سۋرەتتى تۇسىرگەن رافحات حالەلوۆ
ورال قالاسىنىڭ قۇرامداس بولىگى – زاچاگانسك كەنتىندە 70 مىڭنان اسا حالىق تۇرادى. سوڭعى جىلدارى كوپقاباتتى ۇيلەر كوپتەپ سالىنىپ, ەرەكشە كوركەيىپ كەلە جاتقان اۋداندا ءبىر دە ءبىر مەشىت جوق ەدى. ءوڭىر باسشىسى عالي ەسقاليەۆ ايتقانداي, كەنت تۇرعىندارىنىڭ كوپتەن كۇتكەن تىلەگى ورىندالاتىن بولدى. اكىم وسىنداي يگى شاراعا ءمۇفتي حازىرەتتىڭ ارانيى قاتىسقانىنا ريزاشىلىق ءبىلدىردى.
- اق جايىق وڭىرىنە ارنايى ساپارمەن كەلىپ, بىرنەشە يگى شاراعا قاتىسىپ جاتىرمىز. اللانىڭ جەردەگى ءۇيى بولاتىن مەشىت – قاستەرلى ورىن, ونىڭ قۇرىلىسىنا قولداۋ كورسەتىڭىزدەر, مەشىت قۇرىلىسىنا كومەكتەسكەن ادامنىڭ الار ساۋابى وتە زور. پايعامبارىمىز حاديسىندە ايتادى: كىم دە كىم ومىرىندە ءبىر مەشىت سوقسا, اللا تاعالا وعان قيامەتتە ءوزى سوققان مەشىت سياقتى ءجانناتىنان ءۇي سالىپ بەرەدى دەيدى. اللا تاعالا قاسيەتتى قۇراندا: «اللاعا سەنگەندەر, اقيرەتكە سەنگەندەر اللا تاعالانىڭ ۇيلەرىن كوركەيتەدى» دەيدى. بۇل وتە ساۋاپتى ءىس. پايعامبارىمىز مەككەدەن ماديناعا ھيجرات ەتكەن كەزدە العاشقى جۇمىسىن مەشىت سالۋمەن باستاعان. ەلىمىزدىڭ استاناسى قازىرگى ورىنعا اۋىسقان كەزدە ەلباسىمىز العاشقى قۇرىلىستاردىڭ ءبىرى ەتىپ مەشىتتى باستاعان ەدى, قازىر نۇرسۇلتان قالاسىندا 12 مەشىت بار. ەل تاۋەلسىزدىگىنىڭ 30 جىلدىعى قارساڭىندا استانامىزدا الەمدەگى ەڭ ساۋلەتتى قۇرىلىستىڭ ءبىرى بولاتىنداي, العاشقى وندىققا كىرەتىندەي ءزاۋلىم مەشىت قۇرىلىسى ءجۇرىپ جاتىر. حالقىمىز «ازاندى ەل ازباس» دەگەن, بۇگىن ىرگەتاسى قالانىپ وتىرعان مەشىت عيماراتى حالىقتى يماندىلىققا, ادىلدىككە, ادالدىققا تاربيەلەيتىن ورىن بولعاي! – دەدى ءمۇفتي ناۋرىزباي قاجى تاعان ۇلى.
جاڭا مەشىت قۇرىلىسى حالىقتىڭ, جەكەلەگەن ادامداردىڭ قارجىسىنا سالىنباق. ول ءۇشىن ارنايى قور قۇرىلىپ, بۇگىندە ءتيىستى تىركەۋدەن ءوتىپ جاتىر. قالا اكىمدىگى مەشىت ءۇشىن 1 گەكتارعا جۋىق جەر بولگەن, مۇندا ءبىر مەزگىلدە 1500 ادام ءمىناجات ەتەتىن مەشىت كەشەنى, كولىك تۇراعى, تاعى باسقا ورىندار ەسكەرىلگەن. جاڭا مەشىتتىڭ جالپى كولەمى 2,5 مىڭ شارشى مەتر, مەشىتتىڭ قوس مۇناراسى 47 مەتر بولادى دەپ جوبالانعان.
- دىنگە شىن جانى اشيتىن ازاماتتار اتسالىسىپ, مەشىت قورىنا ۇلەس قوسادى دەپ ويلايمىن. مەشىت قۇرىلىسى قانشا ۋاقىتقا سوزىلاتىنى بەلگىسىز, ويتكەنى مەملەكەت سالىپ جاتقان نىسان ەمەس قوي. ءبارى قورعا تۇسەتىن قاراجاتقا بايلانىستى. قۇرىلىستى قولعا الاتىن مەردىگەر دە ناقتى انىقتالعان جوق, بىراق تىلەك بىلدىرۋشىلەر بار, - دەيدى زاچاگانسك كەنتىنىڭ اكىمى اققالي اۋبەكەروۆ.
باتىس قازاقستان
