ءوڭىر «جاسىل ايماققا» وتكەنىمەن, باس سانيتارلىق دارىگەردىڭ قاۋلىسى ءالى شىعا قويعان جوق. سەبەبى وبلىستاعى ەپيدەميالىق احۋال ءبىر اپتا مامانداردىڭ باقىلاۋىندا بولادى. ەگەر ىندەتتىڭ ءورشۋى ازايىپ, كورسەتكىش تومەندەسە, بىرقاتار شەكتەۋ شاراسى جەڭىلدەتىلۋى ىقتيمال. سوندىقتان ارقانى كەڭگە سالا قويۋعا ەرتە. تالاپ پەن ەرەجە بۇرىنعىداي.
– ءبارى ءبىر كۇندە وزگەرە قويمايدى. ەپيدەميولوگ ماماندار اۋرۋدىڭ تارالۋ كورسەتكىشتەرىن كۇن سايىن ەسەپتەپ, تالداپ, جاعدايدى باقىلايدى. ەگەر جەتى كۇن ىشىندە ىندەتتىڭ كۇندەلىكتى كورسەتكىشى تومەندەسە, «جاسىل ايماققا» تولىعىمەن وتەمىز. سوندا عانا شەكتەۋ شارالارىندا وزگەرىس بولۋى مۇمكىن, – دەيدى تاۋارلار مەن كورسەتىلەتىن قىزمەت ساپاسى مەن قاۋىپسىزدىگىن باقىلاۋ دەپارتامەنتىنىڭ ءباسپاسوز حاتشىسى باعىلان تاۋانوۆا.
ايتسە دە شەكتەۋ شارالارى تولىعىمەن الىنبايدى. ىندەت تۇبەگەيلى جويىلمايىنشا, اراقاشىقتىقتى ساقتاۋ, ماسكا تاعۋ سىندى ەرەجەلەر وزگەرمەيدى. ايتا كەتەرلىگى, جاعاجاي ماۋسىمىنىڭ اشىلۋىنا دا از ۋاقىت قالدى. جاعداي وڭالا قويماسا, جاعاجايلاردا دا مەديتسينالىق بەتپەردە كيۋگە تۋرا كەلەدى. ەستەرىڭىزگە قايتا ءبىر سالا كەتسەك, وبلىستىق باس مەملەكەتتىك سانيتارلىق دارىگەرىنىڭ 15 ساۋىردەگى قاۋلىسىنا سايكەس, حالىق قوعامدىق ورىنداردا, ونىڭ ىشىندە ايالدامالاردا ماسكالارىن مىندەتتى تۇردە تاعۋى كەرەك. جاعاجاي قوعامدىق ورىن بولعاندىقتان, ول جەردە دە مەديتسينالىق بەتپەردە كيۋ مىندەتتى. شىعىس قازاقستان وبلىسىنىڭ سانيتارلىق-ەپيدەميولوگيالىق باقىلاۋ دەپارتامەنتى ماماندارىنىڭ حابارلاۋىنشا, الەۋمەتتىك قاشىقتىقتى ساقتاعان جاعدايدا مەديتسينالىق ماسكاسىز شومىلۋعا رۇقسات ەتىلەدى. اتالعان شەكتەۋ شارالارىن بۇزۋ فاكتىلەرى انىقتالسا, اكىمشىلىك شارا قولدانىلادى. ەرەجەدە انىق ايتىلعانداي, جاعاجايدا قاز-قاتار ءتىزىلىپ, كۇنگە قىزدىرىنۋعا رۇقسات بولا قويماس.
ال دەمالىس, تۋريستىك-رەكرەاتسيالىق ايماقتارعا كىرۋ كەزىندە ەكپە العاندىعىڭدى دالەلدەيتىندەي «اشىق» جۇيەسى پايدالانىلا ما؟ دەمالۋشىلاردىڭ پتر-تەستىنىڭ ناتيجەسى ەسكەرىلە مە؟ وسى سياقتى بىرقاتار سۇراق ءالى مامانداردىڭ قاراۋىندا. الايدا وڭىردە ۆاكتسينا الىپ جاتقانداردىڭ قاتارى كۇننەن كۇنگە كوبەيىپ كەلەدى. قازىرگى ۋاقىتتا وسكەمەندەگى ەكپە الۋ پۋنكتەرى سەنبى, جەكسەنبى كۇندەرى دە جۇمىس ىستەيدى. وبلىستىق دەنساۋلىق ساقتاۋ باسقارماسىنىڭ وكىلى ەلميرا راحيمباەۆانىڭ ايتۋىنشا, كوروناۆيرۋسقا قارسى ەگۋدى بارلىق نيەت بىلدىرۋشىلەر الا الادى. بۇگىنگى تاڭدا ايماق تۇرعىندارى ءۇشىن رەسەيلىك سپۋتنيك-V جانە اراب وندىرىسىندەگى قىتايلىق Hayat-Vax ەكپەسى پايدالانىلىپ جاتىر. ونى اركىم ءوز تاڭداۋىنا قاراي الادى.
شىعىس قازاقستان وبلىسى
