىنا بىردەي رۇقسات جوق
ەۋرووداق مەملەكەتتەرى ەۋروپالىق كوميسسيانىڭ ءۇشىنشى ەلدەردەن كەلگەن تۋريستەر ءۇشىن كىرۋدىڭ جاڭا ەرەجەلەرى تۋرالى ۇسىنىسىن ماقۇلدادى.
ەو ەلدەرىنە كىرۋدىڭ قاتاڭ كارانتين ەرەجەلەرى تۋريستىك ماۋسىمعا بايلانىستى جەڭىلدەتىلەدى. قازىر ەۋروپاعا كارانتينسىز جانە دالەلدى سەبەپسىز تەك 7 ەلدىڭ ازاماتتارىنا كىرۋگە رۇقسات, ونىڭ ىشىندە ۆاكتسينا العان-الماعانىنا قاراماستان اۆستراليا, يزرايل جانە سينگاپۋر بار.
جازعا قاراي ەۋروپا ەۋروپالىق كوميسسيا بەكىتكەن ۆاكتسينالاردىڭ ءبىرىن العان بارلىق تۋريستەردى قابىلداماق. بۇگىنگى تاڭدا BioNtech جانە Pfizer, AstraZeneca, Moderna جانە Johnson & Johnson پرەپاراتتارى ماقۇلدانعان. ال قىتايدىڭ Sinovac جانە رەسەيدىڭ سپۋتنيك-V ۆاكتسينالارى ءالى دە باعالاۋ ساتىسىندا.
ءۇندىستان «قارا زەڭدى» جەڭە الماي جاتىر
ءۇندىستان اۋرۋحانالارىندا زەڭگە قارسى امفورەتسيتين ۆ پرەپاراتىنىڭ تاپشىلىعى سەزىلە باستادى.
بۇل – كوروناۆيرۋستى ەمدەۋدە قولدانىلاتىن ستەرويدتەردەن پايدا بولاتىن مۋكورميكوز ينفەكياسىنا قارسى ءدارى-دارمەك. مۋكورميكوز – Mucorales تۇقىمداس زەڭدەردىڭ ءارتۇرلى تۇرلەرىنەن تۋىنداعان اۋرۋ. ادەتتە زەڭدەر قاۋىپسىز, بىراق يممۋندىق جۇيەسى السىرەگەن ادامدارعا, مىسالى, قانت ديابەتى, قاتەرلى ىسىك نەمەسە اقتق/جقتب-مەن اۋىراتىندار ءۇشىن مۇرىننىڭ شىرىشتى قابىعىنا, وكپەگە جانە ءتىپتى ميعا اسەر ەتۋى مۇمكىن.
فرانتسيادا كافەلەر مەن بارلار اشىلدى
فرانتسيادا سارسەنبىدەن باستاپ كافەلەر, بارلار, دۇكەندەر, گالەرەيالار مەن كينوتەاترلار جۇمىسقا ورالادى. ەلدە كارانتين جاعدايى جەڭىلدەپ جاتىر. بۇگىننەن باستاپ بۇكىل ەلدەگى كافەلەر مەن مەيرامحانالاردىڭ تەرراسالارىندا التى ادامعا دەيىن كەزدەسۋگە رۇقسات ەتىلەدى. وتكەن جىلدىڭ جەلتوقسان ايىندا ەنگىزىلگەن كومەندانتتىق ساعات كەشكى جەتىدەن توعىزعا اۋىستىرىلادى.
ەلدە ۆيرۋس جۇقتىرۋدىڭ جاڭا جاعدايلارىنىڭ سانى كۇنىنە 13 مىڭ دەڭگەيىندە ساقتالادى. تەك ءساۋىر ايىنىڭ باسىندا بۇل سان 40 مىڭعا جەتتى.
