«تۇركىستان ارەنادا» جەرگىلىكتى «تۇران» ورالدىڭ «اقجايىعىن» قابىلدادى. بۇل كەزدەسۋدىڭ ءبىرىنشى كەزەڭىندە ەسەپ اشىلمادى. دەسەك تە ۇزىلىستەن كەيىن جاعداي كۇرت وزگەردى. 71 مەن 75 مينۋتتار ارالىعىندا نيكولاي كوۆتاليۋكتىڭ سوققان قوس گولدىڭ ارقاسىندا قوناقتاردىڭ مەرەيى ۇستەم بولدى – 0:2.
ءبىراز ۋاقىتتان بەرى جەڭىسكە جەتە الماي, ءوز جانكۇيەرلەرىنىڭ كوڭىلىنە سەلكەۋ تۇسىرگەن «قايرات» بۇل تۋردا كوزدەگەن ماقساتىنا قول جەتكىزدى. الماتىدا وتكەن ماتچتا ولار «اقتوبەنىڭ» قاقپاسىنا ءتورت دوپ سالسا, قارسىلاستارى نىسانانى ەكى رەت ءدال كوزدەدى – 4:2. «قايراتتىڭ» ساپىنداعى ارتۋر شۋشەناچەۆ (7, 36 مينۋتتار) دۋبل اۆتورى اتانسا, حوسە كانتە (51 مينۋت) مەن نەبويشا كوسوۆيچ (86 مينۋت) ءبىر-ءبىر گولدان سوقتى. قوناقتار اراسىندا ديدار جالمۇقان (41 مينۋت) مەن ەرۆەين مۋكام 54 (54 مينۋت) ءوز مۇمكىندىكتەرىن قالت جىبەرمەدى.
قىزىلوردادا جەرگىلىكتى «قايسار» «استاناعا» 2:5 ەسەبىمەن ەسە جىبەردى. العاشىندا مارين توماسوۆ (31 مينۋت) پەن ۆارازدات ارويان (37 مينۋت) ەلوردالىق كلۋبتى العا شىعاردى. ءبىرىنشى تايم اياقتالار تۇستا ماكس پوتاپوۆ (44 مينۋت) ەسەپ ايىرماشىلىعىن قىسقارتقانىمەن, ەبونگ نگومە (45 مينۋت) كوزدى اشىپ-جۇمعانشا قايتا دوپتى توردا تۋلاتتى. ۇزىلىستەن كەيىن توماسوۆ (47 مينۋت) پەن رومان مۇرتازاەۆ (61 مينۋت) مەرگەندىك تانىتسا, ستەفان دەنكوۆيچتىڭ (87 مينۋت) 11 مەترلىك نۇكتەدەن كەزدەسۋدىڭ سوڭعى نۇكتەسىن قويدى.
