وتىرىس بارىسىندا قارۋلى كۇشتەردى, باسقا دا اسكەرلەر مەن اسكەري قۇرىلىمداردى 2030 جىلعا دەيىن قۇرۋ جانە دامىتۋ تۇجىرىمداماسىنىڭ جوباسى قارالدى, سونداي-اق شەكارالىق قاۋىپسىزدىكتى قامتاماسىز ەتۋ ماسەلەلەرى تالقىلاندى.
وتىرىستى اشقان قاۋىپسىزدىك كەڭەسىنىڭ توراعاسى ەل دامۋىنىڭ كۇردەلى سىرتقى جاعدايلارى, ەڭ الدىمەن, كوروناۆيرۋس ينفەكتسياسىنىڭ جاھاندىق پاندەمياسىنىڭ الەۋمەتتىك-ەكونوميكالىق سالدارىمەن بايلانىستى ەكەنىن اتاپ ءوتتى. وسىعان بايلانىستى, ۆاكتسيناتسيا جۇمىستارىنىڭ ماڭىزى, سونداي-اق ۇكىمەتتىڭ حالىقتىڭ الەۋمەتتىك ماسەلەلەرىن شەشۋ جانە ەكونوميكالىق ءوسۋ قارقىنىن ساقتاۋ قاجەتتىلىگى اتاپ ءوتىلدى. نۇرسۇلتان نازارباەۆ قازىرگى جاعدايداعى اسكەري قۇرىلىم مەن قارۋلى كۇشتەردىڭ كونفيگۋراتسياسىندا جاڭا تاسىلدەردى ازىرلەۋ قاجەتتىلىگىن اتاپ ءوتتى.
– ءبىز بارلىق كورشىمىزبەن بەرىك دوستىق قارىم-قاتىناس جانە جەتەكشى دەرجاۆالارمەن بەرىك ارىپتەستىك ورناتتىق. سونىمەن قاتار مىقتى اسكەر – ەل قاۋىپسىزدىگىنىڭ ماڭىزدى كەپىلى, – دەدى قاۋىپسىزدىك كەڭەسىنىڭ توراعاسى.
ەلباسى بۇگىندە اسيممەتريالىق جانە گيبريدتى قاتەرلەردى تويتارۋعا دايىندىق, جاڭا تەحنولوگيالاردى ەنگىزۋ جانە اسكەري پروتسەستەردى باسقارۋدى اۆتوماتتاندىرۋ ماڭىزدى مانگە يە بولىپ وتىرعانىن مالىمدەدى.
– ءبىزدىڭ قارۋلى كۇشتەرىمىز ەگەمەندىك پەن اۋماقتىق تۇتاستىقتى, ۇلتتىق مۇددەلەردى قورعاۋعا قابىلەتتى بولۋى كەرەك. وسىنىڭ ءبارى تاياۋداعى ونجىلدىقتا اسكەردى دامىتۋدى جوسپارلاۋ كەزىندە ەسكەرىلۋى ءتيىس, – دەپ تاپسىردى نۇرسۇلتان نازارباەۆ.
قاۋىپسىزدىك كەڭەسىنىڭ توراعاسى شەكارا قاۋىپسىزدىگىن قامتاماسىز ەتۋ مىندەتىن شەشۋ شەكارا قىزمەتىنىڭ جۇمىسىن جانە شەكارانى قورعاۋ ادىستەرىن جەتىلدىرۋدى عانا ەمەس, سونداي-اق ەكونوميكالىق, اقپاراتتىق, قوعامدىق جانە اسكەري قاۋىپسىزدىك باعىتتارىنا بايلانىستى جۇيەلى شارالاردى تالاپ ەتەتىنىن اتاپ ءوتتى.
– شەكارانى قاۋىپ-قاتەردىڭ بارلىق تۇرلەرىنەن سەنىمدى تۇردە قورعاۋدى قامتاماسىز ەتۋ قاجەت. شەكارا قىزمەتى مەن قارۋلى كۇشتەردىڭ قۇرىلىمى ۇندەستىرىلىپ, بىرىڭعاي ستاندارتتار بويىنشا جۇرگىزىلۋى ءتيىس. سونىمەن قاتار ءبىز شەكارا قاۋىپسىزدىگى ماسەلەسىن كەشەندى, جۇيەلى تۇردە قاراۋىمىز كەرەك, – دەدى نۇرسۇلتان نازارباەۆ.
سونداي-اق ەلدىڭ اۋماقتىق-كەڭىستىك دامۋىنىڭ باسىمدىقتارى شەكارالىق قاۋىپسىزدىكتى قامتاماسىز ەتۋ جونىندەگى مىندەتتەرمەن سايكەس كەلۋى ءتيىس. وتىرىس بارىسىندا قورعانىس ءمينيسترى ن.ەرمەكباەۆ پەن ۇقك شەكارا قىزمەتىنىڭ ديرەكتورى د.ءدىلمانوۆتىڭ باياندامالارى تىڭدالدى.
