القالى جيىنعا مەملەكەتتىك حاتشى قىرىمبەك كوشەرباەۆ, ءبىلىم جانە عىلىم ءمينيسترى اسحات ايماعامبەتوۆ, مەملەكەت جانە قوعام قايراتكەرى قۋانىش سۇلتانوۆ, سىرتقى ىستەر ءمينيسترىنىڭ ءبىرىنشى ورىنباسارى شاحرات نۇرىشەۆ, سونداي-اق دەپۋتاتتار, بەلگىلى عالىمدار قاتىستى. ءىس-شارا حالىقارالىق تۇركى اكادەمياسىنىڭ پرەزيدەنتى دارحان قىدىرالىنىڭ توراعالىعىمەن ءوتتى.
تۇساۋكەسەر ءراسىمىن اشقان مەملەكەتتىك حاتشى قىرىمبەك كوشەرباەۆ «بۇگىن ۇلت مۇراتى مەن ۇرپاق كەلەشەگىنە قىزمەت ەتەتىن ءۇش بىردەي كىتاپتىڭ تۇساۋىن كەسىپ وتىرمىز. بۇل مازمۇندى, زەردەلى زەرتتەۋلەردىڭ اۆتورى – ءادىل احمەتوۆ. كورنەكتى عالىمنىڭ وقىرماندارعا ۇسىنىپ وتىرعان «تۇركى الەمىنىڭ ىرىم-تىيىمدارى», «كولۋمب داۋىرىنەن بۇرىنعى امەريكالىق «ۇندىستەردىڭ» التايلىق تەگى», «عاسىرلار عيبراتى» ەڭبەكتەرى قازاق رۋحانياتىنىڭ باي قازىناسىن ەسەلەپ, جۇرتشىلىقتىڭ عىلىمي قۇندىلىقتارىمىزعا دەگەن قۇرمەتىن ارتتىرىپ وتىر دەۋگە ابدەن بولادى. حاكىم اباي «ادامنىڭ ادامشىلىعى ءىستى باستاعانىنان بىلىنەدى» دەمەكشى, تابيعاتىندا زەرتتەۋ تاقىرىبىن تالعاممەن تاڭداپ, كىرىسكەن ءىسىن تەرەڭنەن قازىپ, ءتۇبىرلى ءارى تۇبەگەيلى ناتيجەگە قول جەتكىزبەي تىنشىمايتىن ءادىل احمەتوۆتىڭ بۇل سالادا ىزدەنىپ جۇرگەنىنە بىرنەشە جىلدىڭ ءجۇزى بولدى», دەدى.
سونداي-اق قىرىمبەك كوشەرباەۆ عالىمنىڭ ءتۇبى ءبىر تۇركى الەمىنىڭ ءدىلى مەن تاريحىنا تەرەڭ بويلاپ, ازيانىڭ ءبىر قيىرىنداعى ساحالاردان باستاپ, ەۋروپاداعى گاگاۋزدارعا دەيىنگى ارالىقتا مەكەن ەتەتىن 40-قا تارتا حالىقتىڭ ىرىم-تىيىمدارىن عىلىمي باعىتتا جۇيەلەپ بەرگەن ەڭبەگى تۋرالى دا ءسوز ەتتى.
دارحان قىدىرالى التايدان تامىر تارتاتىن اتا تاريحىمىزدى امەريكا-
داعى ۇندىستەرمەن جالعاپ, تۇپكى سانامىزدى ىرىم-تىيىمدار ارقىلى ەسكى ۇعىمدارمەن بايلانىستىرعان ءادىل احمەتوۆ تاريحىمىزدى ارىگە اپارعانىن ايتا كەلە, كىتاپتاردى تانىستىرىپ ءوتتى.
حالىقارلىق تۇركى اكادەمياسى ازىرلەگەن «تۇركى الەمىنىڭ ىرىم-تىيىمدارى» اتتى مونوگرافيادا اۆتور تۇركى حالىقتارىنىڭ ءتۇرلى تىيىمدارى مەن تىيىمدىق قاعيدالارعا نەگىزدەلگەن جوسىن-جورالعىلارىن, ادەپ راسىمدەرىن جان-جاقتى ساراپتاپ, تىيىمدىق ۇعىمداردىڭ تۇسىندىرمە سوزدىگىن ۇسىنعان. ال «عاسىرلار عيبراتى» كىتابىنا جاھاندانعان الەمنىڭ گەوساياسي كەلبەتى مەن ەگەمەن ەلىمىزدىڭ الەمدىك گەوساياساتتاعى دارا جولىن ايشىقتايتىن ساراپتامالىق ماقالالارى توپتاستىرىلعان. سونىمەن قاتار عالىمنىڭ «بۇرىنعى امەريكالىق «ۇندىستەردىڭ» التايلىق تەگى» اتتى كىتابىندا العاشقى امەريكالىقتاردىڭ ارعى تەگى عانا ەمەس, مادەنيەتى دە ەۋرازيا كەڭىستىگىمەن, سونىڭ ىشىندە ورتالىق ازيا ايماعىمەن ساباقتاس دەگەن باتىل تۇجىرىم جاسالعان.
جيىن بارىسىندا عالىم ءادىل احمەتوۆتىڭ قازاقستاننىڭ ءبىلىم جانە عىلىم سالاسىنا قوسقان ۇلەسى تۋرالى دا ايتىلدى. مەملەكەتتىك حاتشى ونىڭ عالىمنىڭ تاۋەلسىزدىكتىڭ ەلەڭ-الاڭىندا ەلىمىزدىڭ ءبىلىم جۇيەسىن زامانعا ساي ۇيىمداستىرۋ ستراتەگياسىن دايىنداعانىن ەسكە الىپ, «ادەكەڭمەن كەڭەسە وتىرىپ الەمدىك ءبىلىم كەڭىستىگىنە شىعۋعا تالپىنعاندا ەلدىك باعىت پەن ۇلتتىق مەنتاليتەتتى ەستەن شىعارماۋعا تىرىستىق», دەدى.
ءبىلىم جانە عىلىم ءمينيسترى اسحات ايماعامبەتوۆ ءادىل احمەتوۆتىڭ ەلىمىزدىڭ ءبىلىم سالاسىنداعى ەلەۋلى ەڭبەگىن ايتا كەلە, ونىڭ رەكتورلىق قىزمەتىنە, بىلىكتى مامانداردى دايارلاۋداعى ۇلەسىنە توقتالىپ ءوتتى.
ال قۋانىش سۇلتانوۆ ء«ادىل احمەتوۆ – قيىن-قىستاۋ كەزەڭدە دە قىزمەتتىڭ قىرىنان ءوتىپ, جاڭىلىسپاي كەلە جاتقان تۇلعا», دەي كەلە, قىزمەتتەس بولعان كەزىنەن ەستەلىكتەرىن ءسوز ەتتى.
