پارلامەنت • 18 مامىر، 2021

قازاقستان مەن ەقىۇ اراسىنداعى ىنتىماقتاستىق تالقىلاندى

13 رەت كورسەتىلدى

سەنات سپيكەرى ماۋلەن اشىمباەۆ ەۋروپاداعى قاۋىپسىزدىك جانە ىنتىماقتاستىق ۇيىمى نۇر-سۇلتان قالاسىنداعى باعدارلامالار كەڭسەسىنىڭ باسشىسى فولكەر فروبارتپەن كەزدەسىپ، قازاقستان مەن ەقىۇ اراسىنداعى ىنتىماقتاستىقتى دامىتۋ ماسەلەلەرىن تالقىلادى، دەپ حابارلايدى Egemen.kz.

كەزدەسۋ بارىسىندا سەنات توراعاسى ەلىمىزدە مەملەكەت باسشىسىنىڭ باستاماسىمەن ىسكە اسىرىلىپ جاتقان ماڭىزدى ساياسي رەفورمالار جونىندە ايتىپ ءوتتى. سونىڭ ىشىندە، سايلاۋ تۋرالى زاڭنامالارعا ەنگىزىلەتىن وزگەرىستەرگە كەڭىنەن توقتالدى.

«بيىلعى 15 قاڭتاردا پارلامەنتتىڭ جاڭا شاقىرىلىمىنىڭ سەسسياسى اشىلدى. سول جيىندا پرەزيدەنتىمىز قاسىم-جومارت توقاەۆ بىرقاتار ساياسي باستامالاردى ۇسىندى. ناقتى ايتقاندا، ساياسي پارتيالاردىڭ پارلامەنت ماجىلىسىنە جانە ماسليحاتتارعا ءوتۋ شەگىن 7 پايىزدان 5-كە دەيىن تومەندەتۋ ۇسىنىلدى. سونداي-اق، سايلاۋ بيۋللەتەندەرىنە «بارىنە قارسىمىن» دەگەن جازۋدى قوسۋ ماسەلەسى كوتەرىلدى. قازىرگى تاڭدا ءتيىستى زاڭ جوباسىن سەنات قاراپ جاتىر»، دەدى ماۋلەن اشىمباەۆ.

سونىمەن قاتار سۇحباتتاسۋشىلار حالىقارالىق ماسەلەلەرگە دە نازار اۋداردى. سوعان سايكەس كەزدەسۋ كەزىندە ورتالىق ازيا ەلدەرىنىڭ ءوزارا قارىم-قاتىناسىن دامىتۋ جانە اۋعانستاندى قالپىنا كەلتىرۋ ماسەلەلەرى تالقىلاندى. ودان بولەك، اڭگىمە بارىسىندا ەكى جاق وڭىردە سۋ رەسۋرستارىن پايدالانۋ، ونىڭ ىشىندە، ارال تەڭىزىنىڭ ەكولوگيالىق احۋالى جايىندا ءسوز قوزعادى.

«ارال تەڭىزىنىڭ قازىرگى احۋالى ورتالىق ازيا ەلدەرىندەگى ميلليونداعان تۇرعىنداردىڭ ءومىر ءسۇرۋ ساپاسىنا كەرى اسەرىن تيگىزىپ وتىر. ءبىزدىڭ ەلدەرىمىز حالىقارالىق ۇيىمدارمەن بىرلەسىپ، ارال تەڭىزى باسسەينىندەگى ەكولوگيالىق جانە الەۋمەتتىك-ەكونوميكالىق داعدارىستى ەڭسەرۋ ءۇشىن جۇمىس ىستەۋدە. ءوڭىر ەلدەرىنىڭ باستاماسىمەن قۇرىلعان حالىقارالىق ارالدى قۇتقارۋ قورى جۇمىس ىستەپ تۇر. قازاقستان ارال تەڭىزىن قالپىنا كەلتىرۋ باعدارلاماسىن ىسكە اسىرۋ اياسىندا سۋ كولەمىن ۇلعايتتى»،  دەدى ماۋلەن اشىمباەۆ.

كەزدەسۋ سوڭىندا ەكى تاراپ قازاقستان مەن ەقىۇ اراسىنداعى ىنتىماقتاستىقتى ارتتىرۋعا مۇددەلى ەكەندەرىن ءبىلدىردى.

سوڭعى جاڭالىقتار

ۇقساس جاڭالىقتار