ايماقتار • 19 مامىر، 2021

سولتۇستىك قازاقستاندا سۋعا شومىلۋ ماۋسىمى باستالىپ كەتتى

26 رەت كورسەتىلدى

سولتۇستىك قازاقستان وبلىسىندا كۇننىڭ ىسۋىنا بايلانىستى سۋعا شومىلۋ ماۋسىمى ەرتە باستالدى. وزەن-كول باسىندا دەمالۋشىلاردىڭ قاراسى قالىڭ، دەپ حابارلايدى Egemen.kz.

سقو توتەنشە جاعدايلار دەپارتامەنتى ءباسپاسوز قىزمەتىنىڭ مالىمەتىنشە، وڭىردە 60 شاقتى وزەن، 2 مىڭنان استام كول جانە 100-دەن ارتىق قازانشۇڭقىر بار. سولاردىڭ ىشىندە دەمالۋشىلار ءۇشىن ەڭ قاۋىپتىلەرى – ەسىل وزەنى، پەستروە، سولەنوە، لەبياجە، ۇلكەن توراڭعۇل، شالقار جانە يمانتاۋ كولدەرى.

«سقو-دا كۇننىڭ ىسۋىنا بايلانىستى سۋعا شومىلۋ ماۋسىمىنىڭ اشىلۋىن كۇتپەي سۋعا ءتۇسىپ جاتقاندار بار. جالپى سۋعا شومىلۋ ماۋسىمى رەسمي تۇردە 1 ماۋسىمدا باستالادى. وسىعان بايلانىستى قاۋىپسىزدىك شارالارىن كۇشەيتتىك. بيىل سۋعا تۇسۋگە بولاتىن 58 ورىن بەلگىلەندى. بىلتىر سۋعا شومىلۋ ماۋسىمىندا 9 ادام، سونىڭ ىشىندە ءبىر بالا مەرت بولدى. ولاردىڭ بارلىعى ارنايى بەلگىلەنبەگەن جەرلەردە شومىلعان. جالپى سوڭعى 7 جىلدىڭ ىشىندە 180 ادام، سونىڭ ىشىندە 24 بالا سۋعا كەتتى»، دەيدى سقو تجد باستىعىنىڭ ورىنباسارى مۇرات قانعوجينوۆ.

وقىس وقيعالاردىڭ الدىن الۋ جانە دەمالۋشىلاردى ەسكەرتۋ ماقساتىندا حالىق كوپ جينالاتىن وزەن-كولدەرگە رەيدتەر ۇيىمداستىرىلىپ جاتىر. وعان «جاس وتان» جاستار قاناتى فيليالىنىڭ، جاستار رەسۋرستىق ورتالىعىنىڭ وكىلدەرى جانە پوليتسيا قىزمەتكەرلەرى كىرگەن. تەك وتكەن دەمالىس كۇندەرى قۇتقارۋشىلار 32 رەيد وتكىزىپ، 600-دەن استام جادىناما تاراتتى.

سوڭعى جاڭالىقتار

ۇقساس جاڭالىقتار