ءىس-شارا بارىسىندا ءسىم باسشىلارى ۇقشۇ-نىڭ قازىرگى قىزمەتى جانە ونى دامىتۋ پەرسپەكتيۆالارى تۋرالى كەڭ اۋقىمدى ماسەلەلەردى تالقىلاپ, حالىقارالىق كۇن تارتىبىندەگى وزەكتى ماسەلەلەر بويىنشا پىكىر الماستى.
م.تىلەۋبەردى وتىرىسقا قاتىسۋشىلاردى ۇقشۇ فورماتىنداعى ىنتىماقتاستىق بويىنشا قازاقستاننىڭ ۇستانىمى تۋرالى حاباردار ەتىپ, ۇيىمدى ودان ءارى جان-جاقتى دامىتۋعا باعىتتالعان بىرقاتار ۇسىنىس ايتتى.
قازاقستان پرەزيدەنتى قاسىم-جومارت توقاەۆتىڭ ۇقشۇ-نىڭ 2020 جىلى جەلتوقساندا وتكەن سامميتىندە ۇسىنعان بىتىمگەرشىلىك ماسەلەلەرى بويىنشا ۇقشۇ باس حاتشىسىنىڭ ارنايى وكىلى ينستيتۋتىن قۇرۋ تۋرالى باستاماسىن ىسكە اسىرۋعا ەرەكشە نازار اۋدارىلدى. مينيستر ارىپتەستەرىنە جانە ۇقشۇ باس حاتشىسى ستانيسلاۆ زاسكە قازاقستان پرەزيدەنتىنىڭ باستاماسىن ىسكە اسىرۋ بويىنشا تىڭعىلىقتى ديالوگ پەن پراكتيكالىق يدەيالار ءۇشىن ريزاشىلىعىن ءبىلدىردى.
وتىرىس قورىتىندىسى بويىنشا مينيسترلەر قۇجاتتاردىڭ جوبالارىن ماقۇلدادى, ولاردىڭ بىرقاتارى وسى جىلدىڭ ءتورتىنشى توقسانىنا دۋشانبەدە وتكىزۋ جوسپارلانعان ۇقشۇ ۇجىمدىق قاۋىپسىزدىك كەڭەسىنىڭ سەسسياسىنا شىعارىلاتىن بولادى. ولاردىڭ ىشىندە – ۇقشۇ-عا مۇشە مەملەكەتتەردىڭ اۋماقتارىندا ۇجىمدىق قاۋىپسىزدىك جۇيەسىنىڭ كۇشتەرى مەن قۇرالدارى قۇرالىمدارىنىڭ ۋاقىتشا بولۋىنا بايلانىستى ىستەر بويىنشا يۋريسديكتسيا جانە قۇقىقتىق كومەك كورسەتۋ ماسەلەلەرى جونىندەگى كەلىسىم مەن ۇجىمدىق قاۋىپسىزدىك تۋرالى شارتقا قول قويىلۋىنىڭ 30 جىلدىعىنا جانە ۇقشۇ 20 جىلدىعىنا ارنالعان ءىس-شارالار جوسپارى بار.
سىرتقى ساياسات ۆەدومستۆولارىنىڭ باسشىلارى نيۋرنبەرگتەگى حالىقارالىق اسكەري تريبۋنال ۇكىمىنىڭ 75 جىلدىعىنا وراي, بيولوگيالىق جانە ۋىتتى قارۋلارعا تىيىم سالۋ تۋرالى كونۆەنتسيانى نىعايتۋ تۋرالى, ۇقشۇ-نىڭ مەملەكەتتەرمەن جانە حالىقارالىق ۇيىمدارمەن ىنتىماقتاستىعى تۋرالى, رەسەي مەن اقش اراسىنداعى ستراتەگيالىق شابۋىل قارۋلارىن ودان ءارى قىسقارتۋ جانە شەكتەۋ جونىندەگى شارتتىڭ قولدانىلۋ مەرزىمىن ۇزارتۋعا قاتىستى ءتورت ساياسي مالىمدەمە قابىلدادى.
ايتا كەتەيىك, ۇقشۇ 2002 جىلى قۇرىلعان جانە حالىقارالىق وڭىرلىك ۇيىم بولىپ تابىلادى, ونىڭ قۇرامىنا قازاقستانمەن قاتار ارمەنيا, بەلارۋس, قىرعىزستان, رەسەي جانە تاجىكستان كىرەدى. ۇقشۇ-دا قابىلدانعان روتاتسيالىق تەتىككە سايكەس سىرتقى ىستەر مينيسترلەرى كەڭەسىندە توراعالىق ەتۋ وسى جىلى تاجىكستان رەسپۋبليكاسىنا جۇكتەلدى.
